每消滅一隻怪獸，我條女對波就大一個cup！: 41

「轟隆！」

陰沉嘅天空依然只係行雷唔落雨。

梁sir仰天大嗌，佢嘅升cup戰衣此刻散發出非常耀眼嘅銀光。

隨住佢嘅分貝力繼續上升，戰鬥裝甲不斷釋出強大嘅能量氣場，漸漸，閃耀嘅銀光蛻變成為金色嘅光芒。

睇嚟佢已經突破咗某個%嘅戰鬥力。





一變成金色戰士，梁sir就急不及待，都未行近就離遠向跪喺地下嘅大猩猩，射出金光閃爍嘅衝擊波。

BOOM！！！

衝擊波如流星劃過，大猩猩馬上雙手交叉胸前，做出抵禦嘅姿勢。

以佢嘅防禦力，一下攻擊絕對係唔夠。

梁sir當然意識到呢一點，因此佢繼續大嗌，嘗試再增加攻擊力，同時不斷發射衝擊波。





啊啊啊啊啊啊啊啊啊啊啊啊啊啊啊啊啊啊啊啊啊啊——

見到隻猩猩跪喺度，淨係用手擋，好似完全無還擊之力咁，唔通梁sir真係有機會執到雞？

點不知！大猩猩突然跳起！

跟住梁sir舉起雙手，向上瞄準，對方竟然喺半空中，打咗一個前空翻避開咗離子炮嘅攻擊，之後順勢斜線俯衝跳落地，從上而下向住梁sir揮拳攻擊。

梁sir第一時間向後避開，結果大猩猩打佢唔中，拳頭打落地下，成塊地震咗一下。





呢隻嘢同Z大俠大戰咗咁多個回合，家陣全身血跡斑斑、傷痕累累，但居然仲有咁頑強嘅戰鬥力！真係好可怕！

梁sir隨即還擊，從近距離射出衝擊波，大猩猩直接用生命值硬接，甚至仲主動行前，縮短雙方嘅距離。

梁sir見到怪獸舉高拳頭，殺到埋身，立即抽出合金劍，轉打近身戰。

事實上，佢選擇埋身肉搏，其實就正中對方下懷。

因為猩猩嘅智商同人類差唔多，佢地識得觀察對手。

梁sir亂劍揮擊，一開頭連續斬咗隻猩猩幾下，令對方身上再多幾條血痕。

只不過，隻猩猩好快就摸熟佢嘅攻擊節奏，知道點避，甚至仲識得誘敵攻擊。

隻猩猩一時間扮到企唔穩，故意露出破綻，引到梁sir舉高把劍，劈佢條頸。





結果把劍一劈落去，隻嘢即刻用雙手接住並夾實把劍。

梁sir嚇咗一跳，手上把劍俾對方夾實咗，想郁又郁唔到，掹又掹唔返出嚟。

就喺佢不知所措之際，大猩猩突然提起腳，用膝頭哥用力撞埋去，令到梁sir當堂鬆開把劍，成個人彈開咗十幾米咁遠。

呢個時候，我知道自己唔可以再袖手旁觀。

「啊啊啊啊啊啊啊啊啊啊啊啊啊啊啊啊啊啊啊啊啊啊啊——」

我忍住心口嘅痛楚，用力大嗌。

我都有用擴音喇叭輔助，因此戰鬥力一瞬間就突破1000%。





戰鬥甲由黑色變成銀白色之後，本來心口破裂嘅裝甲，隨即重新補合。

而喺我仲嗌嘅時候，梁sir已經企返起身。

佢個頭盔爛咗，額頭仲有血跡，但佢選擇繼續戰鬥。

「啊啊啊啊啊啊啊啊啊啊啊啊啊啊啊啊啊啊啊啊！！！E奶！！！！我要揸E奶！！！啊啊啊啊啊啊啊啊啊啊啊啊啊——」

佢再一次大嗌爆氣，下一秒就以閃電般嘅速度，以赤手空拳同敵人埋身肉搏。

大猩猩想避但避唔切，於是直接同梁sir拳搏拳，膽搏膽。