主角 / 配角: 十年後．威士忌的餘韻
中環雲咸街，一間連招牌都唔多覺眼嘅 Whisky Bar。燈光暗到好似驚死人見到大家個樣咁，又或者，係為咗遮掩大家臉上面嘅歲月痕跡。
我早到咗。
坐喺張皮梳化度，我望住個 Menu，心入面暗自「嘩」咗一聲。一杯最普通嘅 Macallan 12年，都要幾百蚊？未計加一。我下意識摸一摸個銀包，再摸一摸個肚腩，感覺兩樣嘢都令我有種沉重嘅負擔。
十年前，喺宿生會嘅 Common Room，我哋幾個人圍住幾罐由 Joy 負責去超市掃返嚟嘅特價可樂，就可以吹成晚水，由理想講到愛情，由哲學講到邊個系嘅女仔最正。
「先生，想飲啲咩？」個 Bartender 走埋嚟問。
「畀杯水我先，等埋朋友。」我扮鎮定。
以前我哋飲住幾蚊罐嘅汽水，可以傾成晚理想；而家飲住幾千蚊支嘅威士忌，大家反而只係識得傾邊隻基金回報高啲。原來成長，就係將所有野都標上價錢嘅過程。連聚舊，都有個入場費。
終於齊人。
Jerry 行入嚟嗰陣，我差啲認唔出佢。以前嗰個浪子頭唔見咗，取而代之嘅係向後移咗兩吋嘅髮線，同埋手腕上嗰隻金光閃閃嘅撈。佢係今晚嘅搞手，聽講剛剛離咗婚，正處於一種「報復性消費」嘅狀態。
「喂！阿強！你個肚腩仔好養眼喎！」Jerry 一坐低就大聲講，完全無視呢度嘅格調。
跟住係 Michelle 同 Joy。
Michelle 行入嚟嗰一刻，空氣入面嗰陣淡淡嘅霉味即刻唔見咗，變成咗一種昂貴嘅 Chanel No.5 味道。佢保養得極好，皮膚依然白滑，但眼神冷咗好多。如果話以前佢係一朵等人摘嘅茉莉花，而家佢就係一朵用玻璃罩住嘅永生花——眼看手勿動。
至於 Joy，簡直係脫胎換骨。以前個跟尾狗師妹，而家著住套 sharp 醒嘅西裝，一坐低就放低兩個電話，眼神銳利到好似隨時要炒人魷魚咁。
「大家都冇變喎！」 「你就好啦，聽講升咗職？」 「阿強，你個仔幾大話？」
大家開始交換呢啲毫無營養嘅客套話。我偷偷望向 Michelle 放在枱面嘅手，手指公無名指上面戴住隻好大嘅鑽石戒指，閃到我隻眼有啲痛。
我嘗試搵返十年前嗰晚嘅感覺，借住酒意問：「喂，你哋記唔記得十年前喺 Hall 打邊爐嗰晚？嗰陣 Jerry 講鬼故嚇到 Michelle 喊嗰單嘢？」
全場靜咗一秒。
Michelle 只是淡淡笑咗一下，優雅咁呷咗啖酒：「係咩？太耐以前嘅事，唔記得啦。」
Joy 更加直接：「阿強師兄，以前啲瘀野唔好提啦。講下你層樓供成點好過啦。」
我個心沉咗一沉。原來嗰段我珍藏咗十年、甚至用嚟做性幻想素材嘅回憶，對佢哋嚟講，只係一粒過期嘅塵埃。
酒過三巡，那支貴到飛起嘅威士忌已經去咗一半。酒精開始溶化大家嘅面具。
Jerry 飲多咗兩杯，開始呻佢前妻分咗佢幾多身家。Joy 就開始鬧佢公司啲下屬有幾廢。氣氛開始變得真實，亦都變得殘酷。
突然，Michelle 望住 Jerry，眼神入面閃過一絲我未見過嘅幽怨。
「其實...」Michelle 轉住手中嘅酒杯，冰塊撞擊發出清脆嘅聲響，「嗰晚喺宿舍，我一直等緊 Jerry 開口。」
我愣住咗。「嚇？開咩口？」
Michelle 苦笑，眼尾掃咗我一眼，但焦點唔喺我度：「嗰晚 Jerry 你講鬼故，我專登扮驚撲埋你度。點知你條死蠢推開我，仲要拉阿強落水做擋箭牌。」
轟隆。
我腦海入面嗰個「0.01公分」嘅美麗誤會，瞬間崩塌。
原來十年前，當我以為 Michelle 嘅手背輕輕掂到我、甚至勾我手指係對我有意思嘅時候... 其實佢只係想藉住我，去試探 Jerry 嘅反應？又或者，佢根本就當我係透明，佢嘅注意力一直喺我身後嘅 Jerry 身上？
我個心離一離，好似坐過山車去到最高點突然衝落嚟咁。
阿強呀阿強，你唔單止係兵，你仲係兵器。被人利用咗十年，仲要自己喺度沾沾自喜。嗰個美好嘅曖昧回憶，瞬間變成一個笑話。
氣氛變得極度尷尬。Jerry 呆咗，Joy 望住我，眼神帶點憐憫（定係嘲笑？）。
「咳...」Jerry 始終係老江湖，佢好快打圓場，舉起酒杯，「算啦！如果當年我哋真係一齊咗，可能而家你同我前妻一樣，喺法庭同我爭緊撫養權咋。」
大家都笑咗，雖然笑得有啲勉強。
Michelle 放低酒杯，輕輕拍咗一下我膊頭。
這一次，係實實在在的觸碰。冇曖昧，冇電流，只有一種成年人對失敗者嘅安慰。
「阿強，都過去啦。最緊要大家而家過得好。」佢嘅聲音好溫柔，但聽落好刺耳。
我吞咗啖威士忌。辛辣嘅液體經過喉嚨，乸住乸住，好似人生嘅味道。我望住佢哋，突然覺得自己好渺小。但我都係舉起杯：「係呀，為咗錯過，乾杯。」
「Last Order 啦喎。」Bartender 走過嚟趕客。
我以為今晚就咁完。大家各自截的士，返去面對自己嘅老婆、仔女、或者空虛嘅豪宅。
點知 Jerry 意猶未盡，佢望住兩個女仔，眼神回復咗以前嗰種獵人嘅光芒：「喂，咁早返去對住四幅牆咩？我剛剛搬咗去半山，個景好靚，我有支好正嘅 Single Malt 私伙。點睇？」
我本能反應想話：「唔好啦，聽日要返工。」
但 Michelle 竟然眼睛一亮，撥一撥頭髮：「好呀，反正我聽日放假。」
Joy 亦都笑得好古惑：「半山喎，未去過喎，去參觀下都好。」
三個望住我。
Jerry 拍一拍我膊頭：「阿強，唔係要趕返去交人呀嘛？男人老狗，唔好咁掃興啦。」
我摸一摸褲袋入面個電話，老婆無搵我。再望一望 Michelle 條頸，同埋 Joy 嗰對著住黑絲嘅長腿。
那一刻，我心入面嗰個「小男人」同「魔鬼」同時點頭。
「去囉，驚你呀？」我答。
就係咁，我跟住佢哋行出酒吧，上咗的士。明明知道前面係一個更加危險嘅深淵，但我竟然有一種... 久違了嘅期待。