每消滅一隻怪獸，我條女對波就大一個cup！: 49

戰鬥始終都係有危險，老實講，我其實唔係好放心俾Yanny參與戰鬥。

只不過，既然佢已經變咗身，咁我都無謂阻止。

「啊啊啊啊啊啊啊啊啊啊啊啊啊啊啊啊啊啊啊啊啊——」

同我地所有升cup戰士一樣，Yanny一嚟就大嗌，試圖用最快嘅速度提升戰鬥力。

之前我失咗聲，叫過佢幫我錄音代嗌，當時仲俾隔籬屋個阿嬸投訴。





家陣Yanny用返同樣嘅音量嗌返出嚟，喺無喇叭嘅輔助下，戰鬥力竟然突破到1000%，連隨佢嘅升cup戰衣都變成咗銀色。

我地一齊聯手嘅話，話唔定有機會合力打得低隻怪獸。

𡁻𡁻𡁻𡁻𡁻𡁻𡁻𡁻——

Yanny開炮遠攻，集中火力，射隻嘢個頭，我就揸住長劍，埋身攻擊。

鏘！鏘！鏘！對方嘅巨型大鉗同我手上鋒利嘅合金劍，激烈對碰交鋒。





但以我依家既戰鬥力，最多只係可以同敵人打成平手。

我需要更多更多嘅力量！

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！

我再試下用之前練習過嘅方法大嗌，只不過都係無辦法提高到音量。

事實上，練習同實戰嘅感覺好唔同。





喺實戰中，當你面對住敵人，就要作出攻擊同閃避，身體不停咁郁，於是打亂曬呼吸嘅節奏，根本無辦法掌握到「共鳴點」。

呢一刻，我地成班升cup戰士無一個能夠突圍而出，戰鬥陷入咗膠著狀態。

如果再拖落去，Z大俠一嚟到，最後又係俾佢秒殺，收割紫石。

哼啊啊啊啊啊啊啊！！！！！！！

唉！唔係呀嘛！一講曹操曹操就到！

Z大俠一把聲貫穿成個沙灘，條友一出場就直線發射出強勁嘅衝擊波。

金色嘅衝擊波喺我地身邊一閃而過，捲起一陣強風，吹起沙灘上萬千嘅沙粒。

隻蝎子為咗保命，竟然壯士斷臂…





唔係，應該係壯士斷「尾」，佢烏低身，將條帶毒刺嘅蝎子尾伸向前，以己之矛，硬撼Z大俠嘅攻擊

但喺力量上，Z大俠當然係更高一籌。

Boom一聲！猛烈嘅衝擊波一瞬間就打斷咗蝎子條尾。

隻嘢慘叫咗一聲，之後就跳曬掣，發咗癲咁用佢兩隻巨型嘅大鉗，不停用力撥起沙灘上面嘅沙。

我地在場咁多升cup戰士包括Z大俠在內，完全無估到隻嘢竟然會出陰招。

升cup戰衣無面罩遮擋，結果我地全部人都吹沙入眼。

對眼又痕又痛，想擘大都擘唔大，視線因此而受阻。





跟住隻怪獸就趁呢個機會攻擊我地。