《庸人記》第一部：《蘭桂坊的最後一個週末》: （十二）美麗的謊言

他，Michael Fisher，余景輝，二十九歲，英籍香港人。父親為英國政府殖民地分部官員，獲派駐香港後認識其母親。他倆得悉英國將計劃交還香港給中國後，便一起回到敦倫居住。Michael二零零七年回流返港，卻開始發現自己有透視能力。不同物料的透視程度不同，但遠近以其正常視力為限。
 
她，Carolyn Lau，劉月梅，二十歲，上海人，父親為上海富商兼全國政協委員。當他發現女兒懂得隔空移物的能力後，便立刻把她送往香港升學，以免被中國政府借詞拘留研究。富商後來跟香港的富豪圈子混熟，便以「工作實習」的名義把女兒安排到The Inner Circle。
 
我的臉色一定很難看。那是用盡我一生人所學過的東西，都不能理解的說話。不，我完全能夠理解他的說話，但我就是接受不到。
 
但汽油彈在空中改變拋物線的片段，卻仍在我腦海中記憶猶新。
 
打工皇帝簡單地說罷了Michael 跟Carolyn的背景後便住了口，好像在試探我的反應一樣。
 




其實我還未想得出，我應該如何去反應。
 
「所以你哋同澳門個邊所謂嘅生意來往，亦都係出邊個班人自己耷頭應承嘅？」我想用最簡單的問題，想要刺中整件事情的要害。
 
「你係澳門咁耐，總共贏咗幾多錢？」打工皇帝突然這樣問道。
 
「係澳門總共贏咗六百七十幾萬。」這些數目我一直都有記著。「World wide其他地方加埋四千三百幾萬。」
 
「你知唔知道你幾時開始俾人red list咗？」打工皇帝問我。
 




「Red list？」這是我第一次聽到這個名詞。
 
但單憑他這一句說話，就可以知道：（１）他們比我知道更多賭場內的資訊。（２）他們至少在一個不短的時期內，一直留意著我的動態。
 
我呷了一口麥卡倫，好讓我能夠冷靜下來。
 
「係black list上嘅人，就係顯而易見嘅老千。世界各地嘅賭場會定時互相交換black list，make sure上面嘅人禁止進入賭場。如果有機會嘅話，就會幫佢哋埋單。」打工皇帝站了起來，一邊說一邊在房間裡踱步。「但係喺red list上面嘅人，賭場知道佢哋不單只statistically贏得比其他人多錢，而且知道佢地一定有乜嘢出千以外嘅秘密。佢哋唔會阻止red list上面嘅人出入賭場，但係佢地嘅一舉一動全部都會俾人睇實。但係因為red list唔會係賭場之間交換，所以你到依家都冇事。」
 
我心裡將信將疑。「所以賭場明知我出蠱惑，但係都由得我繼續贏錢？」
 




「冇錯。你只喺佢哋眼中嘅魚餌。捉摸到你嘅pattern，然後釣到大魚，先至係佢哋嘅最終目標。」打工皇帝說。「當然如果好似Michael咁唔識收手，佢哋當然亦會做嘢。」
 
我沒有說話，意思就是我仍未聽過Michael的往事。
 
「Michael未加入Inner Circle之前，靠佢嘅透視能力，喺一個月內贏咗澳門其中一個莊四千幾萬。好彩Heidi當時已經留意咗佢一排，個晚發現勢色唔對，立即表明身份，然後帶佢返香港。」
 
他說起來輕描淡寫，但要是被澳門那邊盯緊了的話，要逃回香港可不是一件容易的事。我能夠想像當中的驚險情況，大概也可以寫上另一個故事。
 
而話說回來，原來靠這些「特殊能力」去賭場賺錢的，不只我一個。也許是我過份天真，以為天下間就只有我在做這種事。如果我能夠做到這樣的事，當然會有其他人想得出來。如今想起來，我在賭場玩撲克碰到Heidi時，她也應該是在做著相同的勾當。
 
「你剩係贏大陸客、唔搞借過疊馬仔錢嘅人，又keep住有贏有輸，錢贏咗返嚟又放喺巴哈馬，手法當然比Michael高明好多。」
 
他知道我在巴哈馬的事情，自然是Heidi告訴他的。
 
「講嚟講去，你究竟同澳門個邊做咩生意？」




 
「Laundry。」他說出口的時候，竟然一絲慚愧之色都沒有。因為他未開口之前，我已經留意著他的臉部表情，所以我可以確定，這不是裝出來的反應，而是他真的他媽的不覺得慚愧。「當然，我哋瓣瓣都有，但係澳門個邊最容易就係洗黑錢。以佢哋幾個嘅才能，已經成為世界上其中一班最有系統、最快捷嘅money laundry team。」
 
他說起上來，臉上全無悔意。這令我想起當我把所有澳門贏到的錢，分散轉運到巴哈馬跟百慕達時的滿足感。
 
那是犯罪的快感。
 
「Seriously，你係香港最大家族嘅老臣子，係香港咁多地、咁多樓，啲錢你驚洗唔晒咩？點解仲要撈偏？」我一口氣地說。這時候我已經不理會我倆間的身份如何不對等，更沒有想過他既然把所有內情都告訴我，要是我不答應他加入Inner Circle 的話，會有甚麼下場。
 
