香港女子圖鑑: 第二章：沙田與太古坊 ( 二 )

大半年後，林薇因為表現良好，公司破格叫佢幫手跟一個大project。有一晚大雨到仆街，公司得返佢同張凱兩個人。林薇因為個Proposal連續畀客退咗幾次，心情衰到極，眼濕濕咁坐喺位度改文件。張凱行過佢身邊嗰陣，自然咁停低，用嗰種專業得嚟好穩重嘅語氣講：「林薇，今晚我哋要趕起個proposal，聽朝十點前俾Finance final review。辛苦你啦。」

講完，佢順手將一杯啱啱沖好、熱辣辣嘅咖啡輕輕放喺林薇枱角。動作好自然，無乜多餘眼神，亦都唔係嗰種刻意嘅討好，放低就返咗入房。

林薇飲咗一啖仲冒緊煙嘅熱咖啡，心入面好似俾火熨過咁，熱辣辣，張總默默嘅小舉動，突然湧起一種喺阿峰身上從來未感受過嘅——細心。


出面啲雨聲越嚟越大，劈哩啪啦咁撞落塊落地玻璃度，聽得人個心亂晒。

過咗半個鐘，林薇改到頭都大埋，突然覺得膊頭沉咗一沉。一雙暖烘烘又好穩陣嘅手，輕輕拍佢膊頭一吓，嗰種力道啱啱好，唔太重又唔太輕。





「呢度啲數據對比，其實可以再執簡潔啲。」
張凱嗰把低沉嘅聲喺耳邊響起，仲帶住一陣好淡好高級嘅木質香水味。佢烏低身睇住個Mon，嗰張型到爆嘅側臉近到好似可以錫落去咁，喉結微微郁吓郁吓。

林薇心跳猛地漏咗一拍，成個人好似觸電咁。佢feel到張凱傳過嚟嘅體溫，仲有嗰種成熟男人特有、穩如泰山嘅氣場。

「謝、謝謝張總……我即刻改。」

張凱無即刻行開，反而拉張凳喺佢隔籬坐低，修長嘅手指攞起份Report，語氣溫柔得嚟又好Charm：「你先歇一歇，我幫你睇埋最後呢幾版。」





唔經唔覺，兩個人肩並肩喺Office做到深夜一點幾。窗外啲雨直頭係倒水咁倒。

張凱望咗一眼窗外，皺晒眉咁話：「咁夜又咁大雨好難截車，我送你返去啦。」
林薇猶豫咗一陣，最後都係點咗點頭。

張凱架黑色BMW M3 Touring 喺暴雨入面慢慢行，車廂入面乾淨到不得了，仲有一陣好清爽嘅香味。林薇坐喺副駕位，對手緊張到係咁扯住條安全帶。

行到一半，雨勢大到直頭睇唔到路。張凱將架車停喺路邊一個暗位，沉聲話：「等一陣雨細啲先再行。」

車廂入面瞬間靜晒，只係聽到雨聲同埋兩個人嘅呼吸聲。





張凱轉過頭，望住林薇嗰對因為喊過而紅腫嘅眼，把聲柔到出晒水：「林薇，你最近係咪好大壓力？」

就係呢句簡簡單單嘅關心，好似一條羽毛咁撩過林薇個心。佢眼眶一熱，啲眼淚完全忍唔住，一滴一滴咁跌落嚟。

呢排嗰個日本公司嘅Proposal，已經俾人彈返轉頭三次。因為她的出錯，成組人都要陪佢OT到凌晨。市場部嗰啲人，甚至張凱都要親自出手幫佢補鑊，佢心入面真係好愧疚、好自責。

張凱愣咗一愣，喺側邊抽咗張紙巾，個人傾前少少，動作好溫柔、好自然咁幫佢抹走眼角啲淚水。
「唔好喊。」佢低聲講，但語氣有一種令人不得不聽嘅穩重。

林薇咬住唇，把聲震晒咁話：「……對唔住，張總。我最近成日做錯嘢，仲累到大家一齊陪我補鑊……我真係好無用……」

張凱望住出面啲大雨，語氣平穩：「每個人第一次接大Case都會犯錯。我當年啱啱出嚟做嘢，都試過搞喎一個大Deal，要上司幫我執手尾。所以，唔好逼得自己太緊。」佢把聲真係好有感染力，無責備，亦都唔係嗰種假惺惺嘅安慰，就係咁簡單而溫柔。

林薇捉實張紙巾，雖然仲喊緊，但心入面對眼前呢個男人湧起咗一股前所未有嘅暖意同埋心動。





雨細咗少少，車重新開動。而林薇對呢位成熟、細心、型到裂嘅上司，好感度正瘋狂飆升，完全停唔到。