《I miss U》: 11 佈置

她捉著我走到門外。

「喂！好重呀你！」她一直走一直埋怨。

「重你又拖？」我忍不住笑著問她。

「我鍾意咪拖，你理得我！」

「小姐你拖緊我喎！點解唔理得！」





「哼！唔拖囉，如果唔係見你唔開心，我實鬧到你飛起。」她鬆開手。

「無所謂，我都想試吓飛起。」

「哈！好好笑呀！」

「哇，冬皓辰，咁sweet得唔得架？你咁開心即係冇事啦。」一直在門口等著的阿耀忍不住說。

「收聲啦！白卡耀！」我說。





「季節cp好令人羨慕呀～」阿耀繼續説。

「收聲啦！再嘈鬧埋你呀。」若真目標轉向阿耀。

「好驚呀！你哋兩個一唱一和，點夠你哋鬥。」他說。

小莉和阿軒也收拾好書包跟上了。

「好啦！我哋人齊就出發！」阿軒說。





「『宇宙天團』全員回歸！正式再出發！」阿耀大叫。

我們苦笑著，現場只有他一個不尷尬。

—回到現在—

餐廳內的環境很舒適，我們一邊吃東西一邊聊天。

「咁耐冇見，令我諗返起你當年返嚟考試嗰日，我哋『宇宙天團』重聚嗰日。」小莉說。

「可惜今日唔齊人。」阿耀説。

「真係好掛住嗰陣嘅日子。」我說。

「仲有我哋之後一齊整嗰個聖誕佈置。」曉楠說。





「講起嗰個佈置就諗返起做咕喱係幾咁辛苦，明明我唔係你哋班。」阿耀説。

「但係你辛苦得嚟都好開心呀。」我說。

「估唔到嗰個係我哋一齊搞嘅第一次亦都係最後一次活動。」小莉說。

「佢哋兩個衰人咪估到囉！新年得我哋同阿軒三個搞，鬼咁辛苦。」曉楠指著我和阿耀說。

「無計，我要溫書考DSE呀，要鬧都係鬧阿辰啦！」阿耀解釋。

「唉，我都冇辦法，衰嘢唔講啦，我哋乾杯先啦！」我説。

「乾杯～」





——

「乾杯～」

黃昏時分，課室內五人各自舉著一罐可口可樂在「碰杯」。

「慶祝我哋成功採購物資，仲有預祝我哋拎最佳聖誕佈置獎！」阿耀歡呼著。

「你唔好燈先啦！」我說。

五人大笑著。

就這樣，我們正式開始佈置課室。

懂得藝術的若真和阿軒，是我們的指揮，負責設計和繪畫。





小莉則負責一些簡單的剪裁及黏貼工作。

至於我和阿耀，自然是不可或缺的苦力。

但因為我們都仍有校隊訓練和課外活動，導致佈置進度也不如理想。

兩個星期過去，佈置只完成了約一半。

那些日子很開心，大家聚在一起，也有些日子與若真一起放學。

我們無所不談，越來越了解彼此。

似乎忘記了自己快要離開的事實，或是明白了要好好珍惜剩下的時間。





直至聖誕聯歡會的前一天的黃昏，我們仍在努力趕工。

「今日係成個月以嚟第三次齊人！好嘢！拍手！」阿耀又在大叫。

「快啲開始！趕唔切啦！」若真急起來說。

「係，真係要認真整埋。」阿軒認真地說。

「支持！建議白卡耀收聲。」我插話。

「認同。」小莉説。

「好！小莉，你話乜就乜。」阿耀說。

平日的他會反駁我們，但大難當前，加上小莉的話，他也少有的認真起來。

我們分工合作，各自埋頭苦幹，一直佈置到入夜。

「大家！我哋終於搞掂晒！」阿軒宣布。

「好嘢！」我們一起歡呼。

「我哋執埋啲嘢收尾就走得！」若真説。

阿耀看了看手錶，說：「哇，已經八點啦，小莉你係咪要走先？」。

「係吖，唔好意思大家。」小莉說。

小莉家管得比較嚴，留校到八點已經是極限。

「無所謂啦，咁阿耀你送佢返去先，少少嘢我哋三個都執到。」阿軒説。

「辛苦晒喇，聽日見～」他們說。

課室內剩下三人。

「呢啲嘢要拎返落去視藝室。」若真說。

但她臉色不太好。

「喂，你有冇唔舒服，面青口唇白嘅？」我問她。

「冇事，可能血糖低啫。」她說。

她看起來呼吸也有點不順。

「咁你唞下，我一個人拎落去啦。」我説。

「出面熄晒燈咁滯，兩個人去好啲。」阿軒說。

「夏若真，你同我落去啦！皓辰，你執下啲雜物，同埋留喺度睇住，我驚等陣保安叔叔見課室無人會鎖門。」他接著說。

「好…」我有點疑惑但也只好答應。

怎麼不是留不適的夏若真在這休息，那些東西一個人也能搬下來，為何要她白走一趟。

感覺他們在隱瞞一些事情。

他倆的背影走遠，我才發覺其實他們挺相襯的，郎才女貌，心中頓時有些奇怪的感覺。

十五分鐘後，聽見走廊傳來聲音，是他們回來了。

我探頭看看，只見若真本來挽著阿軒的手臂，但立即又鬆開了。