每消滅一隻怪獸，我條女對波就大一個cup！: 61

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！

Z大俠谷恆全身嘅肌肉，雙手握緊拳頭，用最盡佢可以發出嘅聲音，全力吶喊。

呢一次，佢把聲俾頭先嗌得更響更高昂，相信方圓百里之內都聽得到佢呢股咁強勁嘅音波。

我同Yanny雖然同佢隔咗幾十米嘅距離，但都頂唔順，要用手掩住耳仔。

隨住分貝力突破再突破，Z大俠戰鬥力亦都提升再提升！





佢件升cup戰衣俾彩虹光完全遮蓋，保守估計，佢呢刻嘅戰鬥力一定唔少過8000%。

見到Z大俠咁嗌法，隻融合獸亦都唔輸蝕，佢向天發出一聲狼叫，並且用拳頭大力敲打地面，展示自己非凡嘅野性力量。

咚！咚！咚！佢每揼一下地，地下就劇烈震動一下，我同Yanny幾乎企唔穩，爭啲仆低。

而Z大俠就趁呢個機會出手。

佢以比閃電更快嘅速度，飛身出劍。





我地肉眼睇唔到佢嘅攻擊動作，只係見到半空中劃出一道彩虹，閃過一道劍光。

Z大俠飛到半空，向住敵人嘅狼頭揮劍攻擊。

不過隻融合獸動作都好快，第一時間用雙手護頭隔擋。

銳利嘅合金劍不斷凌空揮斬，然而敵人一副大黑熊嘅軀體，非常之結實，儘管Z大俠已經毫不留手，瘋狂攻擊，但一時間都無辦法破開對方嘅防禦。

最可怕嘅係，隻怪獸仲可以一邊護頭防禦，一邊可以作出還擊。





佢尾後條大蟒蛇靜靜雞伸個頭出嚟，然後突襲對手。

好在Z大俠反應都夠快，立即喺半空閃身避開。

可惜就喺佢分心呢半秒間，融合獸把握住機會，轉守為攻。

好似拍蚊咁，隻怪獸一隻熊掌摑埋去，將Z大俠從半空中狠狠打落地面。

下一秒，Z大俠成個人從摩天輪嘅位置直衝墜落到附近嘅中環碼頭。

喺佢跌落嚟嗰下，佢嘅身體就好似炮彈咁，撼穿咗碼頭成個屋頂，可想而知，隻融合獸啱先嗰一掌嘅威力係幾咁可怕。

W女郎神情驚慌，立即跑過去碼頭，睇下Z大俠有無事。

反觀我從頭先到依家，都只係企咗喺度，一直唔敢出手。皆因繼大猩猩之後，我喺呢隻三合一體嘅融合獸身上，感受到一股濃烈嘅死亡氣息。





事實上呢隻怪獸比大猩猩犀利十倍，同佢戰鬥真係隨時會死。