每消滅一隻怪獸，我條女對波就大一個cup！: 39

連續幾下攻擊都唔奏效，Z大俠突然用手扯甩條頸上面嘅護甲，跟住稍稍岳高頭，用手指公㩒住條頸近下巴嘅位置。

哼啊啊啊啊啊啊啊啊啊啊啊啊啊啊啊啊啊啊啊啊啊！！！！！

Z大俠咆哮大嗌，同時天空劃過一道閃電。

但係今次我聽唔到雷聲，因為Z大俠把聲完全掩蓋咗。

呢一次，佢比任何一次都嗌得大聲，成個石礦場迴蕩住佢嘅聲音，甚至感受連空氣中嘅粒子喺度震動。





當分貝力上升，戰鬥力亦隨之上升。

一秒後，Z大俠身上嘅升cup戰衣，發放出無比耀眼嘅金色光芒，照亮灰暗嘅四周。

就算同佢隔到咁遠，我都feel到佢身上嗰股湧動澎湃嘅力量。

仲有佢啱先㩒住條頸嗰個位，唔通係…穴位？

「Raugh！！！」





大猩猩仰天大叫，雙手不斷拍打心口，似乎喺度挑釁對手，叫佢放馬過嚟。

Z大俠手執長劍，身影快如疾風，銳利嘅劍尖向住敵人，直線衝擊。

大猩猩反應卻十分之快，第一時間向上跳起避開。

佢唔單止身手靈敏，而且彈跳力都好高，一下跳到差唔多三層樓咁高。。

不過Z大俠早就估唔到對方嘅動作，順勢跳起，動作猶如一隻獵豹立定跳躍，一瞬間之內，佢跳到同大猩猩平排嘅位置，隨即手起刀落，垂直一劍劈落去。





今次隻大猩猩避唔到，心口當堂被劃出一條長長嘅血痕。

我以為戰鬥應該差唔多結束，點知隻猩猩凌空一拳反擊，Z大俠始料不及，硬食對方一拳，結果膊頭嘅裝甲破碎裂開。

之後佢地兩個落返地下，立即埋身廝殺肉搏。

Z大俠嘅升cup戰衣戰鬥力提升咗，連隨攻擊速度都快咗好多。

佢手上嘅金色利劍，喺漆黑嘅環境中快速揮舞，出現多重金光殘影。

大猩猩面對住對手密集又猛烈嘅攻勢，避到就避，避唔到就直接硬食，但硬食之餘，佢一定會用拳頭還擊。

嘭！

嘭！

嘭！

佢堅硬嘅拳頭狠狠咁打落升cup戰衣上面，發出鏗鏘嘅擊撞聲，以及裝甲碎裂嘅聲音。

我見到金色嘅升cup戰衣不斷有碎片剝落。

咁當然，Z大俠絕對唔係淨係挨打，佢嘅攻擊命中率亦都好高，十劍入面有七、八劍都可以擊中敵人。

喺利劍瘋狂劈擊下，大猩猩疤痕累累，身上所流嘅血慢慢染紅佢黑色既體毛。

問題係，呢隻嘢唔單止抽得，坦傷能力仲非常之高，打極都未死。