每消滅一隻怪獸，我條女對波就大一個cup！: 40

一輪狂攻猛打，Z大俠體力開始下降，動作都變慢咗。

大猩猩就睇準呢個時機，一手捉住Z大俠把劍，然後想用力拗斷。

殊不知，Z大俠反過來利用呢個機會，鬆開手，放開把劍，跟住伸直兩隻手臂，近距離瞄準住敵人個肚，發射離子炮。

喺咁近距離，射出威力咁強勁嘅衝擊波，正常我估一係射穿佢個身，一係就俾強大嘅衝擊力撞開，但係隻大猩猩居然挺直條腰，紮恆個馬，直接用佢一身強橫嘅野獸肌肉，抵擋住咁強嘅能量波。

哼啊啊啊啊啊啊啊啊啊啊啊啊啊啊啊啊啊啊啊啊啊！！！！！！





Z大俠出盡力氣再大嗌一聲，面前嘅衝擊波隨之發射出更強嘅力量同更刺眼嘅光芒。

只但係隻猩猩一樣發出野獸嘅叫聲，並且谷盡全身嘅肌肉，頑抗抵禦。

咁不得止，喺咁嘅情況下，佢居然仲可以發力出拳反擊。

Raugh！！！

佢咬實牙關，右手用力擊出拳頭。





由於雙方距離極近，加上Z大俠一心顧住攻擊，嚟唔切閃避。

結果砰一聲巨響，佢俾對方一拳打到飛出廿幾米咁遠，成個人瞓咗喺度。

與此同時，大猩猩頭先好似都用盡力氣攻擊，呢一刻亦都不支倒地，單腳跪咗喺地下。

「好啦！機會嚟啦！」

呢個時候，梁sir好興奮咁企咗起身。





「梁sir，你想做咩？」我問佢。

「咁都仲要問，依家就係收拾隻怪物嘅大好時機！」

匿埋等咗咁耐，原來梁sir就係等Z大俠同大猩猩兩敗俱傷嘅呢一刻。

雖然大猩猩遍體鱗傷，血肉橫飛，但我依然都感受到隻嘢身上散發住極危險嘅信號。

「梁sir，就算隻猩猩受咗傷，但係佢…」

「只係爭一個cup，我就揸到巨乳！依家機會就擺喺眼前！E奶！我嚟啦！」

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊————

梁sir踏步向前，聲嘶力竭咁吶喊。





佢左右兩邊手臂內側，都掛咗兩對改裝過嘅擴音喇叭。

呢兩對喇叭嘅size睇落同一般小型喇叭差唔多，但佢嘅功能可以將原本嘅聲音再放大十倍。

因此喺呢一刻，梁sir高頻震耳嘅聲波，響徹成個石礦場。