每消滅一隻怪獸，我條女對波就大一個cup！: 57

嗰班反Z聯合軍手上最強嘅武器，就係發出噪音嘅干擾器。

因此我同Yanny一出招，就係先發射離子炮，瞄準嗰啲干擾器作出攻擊。

有過咁多次戰鬥經驗，我地眼界非常準，幾乎一出手就擊中。

嗰班聯合軍淨係顧住折磨Z大俠同W女郎，完全無防備我地會突然偷襲，於是俾我地接連射出離子炮，成功破壞曬嗰啲聲音干擾器。

一無咗啲噪音騷擾，Z大俠就即刻「翻生」！





啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——

佢極度憤怒，向天咆哮大嗌，力量急速突破。

喺短短一瞬間，佢身上嘅升cup戰衣由金色變返黑色，並閃耀出彩虹色嘅光芒。

繼上次大猩猩一戰之後，佢再一次突破升cup戰衣嘅第三形態。

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——





從佢嘅咆哮聲聽得出，佢呢一刻真係好嬲。

之前我見識過佢第三形態嘅威力，於是拿拿臨拖住Yanny行遠啲。

隨後Z大俠釋放出無比強大嘅力量，佢嗰股力量甚至強大到連遠處嘅隻蜈蚣都俾佢震開咗。

喺剎那之間，佢由正義大俠變成狂暴野獸。

砰砰砰砰砰砰砰砰砰！





Z大俠用快到無影嘅拳頭同飛腳，以一敵眾，瘋狂攻擊嗰班反Z聯合軍。

嗰廿幾個升cup戰士嚇到瀨尿，完全無還手之力，佢地逐一俾Z大俠打到一仆一碌、頭破血流。

講真，呢班人人多嚇人少，真係唔抵可憐。

Z大俠打到班友落花流水，個個都冧低曬。

只不過同上次一樣，佢咁樣爆seed，令穴位受到過度刺激，因此而出現反效果，口同鼻都出血。

見到W女郎過去傍住佢，咁我同Yanny都覺得可以功成身退，可以專心對付返隻大蜈蚣。

隻怪獸仲未死，兼且應該已經殘血。

我同Yanny正準備儲氣大嗌，出招消滅佢，點不知突然之間，一個身披金色戰鬥甲嘅升cup戰士，從天而降。





佢揮動手上閃爍金光嘅合金劍，從高空順勢向住大蜈蚣飛身一斬。

劍光一閃，本身殘血嘅蜈蚣一嘢俾佢斬斷咗個頭，當場斷氣身亡。

開頭我以為呢個從天而將嘅升cup戰士係Z大俠，但我擰轉頭望一望，見到對方同W女郎都仲回緊氣。

咁...呢個手刃蜈蚣嘅升cup戰士係邊個…

我同Yanny仔細一望，然後嚇咗一跳?！

下...唔係呀嘛....呢個人竟然係梁sir嘅未婚妻…Judy？

我地兩個即刻再行近望真啲，發現自己真係無眼花，呢個著住金色戰衣嘅升cup戰士，真係Judy！





佢收起把劍，並解除變身，然後將殺死怪獸所得到嘅紫石，交到晴天博士手中。

我同Yanny望住Judy，驚訝到講唔到嘢。

我地估都估唔到佢竟然會出現喺戰場上面？！

點解佢會變身嘅？

好快，晴天博士就用紫石配製好豐胸丸。

Judy擘大口，吞咗粒藥丸，幾秒之後，佢對波就漲起，變大咗一個cup。

好奇疑惑嘅我行過去問佢：「Judy…點解你會喺度嘅…」

「無呀，以前成日聽嗰個傻佬講，佢話D cup同E cup爭好遠喎，咁我咪好好奇，大一個cup究竟係咪真係爭咁遠？」





Judy講完呢句，跟住雙手揸咗一下自己心口對E奶，然後苦笑一聲：「哈…其實都唔係爭好遠啫，咪又係一堆脂肪，揸落去軟淋淋咁樣，真係唔明點解個傻佬係都要咁堅持揸E奶。」

Judy口中講緊嘅「傻佬」就係梁sir。

無估錯嘅話，佢呢刻手上戴住嘅應該係梁sir嘅變身手環。

「其實啲怪獸真係好得人驚，我等咗好耐先等到呢個機會...哈...又真係估唔到，咁都俾我成功偷到雞消滅到隻怪獸...但到我依家終於變成E奶...不過好可惜…個傻佬已經唔喺度…」

Judy露出苦澀嘅笑容，喺佢空洞嘅眼神中，流露住深深嘅哀傷。

佢之所以會變身成為升cup戰士，應該就係為咗完成梁sir生前未完成嘅心願。

唔知梁sir在天有靈見到Judy依家終於變成E cup，會唔會覺得心滿意足？





諗起逝去嘅愛人，Judy揸住自己對波，面上一副黯然嘅表情。

本來我同Yanny想講啲說話安慰佢，只不過對方就笑咗一笑，故作瀟灑咁向我地揮手道別，然後摸住手腕上嘅變身手環，靜靜咁轉身離開。

我地兩個就係咁目送對方離開嘅背影，自此之後，亦都再無見過佢。