【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第四十一章：部署分手與騎牛搵馬

「但我點講呀？」我攪拌住杯咖啡，「無啦啦講分手，佢一定發癲，又喊苦喊忽咁，好煩㗎。」
靜靜托住下巴，眼神變得深不可測，好似諸葛亮上身咁。
「你知唔知，女朋友嘅好姊妹，永遠只會勸分不勸和？因為我哋係睇得最清嘅。」
佢伸出一隻手指搖咗搖。
「唔好直接講分手住。直接講，你變咗罪人，係你變心。」
「咁點呀？」
「要逼佢講，或者逼到佢犯錯。」靜靜露出一個狡猾嘅笑容，「由今日開始，你要實行『冷暴力』同埋『挑骨頭』政策。」

「即係點？」
「第一，唔好主動搵佢，佢搵你，你隔幾個鐘先覆，覆得越短越好，用『哦』、『嗯』、『係囉』去打發佢。」




「第二，佢做錯少少嘢，你就無限放大。例如佢遲到一分鐘，你就發脾氣話佢唔重視你；佢講錯一句說話，你就話佢唔了解你。」
「第三，拎佢同人比。當然唔好講阿浚，講下啲虛構人物或者韓星，話人哋幾溫柔幾大方，暗示佢幾廢。」
靜靜講得頭頭是道：「只要你令到佢覺得同你一齊好大壓力，好辛苦，佢自然會頂唔順。到時一係佢主動講分手，一係你就有藉口話『我哋性格不合』，順理成章分手，乾手淨腳。」

我聽完，簡直想拍爛手掌。
「高招！真係高招！」
「記住呀，」靜靜補多句，「喺未正式分手之前，阿傑嗰邊就放埋一邊先，當係後備胎。萬一阿浚嗰邊有咩差池，你都仲有個阿傑墊底嘛。雖然係 Junk food，但好過餓死。」
我點點頭，心入面個方向盤已經揸得好穩。
我而家有方向啦。
目標：阿浚。




策略：冷處理阿傑，等待時機，製造藉口。

第四十五章：甜蜜的罪惡感

同靜靜食完 tea，我成個人鬆晒。
既然軍師都批準咗，我仲有咩好顧慮？
返到屋企，我即刻將阿傑個 WhatsApp notification mute 咗。
眼不見為淨。

夜晚，我匿入房，又開始同阿浚 text。




浚：「今日做咩呀？冇出街咩？」
我：「冇呀，同個好姊妹去食咗個 tea 囉，傾下女仔心事。」
浚：「心事？係咪關於感情問題先？」
佢好似有讀心術咁，一問就中。
我：「係呀……唉，都係嗰啲啦，覺得同男朋友行唔落去，好煩惱。」
我順勢賣慘，鋪排定我即將回復單身嘅劇情。

浚：「傻瓜，唔好諗咁多啦。唔開心嘅話，早啲瞓啦，聽日仲要返學，聽日有數學拔尖堂呀，最多聽日再買零食俾你啦！」
我：「真係㗎！！？」
浚：「梗係呀，傻豬豬，唔買俾你買俾邊個啊？」
睇到「傻豬豬」三個字，我個心融化咗。
比起阿傑嗰啲「食咗飯未」、「早啲瞓」，阿浚嘅進攻簡直係快狠準。

我：「好啦，見你咁誠意，本小姐就恭敬不如從命啦。」
浚：「Yes！咁而家快啲瞓覺覺豬啦！早唞傻妹！」





放下電話，我望住天花板，心情好到想唱歌。
雖然我知道我咁樣做對阿傑好似有啲殘忍，甚至係所謂嘅「派帽」。
但係愛情係自私㗎嘛。
人望高處，水向低流。
既然有個又高大、又溫柔、又似我初戀嘅男神出現，我點可以唔把握機會？
阿傑，要怪就怪你自己唔爭氣，怪你自己係「Junk food」啦。

我閂咗燈，抱住個枕頭，腦入面全部都係聽日同阿浚嘅畫面。
至於阿傑 send 嚟嗰幾十個 message？
聽日 update iOS 99.0 囉。