【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第六十四章：消毒水味的懺悔

廣華醫院嘅急症室永遠充斥著焦慮嘅味道。

我喺候診區搵到左子欣。佢比我想像中更瘦小，染著一頭褪色的金髮，穿著唔啱身oversize tee，臉上掛著淚痕，睇落就似個偷著大人衣服嘅細路女。

「你係 Hiu Ching？」佢抬起頭，眼神裡帶著敵意，也帶著恐懼。
「阿傑呢？」我冇心情同佢寒暄。
「醫生話斷咗兩條肋骨，爆咗眼角，而家照緊腦。」子欣吸左吸鼻，聲音帶住哭腔，「係我害咗佢…但我真係冇諗過我條仔啲兄弟會咁癲...」

原來，嗰日阿傑被金毛強扶著喺尖沙咀海傍時，佢住左三晚醫院啱啱出院，當時情況算穩定左，之後可以返屋企休養下都得。
但係過幾日，金毛強喺機舖撞到打阿𠎀果兩個𡃁仔，咁金毛強起初諗住嘈佢兩個幾句，點知佢哋去咗後巷起衝突。阿傑知金毛強出咗事，顧唔上自己嘅傷口係咪癒合與否，就衝左出去幫拖。本身就虛弱嘅佢比人打多兩打就直接暈低咗。金毛強自己都口腫面腫，但係佢係古惑仔又唔想報警，咪叫左子欣送佢哋嚟醫院。





「佢一直叫住你個名。」子欣突然講，語氣裡帶住一種不甘心嘅嫉妒，「就算痛到暈低，佢都係叫住HiuChing 。」

我愣住了。

呢個時侯，護士推住病床出嚟。阿傑瞓喺上面，臉腫到成個豬頭咁，眼睛瞇成一條線，身上插著喉管。嗰個曾經為左6蚊雞同我AA制嘅男仔，嗰個被我視為過期罐頭嘅男仔，呢一刻脆弱到好似一張紙。

我行過去，輕輕叫左一聲：「阿傑。」
佢好艱難咁睜開眼，視線模糊地咁對焦。當佢睇清楚係我時，嗰張腫脹嘅臉上竟然扯住咗一個極其難睇嘅笑容。





「Hiu Ching…你嚟啦？」佢把聲沙啞微弱，「對唔住呀…嚇親你…」呢一刻，我一直以嚟嘅所有高傲、所有虛榮、所有自以為是嘅優越感，瞬間崩塌。
我望住佢，眼淚唔受控制地決堤。唔係因為愛，而係因為愧疚。徹頭徹尾嘅愧疚。我利用左佢嘅感情來療傷，我冷暴力佢，我為了追逐嗰個虛偽嘅阿浚而狠狠地拋棄左佢。而佢，喺被打到咁樣嘅時候，第一反應竟然仲係同我道歉。

「你個傻仔.....」我捉住佢嗰隻粗糙的手，指甲縫裡依然有啲污垢，但我唔再覺得污糟，「你做咩唔話我知？」

「我廢嘛。」他自嘲咁笑左一笑，「我知你想搵個好啲嘅…阿浚…佢對你好唔好？」呢句說話好似一把尖刀，狠狠咁插入我嘅心臟。

好？嗰個只想帶我去時鐘酒店嘅阿浚？嗰個嫌我未夠16 歲麻煩嘅阿浚？
我望住眼前呢個遍體鱗傷但依然關心我嘅阿傑，再諗起嗰個光鮮亮麗內心卻腐爛嘅阿浚。我終於明白，咩係「金玉其外，敗絮其中」，又咩嘢係「仗義每多屠狗輩」。





「但.....」我咬著嘴唇，唔想讓阿傑擔心，亦都唔想承認自己嘅失敗，「佢對我好好。」
阿傑眼裡嘅最後一絲光亮熄滅廿，但佢都係點點頭：「咁就好....咁我就放心啦。」