每消滅一隻怪獸，我條女對波就大一個cup！: 62

我一方面好想打敗隻怪獸，攞到三粒紫石，但另一方面我又感到恐懼。

同時我亦都好清楚，機會就得返最後呢一次。

假如喺呢個時候我先嚟縮沙，唔盡力一搏嘅話，咁我將來一定會後悔。

我唔想錯過機會，我唔想俾自己後悔，我唔想我第日老咗怨恨自己，無曾經為G奶搏命爭取過。

呢一刻喺腦海入面，我諗返起梁sir講過嘅說話，然後自己同自己講：係真男人就唔應該喺巨乳面前退縮！





「呼…」

於是，我深呼吸一口氣，令緊張嘅心跳稍微放慢。

跟住我就運用腹式呼吸加上頭胸鼻三點共鳴，擘大喉嚨使出全身嘅力大嗌：

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

喺同一時候，啱先被打倒嘅Z大俠，從瓦礫堆中慢慢企起返身。





佢血流披面，身上嘅裝甲破敗不堪，但就算係咁，佢都依然選擇繼續作戰，甚至唔理後果，用銀針刺激頭頂嘅穴道。

佢咁做只有一個目的，就係要打敗怪獸，實現自己嘅Z cup夢想。

坦白講，佢嗰一份對Z cup巨乳嘅瘋狂執迷，實在深深打動咗我，令我忍唔住都好想佢咁，不顧喉嚨撕裂，瘋狂大嗌。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

我一路嗌，一路感受到力量不斷湧現，同時聽到升cup戰衣發出力量提升嘅聲音：





「Max Power：4600%！」

「Max Power：4700%！」

「Max Power：4800%！」

「Max Power：4900%！」

眼見力量就嚟突破5000%，身上嘅升cup戰衣亦開始出現彩虹色嘅光芒。

點不知呢個時候，隻融合獸居然先發制人，突然出擊。

佢舉起兩個超大嘅拳頭，用力揼落個地下度，結果喺短短幾秒間，直接令喺我地附近一帶嘅地面出現地陷。

我地四個人反應唔切，一嘢跌咗落個坑度。





然之後，隻怪獸向上高高跳起，佢想用自己巨大嘅身形砸落嚟我地度。

睇見龐大嘅身影掠過頭頂嘅天空，我抱住Yanny，Z大俠就抱住W女郎，大家用最快嘅速度跳出個坑。

半秒後，咚一聲！隻怪獸成份砸落嚟，造成一下劇烈嘅地震。

好好彩，我地啱啱好避開咗，如果頭先速度稍微慢少少，應該已經被砸到變柿餅。

Awoooooooooh~

融合獸得勢不饒人，佢狼叫一聲，揮動兩隻大黑熊「鐵砂掌」，向我地窮追猛打。

我同Z大俠正面迎擊，Yanny同W女郎就一邊避，一邊喺外圍發射離子炮遠攻。