每消滅一隻怪獸，我條女對波就大一個cup！: 43

可惡呀！真係可惡呀！！！

我強忍住痛楚，跌跌撞撞咁企起身，隨後帶住憤怒同不忿，打從心底發出吶喊：

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——

但無論我點嗌，都無辦法提升戰鬥力。

呢個時候，我先突然發現自己手上嘅變身手環爛咗，因此我原來不知不覺間已經解除咗變身。





嘭！嘭！嘭！大猩猩仲未肯停手。

當刻，我第一時間諗到嘅係行去Z大俠嗰度，攞走佢手上嘅變身手環，然後變身繼續作戰。

啱先Z大俠俾隻大猩猩打到瞓低，趴咗喺地下郁都唔郁，好似昏迷咗，結果呢一刻密集嘅雨點打落佢面上，似乎淋醒咗佢。

當我行到佢身邊嘅時候，佢咁啱擘大眼醒咗，然後跌跌碰碰咁企返起身。

佢件升cup戰衣又穿又爛，全身佈滿傷痕，雨水則不斷沖走鮮紅嘅血跡。





「嗰隻猩猩呢？」佢用沙啞嘅聲線問我。

我指住遠處崩裂嘅礦石山：「佢喺嗰度！」

「好，就等我地一齊消滅佢。」

Z大俠拆走頭上斷開一半嘅頭盔，然後同我講：「我右手甩咗骹，依家成隻手基本上已經廢咗郁唔到，你過嚟幫我㩒住頭頂嘅百會穴、」

「百會穴？」





「係，百會穴就喺頭頂正中線，作用開竅醒神、提振陽氣，你幫我㩒住呢個位，跟住我自己再用手指公㩒住條頸嘅廉泉穴，咁就可以將聲音發揮到最極致！」

Z大俠之所以可以嗌得咁大聲，秘訣原來就係打通穴道。

呢條友就好似電視劇嗰啲古裝大俠，打通任督二脈，練得神功。

一直以嚟，我地升cup戰士之間都係爭奪紫石嘅競爭對手，而呢個moment最重要嘅係打敗大猩猩，所以都無分你我，幫得就幫。

我行到Z大俠身後，伸出手指公，㩒住佢頭頂正中間：「係咪呢度？」

「唔係，再上啲。係！就係呢度！」

我用力㩒實Z大俠頭頂嘅百會穴，對方就用單手，㩒住自己條頸另一個穴位，同時間深深抖一啖大氣，集中全力，嗌！

哼啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——





佢嘅聲音穿透四周，分貝力突破咗一個新嘅高度。

Z大俠一路嗌到聲嘶力竭，但與此同時，我見到佢兩邊耳仔嘅耳窿入面，竟然有血流出嚟。

「你…你耳仔入面流血？」

「百會穴係陽氣最盛之處，當用力刺激嘅時候，好容易引致虛陽上越、經絡紊亂，所以流血係好正常。」

「咁你會唔會有事？」我問Z大俠。

「放心，死唔去嘅，你繼續大力㩒落去就啱架啦！哼啊啊啊啊啊啊啊啊啊啊啊啊啊——」

雖然我企喺佢後面，但都完全感受到佢所發出嘅音波，喺四方八面震動迴蕩。





隨住戰鬥力急劇上升，佢原本破爛不堪嘅升cup戰衣，慢慢自動縫合。

除此之外，戰鬥甲嘅顏色唔再係金色，而係最初形態嘅黑色。

不過同最初形態唔同嘅係，裝甲上面嘅機械紋理以及關節間嘅空隙，散發出好似彩虹一樣嘅光芒。

黑色嘅鋼鐵裝甲，投射彩虹光線，我相信呢一個就係比起金色戰衣更高一級嘅形態。

當戰鬥甲完全成形之後，嗰股強勁嘅氣場直接令我成個人彈開咗。

身上散發虹光嘅Z大俠，一人企喺滂沱大雨之中。

遠處嘅大猩猩好快就感應到呢股前所未有咁強大嘅力量。

佢擰轉身，冒住大雨，一邊拍打住心口，一邊從礦石山急速向我地呢邊衝埋嚟。





雖則Z大俠升cup戰衣嘅力量，依家突破咗一個全新嘅高度，問題係佢本人身上嘅傷，並無好似升cup戰衣咁識得自動復原。

佢嘅右手甩咗骹就依然都係甩骹，所有嘅傷所有嘅痛，都令佢作戰能力大減。

於是，佢決定將所有力量，集中喺一次嘅攻擊。