香港女子圖鑑: 第二章：沙田與太古坊 ( 三 )

之後嗰段時間，呢嗰日本project進入咗「生死時速」。原本跟開嘅 Senior Account Manager 阿Kate 突然出事，38 歲嘅佢係高齡產婦，醫生發覺個胎唔多穩，要求佢即刻入院卧床保胎。

事出突然，林薇被叫到去私家醫院嘅病房接收所有工作。Kate 瞓喺病床上，手上仲攞住個 iPad 喺度執緊個 Layout，雖然面色蒼白，但把口依然好毒、好快：
「薇，我呢胎真係『富貴命』，未出世就已經要佢老母住呢間每日幾千蚊嘅『五星級監倉』。我原本仲諗住生嗰日先由太古坊行去醫院添。」

她喘了口氣，將 iPad 塞落林薇手入面，眼神一懔：「聽住呀，張總係一個『細節之鬼』，佢對 Presentation 嘅要求係：如果你張 Slide 有個全角（Full-width）空格，佢都會覺得你係對嗰個日本客嘅祖宗不敬。佢好緊張呢張單，你一定要醒醒定定，接得住佢個頻率。如果你搞得掂，你就係公司嘅神；搞唔掂……你就返沙田食自己啦。」

Kate 塞咗支名牌唇膏畀林薇：
「嗱，呢支唇膏新嘅，你袋住。見客嗰陣，如果張總講完嘢，你記得適時點頭，笑得專業啲。佢最鍾意人哋『接得到佢個頻率』。加油呀，林薇，如果你喺東京簽到單，記得幫我喺嗰邊買返個護身符畀呢個『大爺』，等佢乖乖哋喺入面唔好再玩嘢，等我快啲出院返嚟同你一齊分紅！」





就咁樣，成個 Project 嘅重擔落咗喺林薇一個人身上。佢同張凱幾乎每日都「形影不離」咁一齊開會、執文件、練 Presentation。張凱始終保持住一種恰到好處嘅專業距離，除咗工事，未見見過佢會傾閒偈，但佢嗰種無聲嘅細心，先至最「殺死人」。

有一次，辦公室同事叫咖啡外賣嗰陣，林薇隨口應咗一句：「我要Double Espresso，無糖啊，我要充足電精神啲。」當時張凱正喺隔籬同人傾緊電話，林薇以為佢完全無聽入耳。
點知之後有一晚 OT 到10點幾嗰陣，辦公室靜到得返打字聲，張凱行過林薇枱頭，默默放低咗一杯熱拿鐵，一份三文治，仲有一支去紅筋嘅眼藥水。
林薇抬頭，正對上張凱，望住佢嗰對好似乜都睇穿晒嘅眼。
「Latte 有奶無咁傷胃，太苦會令神經太繃緊。」佢把聲低沉穩重「休息十分鐘再執，我陪你一齊Review。」
林薇握住暖手嘅咖啡杯，心跳漏咗一拍。嗰種「佢咁忘都會關心我，原來我隨口講嘅嘢，佢都有聽到入耳」嘅震撼。

公司入面啲女同事見到佢每日出入張凱間玻璃房，眼神入面寫滿咗羨慕：「薇薇，你真係執到喇，張總平時邊會親自帶新人？佢對你真係唔同啲。」林薇只能尷尬咁笑，但內心嘅好感越嚟越強烈。





阿峰最近嘅 WhatsApp 只係重重複複幾句：
「幾點放工呀？」
「今日食咗飯未？」
「我買咗對新波鞋，特價好抵！」
佢完全唔知林薇壓力大到失眠，更加聽唔明佢分享嘅工事，呢間日本大公司，目標要打入大陸市場，佢哋而家要同上海嘅4A公司爭呢張單，嗰競爭有幾殘酷。但張凱用一種引路人嘅姿態，教識佢好多嘢，帶佢行過一個又一個難關。

兩個月後，合約終於去到 Final 階段。
張凱合上手提電腦，望住佢：「林薇，下星期跟我去東京。同客嗰邊個代表做最後 Present 同簽約。你準備吓。」

東京。




林薇記得，她同阿峰畢業後第一個大計就係草錢去東京。阿峰話要去澀谷行街、晴空塔睇夜景、去秋葉原掃玩具。
估唔到，佢人生第一次踏上東京，竟然係因為工事，仲要係……單獨同張凱。