【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第七十章：溫水煮蛙與最後的獠牙

阿浚嘅手段，比起對付我嗰陣更加卑劣，亦都更加急進。

根據警方嘅資料，起初，佢只係喺巴士最後排，趁住冇人嘅時候，將隻手伸入希彤條校裙度。希彤嚇親，推開佢，話「唔好」。阿浚就會擺出一副受傷嘅樣：「你係咪唔鍾意我？拍拖都係咁㗎啦，以前我同 Hiu Ching 師姐都係咁，佢都冇話唔得。」
佢竟然攞我嚟做擋箭牌！攞我嚟做道德綁架嘅工具！

年紀細細嘅希彤，邊度識分呢啲大話？佢驚冇咗呢個「男神」男朋友，驚俾同學笑佢「扮清高」，於是佢選擇咗忍受。呢種半推半就嘅沉默，令阿浚更加興奮，亦都更加猖狂。

後來係喺 K 房。昏暗嘅燈光，嘈雜嘅音樂，成咗佢最好嘅掩護。佢夾硬將隻手伸入佢件內衣度，希彤喊住求饒，佢卻笑住話：「傻豬，我錫你先咁做咋嘛。」直到上個禮拜五。
阿浚氹希彤話，屋企買咗新嘅遊戲機，想帶佢上去玩。希彤一開始拒絕，但阿浚軟硬兼施，又話買咗佢最鍾意嘅珍珠奶茶，又發誓話父母都喺屋企，絕對安全。





希彤信咗。

一入屋，屋企根本冇人。
阿浚鎖咗門，原本溫柔嘅樣瞬間變得好猙獰。佢將希彤推落梳化，開始扯爛佢套校服。
「你放開我！我要返屋企！」希彤尖叫，博命掙扎。
「返咩屋企？你都上得嚟，預咗㗎啦！」阿浚撳住佢雙手，眼入面滿係慾望同暴戾，「以前 Hiu Ching 嗰陣扮晒嘢，最後咪又係想俾我搞。你唔好扮啦！」又係我個名。

好彩，希彤雖然年紀細，但性格剛烈。佢趁阿浚解皮帶嘅空檔，狠狠咁咬咗佢手臂一啖，然後抓起飯枱上面個煙灰缸車落佢個頭度。

阿浚痛到鬆手，希彤趁機衝向大門，唔理衫都不整，喊住跑出走廊，博命拍鄰居門求救。





鄰居報咗警。