「你睇得件事情實在太簡單喇……呢個世界上，根本冇分撈正定撈偏。」打工皇帝自顧自說。「你知唔知呢個世界上，最賺錢係邊幾個行業？」
 
我沒有作聲。我當然知道，買賣軍火、毒品等非法活動，其暴利才稱得上是最賺錢的行業。
 
「賣淫、賭博、販毒、走私軍火、貪污、洗黑錢，係其中幾個最賺錢嘅行業。」
 




他這樣說，我沒有太大的反應。這些數據，差不多全部都在我的腦海裡。
 
單是全球每年賣淫的收入就有一千八百億美元。非法賭博：一千四百億美元。大麻、可卡因、海洛英這三大主要毒品的買賣：二千九百億美元。走私軍火：六百億美元。貪污跟洗黑錢的情況則更多嚴重。由於差不多所有大小罪行都不免牽涉到貪污跟洗黑錢，所以每年從這兩種非法活動中流動的金額，分別達到一萬六千億跟二萬五千億美元。
 
可是他接下來說的話，我卻驚訝得接不過話來。
 
「咁你梗係會諗，所謂嘅慈善團體、醫藥、金融、娛樂，就當然係正當生意。但對於我嚟講，販毒同醫藥、賣淫同娛樂、銀行同地下錢莊，根本係同一件事嘅兩個層面。」
 
他繼續說得興起，就只欠沒有手舞足蹈起來。「商界、政府、黑社會，底下個班梗係打過你死我活。但其實最高層個班人嘅關係千絲萬縷，冇話分邊個忠邊個奸。你可能話，點解冇人會知、冇人會講？你諗下，你平時睇嘅報紙，係乜嘢人揸fit嘅？政府話事個班，你話同我哋飲紅酒多、定係落區做騷多？」
 
他的話是如此荒謬，但我卻一句話都不能駁回。
 
「呢度嘅衣食住行、報章雜誌，全部都係俾幾個家族壟斷晒。黑社會要靠我哋食大茶飯、政府要靠黑社會唔搞事、我哋要靠政府搵錢。呢個系統唔係剩係呢度先有。有啲國家，連執政黨同反對黨都係同一班人係幕係操縱。啲黑錢我哋唔洗，其他人都會洗。我哋做生意嘅人洗起上嚟，起碼都仲有啲職業道德。」
 
天，他還可以他媽的跟我說起職業道德。




 
各路人馬在澳門洗黑錢的事情，雖然沒有編收在教科書裡，但稍為內行的人，都知道洗黑錢規模之大，恐怕會嚇怕公眾。照打工皇帝的話，洗黑錢的行為不但得到政府默許，而且商界、政府、黑幫互相牽制，竟發展成一個有系統的既定模式。
 
The Inner Circle接到任務，就去賭門賭錢。他們只可以贏至一個指定的數目，再加上他們收取的佣金，然後便回港將資金再流轉。以巴哈馬等地的空殼公司來周轉，我本身就已經試過，所以打工皇帝一說的時候，我就登時明白。他們在賭場的行動只有極高層的少數人知道，免卻了串通荷官們而露餡的機會。他們的名字就算放到所謂的紅色名單上，也不會有任何人採取實質行動。
 
更何況，他們贏得來的錢完全合法。每間賭場裡都有過千、甚至過萬部閉路電視，監察著每個人的一舉一動。對於Inner Circle而言，反而能用來證明他們的錢的來源。
 
＊　　　　　＊　　　　　＊
 
我走出來的時候，，一定臉如糞色。Michael又遞了一杯威士忌給我。我二話不說，便把整杯乾掉。不知道是喝過麥卡倫後，其他的威士忌都變得辛辣刺喉，抑或是我還未能接受到打工皇帝的說話。我一口喝了去，竟然嗆過不停。
 
「It's alright.」Heidi站了起來拍拍我的背。「Michael第一次聽完出嚟之後，足足爆粗鬧左十分鐘。」
 
Michael 瞪了Heidi一眼，可是她卻沒有理會。
 




「I'm fine.」當然我只是說說而已。我距離「fine」大概有二百光年那麼遠。
 
我已經不記得打工皇帝最後說了些甚麼。呸，我當然記得，可是我不想寫出來。那完全是自欺欺人的一派胡言。
 
「咁我哋依家喺咪可以去Azure喇？」Carolyn一乎興奮的樣子問道。
 
Heidi望了我一眼。她不是想讀我的想法，而是想徵求我的同意。
 
「唉，」我拿了我的iPhone出來看一看時間。「已經兩點幾，我都唔知Tony仲喺唔喺Azure……」
 
「佢最好唔喺Azure。」Heidi說，可是我一時之間不知箇中原因。她繼續道：「我頭先text咗佢，佢話佢成晚都係喺諾士佛臺飲嘢。」