每消滅一隻怪獸，我條女對波就大一個cup！: 42

嘭！

嘭！

嘭！

雙方用好快咁速度互相出招攻擊，快到我都幾乎跟唔到，就算想加入戰團，一時之間都唔知點入手好。

同之前一樣，梁sir一開始都係佔到少少上風，只係當戰鬥一延長，大猩猩體型上同體力上嘅優勢就開始浮現。





面對對手接近三米嘅高度，梁sir一直只能攻擊到對方頸以下嘅位置，除非可以一拳打穿對方心臟，否則好難擊到要害。

於是為咗攻擊大猩猩嘅頭部，梁sir突然跳起身攻擊，只係估唔到對方嘅反應好快，一下子就縮低頭。

而且佢仲識得利用梁sir短暫騰空，身體無辦法移動呢一點，猛然擊出一下暴力嘅上勾拳，將對方打上半空，跟住自己再高高跳起，雙手合實，重重一鎚將梁sir從半空再打返落地下。

隻怪獸想乘勝追擊，我即刻衝過去幫梁sir解圍。

啊啊啊啊啊啊啊啊啊啊啊啊啊啊啊啊啊啊啊啊啊啊——





我一邊大嗌，一邊向前跑，同時發射離子炮。

雖然喺我身上都安裝咗擴音喇叭，可惜自從失過一次聲之後，我就嗌唔返之前咁大聲，加上依家有傷在身，就算嗌到盡，戰鬥力都只能突破到2000%。

升cup戰衣仍然只係銀色，變唔到金色。

剛才Z大俠同梁sir射出嘅離子炮，都只係勉強對大猩猩造成小部分傷害，我呢啲2000%力量嘅攻擊力，對佢嚟講更加只係𢯎痕。

嘭！嘭！嘭！大猩猩無視我嘅炮擊，將梁sir壓喺地下，左右手輪流出拳係咁砌。





我唔理咁多，衝埋去直接從後一劍劈落隻怪獸嘅背脊到。

把劍雖然拮到入肉，仲流埋血，但對方根本唔當呢啲傷係咩一回事。

佢一個快速轉身，左手重拳擊中我個肚，當刻我成個人飛起咗，點不知隻大猩猩右手將我扯返嚟，再用左手出拳毆多一次。

好痛！嗰種痛係痛到成身好似裂開咗咁，痛到我連嗌都嗌唔到出聲。

正常喺2000%戰鬥力下，升cup戰衣嘅防禦力比平時有所提升，但係我捱唔到對方三拳，身上保護腰、肚、心口嘅裝甲全部裂開曬。

而且嗰種劇烈嘅痛楚幾乎令我再一次休克。

大猩猩不留餘地，準備出向我擊出第四拳。

而就喺呢個時候，血流披面嘅梁sir跌跌撞撞咁企返起身：「啊啊啊啊啊啊啊啊啊啊啊——」





佢嗰件升cup戰衣有一半已經爛咗，全身都係血，兩對喇叭更加喺碎到連殘骸都唔見，所以只係得返佢一把沙啞嘅人聲，聲嘶力竭咁大嗌。

「大猩猩！你嘅對手係我啊——」

大猩猩鬆開手放開我，然後慢慢擰轉身。

梁sir作勢出手攻擊，大猩猩下意識用左手擋開，梁sir見對手出手擋，就將拳頭打開，用手掌捉住對方手臂一執毛，再用力扯甩佢啲毛。

大猩猩當堂痛到縮開咗。

事實上，梁sir受咗傷又成身血，基本上已經無力去攻擊，所以先會用呢啲看似有效，但其實傷害有限嘅招數。

佢一路掹，對方一路後退。





好快大猩猩就忍無可忍， 咬實牙關，死忍住一下痛，伸出左手捉住梁sir，右手使出全力，嘭一聲，一拳將對方從空曠嘅草地，打到佢背脊撞埋去座礦石山度。

梁sir由山腰碌落山腳，都未起到身，大猩猩就快步跑去山腳，食住個勢瘋狂重拳攻擊。

佢每一下都係出盡全力，每一下都係嘭嘭聲！

我掩住劇痛嘅身體，攤喺地下，向前遠望。我望唔到梁sir，只係見到隻猩猩嘅背影不停出拳。

佢力量之大，令成座山嘅岩石都受到牽連，逐一崩裂。

「啊啊啊啊啊啊...啊啊…啊…」

一開頭我仲聽到梁sir嘅大嗌聲，似乎想作出反抗，只係佢把聲好快就變得越嚟越細，細到我開始聽唔到。

最後慢慢得返重拳擊打嘅聲音。仲有，雨水滴落嘅聲音。





天空上嘅烏雲醞釀咗咁耐，終於喺呢一刻落起大雨。

嘀嗒嘀嗒嘀嗒嘀嗒嘀嗒嘀嗒嘀嗒...

大雨中，重拳擊打嘅聲音變得朦朧。

嘭…

嘭…

嘭…