【甜】《那一年，我是一個援交妹》: 髮圈

Kelly喺後面扯住我條辮，其餘嗰幾個女仔就好有默契咁，走埋嚟我前面扯住我啲頭髮，仲有個偷偷地攝隻手過嚟，搣我手臂後面啲肉。

扯頭髮都唔算最痛，但係手臂後面啲肉好脆弱，俾佢一搣嗰下勁痛，我即刻縮手，但我俾佢哋幾個女仔團團包圍，已經將我圍咗埋去女廁牆角。

「死臭雞，有咁多仔唔溝，係要溝我條仔。」

跟住唔知邊個開着咗個水龍頭，用手兜住啲水撥落我件校裙度。

「哈哈，你睇佢，濕到透晒。」





「抵佢死。」

「有咩所謂，佢唔著衫個樣都俾男人望得多㗎啦。」

佢哋得手之後，就大搖大擺咁離開女廁，臨走前Kelly仲要補多我一巴掌。

我塊臉俾佢打到赤赤痛，佢哋走咗之後，女廁剩返我一個人。

我綁頭髮條橡筋俾佢哋扯埋落地下，俾啲水整濕晒污糟晒，我摀低身執返佢上嚟，





喺塊鏡裡面，我見到自己狼狽嘅倒影，我洗一洗返乾淨條橡筋，用條裙邊抹一抹，撥好啲頭髮，就紮返起條辮…

但件校裙都係濕漉漉，我件白色底衫若隱若現，好在今日唔係著深色bra，如果唔係仲透…

明明係你條仔𥄫我在先，佢仲要落堂嘅時候借啲意掂我隻手，我唔知道佢睇唔睇到佢條仔呢吓動作，但反正遭殃嘅都係我。

我踏出廁所門口，我發現原來外面聚集咗一班同級嘅同學，圍埋八卦緊頭先女廁發生緊咩事。

當中都有啲男仔用啲好微妙嘅目光望向我度，我個身濕晒，透晒件底衫出嚟俾佢哋睇到我都無辦法，唔係我想嘅。





但我想講呢啲情景佢哋都應該睇到司空見慣，我唔係話佢哋見慣我校服濕晒個樣，而係呢幾年嚟，嗰幾個女仔不嬲都好鍾意針對我，特別係最近一年，自從嗰件事發生之後，佢哋嘅行為更加變本加厲。

我耷低頭向住我班房行，喺半路途中，俾巡視嘅Miss截住。

「黃子妤同學，你做咩件校服濕晒？」佢係Miss Chan，係隔離理科班嘅班主任，後生之餘生得高又靚女，著住對高踭鞋好有氣質。

「我頭先洗手唔小心整濕咗。」

「快啲返課室用紙巾抹返乾淨，乖，如果唔係會好易攝親。」

「係…」

Miss Chan仲皺晒眉頭唉咗一聲，佢好似想講啲咩，但又揮揮手示意我快啲返課室，我急急腳行返入班房，費事佢會察覺到啲咩嘢，佢心思好細密，總覺得佢可以喺我嘅眼神睇穿啲咩嘢。

明明佢係隔籬班班主任，都可以記得我個名，單單係呢一點已經好可怕。





不過我都接受住自己喺學校裡面出名嘅呢個問題，當然係負面嗰方面嘅出名。

Lunchtime過後，又要上堂，件校服濕咗加上班房冷氣開到好凍，成堂都好唔舒服，終於捱過兩堂放學鐘聲響起，落堂我第一時間係衝返屋企，換返套衫，隨手喺平時細佬打機張枱度拎咗個髮夾，紮好個髻就出發去茶餐廳。

我去到茶餐廳嘅時候已經差唔多四點半，老闆同老闆娘兩個坐咗喺樓面，齊齊抬高頭望住部電視，老闆娘離遠就見到我，即刻同我打招呼。

「阿妹，放學喇？」

「老闆，老闆娘。」

同中午食飯時段相比，四點半呢啲下午茶時段，店裡面靜到一個人影都無，所以老闆同老闆娘都可以借呢段時間，坐低喺度睇下電視。

而茶餐廳部電視，掛喺近廚房個天花板牆角，隔籬係土地公公上香嘅神主牌。





「我去煲埋啲湯先。」我入到舖頭之後，老闆娘隨即趷返起身，佢雙手仲戴住對廚房手套，圍裙依然攬緊喺身上。

「我入嚟幫你。」

我跟住老闆娘走入廚房，戴返好條圍裙，著返好對水鞋，就去幫手準備今晚嘅例湯。

電視機播住嘅係新聞台，不斷重複嘅新聞報導，聽下聽下，會有一種虛無嘅感覺。

我喺廚房主要就係做老闆娘嘅小助手，幫手整嘢食，切菜、𢳂飯、沖奶茶、但有時出面好忙，我都偷偷地出去樓面，幫手收返啲客食完嘅碗碟返嚟，不咁樣嘅話，老闆就會話我，佢唔鍾意我行出樓面。

佢話，因為我未夠秤，原則上夜晚唔可以返工，所以我匿喺廚房裡面幫手就可以，就算出面冧晒檔，都唔使擔心，佢會搞得掂。

但係，今晚茶餐廳客人俾平時少咗好多，老闆話係附近又開咗間兩餸飯。

不過，廚房環境好熱，長時間做都係會做到薪水身汗，但喺呢度，我反而多咗一種踏實嘅感覺，時間一分一秒咁過，好快就到舖頭打佯嘅時間。





「阿女。」老闆拉低半閂之後，喺雪櫃度拎咗一袋嘢俾我。

「嗯？」

「俾你，攞返去煮俾細佬食，吓知唔知？」佢將袋醃好咗嘅牛肋骨，塞落我手度。