每消滅一隻怪獸，我條女對波就大一個cup！: 63

我嘅戰鬥力仲爭少少就可以突破5000%。因此我一邊埋身攻擊，一邊繼續大嗌。

與此同時，隻融合獸就越戰越勇。

佢掌影疾閃，掌力如山，加上一口鋒利嘅狼牙同尾部嗰條邪惡嘅大蟒蛇，三點攻擊，可以話一啲破綻都無。

睇嚟頭先隻嘢只係熱身，依家嘅佢先使出真正嘅實力。

我唔理咁多，飛身一撲，用長劍喺佢腰以下嘅位置凌厲劈斬。





雖然每一劍都擊中佢嘅身體，但好可惜我嘅戰鬥力不足，無辦法對佢造成太大傷害。

明明只係爭100%就可以升級成彩虹戰士，但偏偏就係突破唔到，而且一邊戰鬥一邊大嗌，會令體力消耗得特別快。

就當我體力下降，手腳稍微變慢咗，隻怪獸就出其不意，一拳盅埋嚟，將我成個人撞到飛起。

至於喺另一邊廂，變成超強彩虹戰士嘅Z大俠，一開始喺對戰中其實係佔據上風。

佢選擇用速度去壓制敵人，以快如流星嘅速度揮劍攻擊，以小博大。其劍法激烈無比，每一式、每一招都氣勢逼人。





嗰隻融合獸開頭都招架唔住，頸同手臂都俾Z大俠斬出傷痕，流出紅色嘅鮮血，甚至仲爭啲俾對方將嗰條大蟒蛇斬落嚟。

本來Z大俠嘅勢頭一直都好好，問題係佢一直以嚟為咗增加戰鬥力，過度刺激穴位，因此而造成嚴重嘅內傷。

結果佢喺戰鬥嘅過程中突然吐血，最後俾隻怪獸有機可乘。

嗰條兇惡嘅大蟒蛇纏上去，用身體綁住Z大俠。

身負內傷嘅Z大俠無辦法用力掙脫，完全俾敵人鎖死咗。





睇見男朋友有事，W女郎作為女朋友，當然係不顧一切衝過去拯救對方。

只可惜，佢都未埋到身，就已經俾隻怪獸一腳用力踢開咗。

Z大俠見到女朋友受傷瞓咗喺地下，憤怒值當堂急速飆升。佢擘大喉嚨，歇斯底里咁大叫大嗌，並且出盡力氣，不斷掙扎。

啊啊啊啊啊啊啊啊啊啊啊啊啊啊啊…咳…咳咳咳…

只不過嗌嗌下，佢頂唔順再咳出鮮血。照咁睇嚟，佢嘅身體已經到咗極限。

我同Z大俠大家都係為巨乳而戰嘅升cup戰士，望見對方有難，我都唔忍心袖手旁觀，見死不救。

「Yanny，你幫佢引開隻嘢嘅注意力，我喺後面突襲佢！」

「好！」





我叫Yanny瞄準住隻融合獸狼頭，發射離子炮集中攻擊，借此分散敵人嘅注意力，而我就趁機會繞到隻怪嘅身後，對付條大蟒蛇。