儲物室的餘溫: 第十六章　電腦室匙咭

第十六章　電腦室匙咭

畢業營後，喺學校，阿凱成日都接近Miss Yung。好多次都趁附近冇人，會偷偷地錫佢，或者拖住佢、攬住佢。

Miss Yung每次都好驚，始終係仲係返學時間，周圍仲有好多人。有幾次，仲爭啲畀人見到。

雖然佢同阿凱未有一個明確嘅開始，但係佢知道阿凱已經當咗自己係女朋友，而家，阿凱係處於熱戀期，有好多嘢都忽視咗。

「我有啲嘢想同你講。」





小息，Miss Yung見電腦室有閂門，佢走咗入去，想認真咁同阿凱傾一傾。

阿凱放低工作，見Miss Yung閂咗門，佢就走上前拖住佢隻手：「咩事？」

「可唔可以，唔好喺返工嘅時間⋯⋯掂我⋯⋯」Miss Yung低頭望住佢哋拖住嘅手。

「都冇人見到。」阿凱好似仲未意識到事情嘅嚴重性。

Miss Yung心裡面嘆咗一口氣：「萬一呢？畀人見到⋯⋯咁點算？」





阿凱仲係覺得Miss Yung太過顧慮：「邊會咁易？」

「你唔係我，你唔會明我驚咩。」Miss Yung直望住阿凱，想知佢有咩反應。

兩人四目交投，阿凱見到Miss Yung不知所措嘅眼神。其實阿凱都只係覺得大不了離婚收場、或者轉工，真係唔係好明Miss Yung驚咩，不過佢都點點頭，抱上前，輕聲講：「咁幾時先可以錫你？」

「冇人⋯⋯就⋯⋯可以⋯⋯」

「好，應承你。」阿凱隨即迎上嘴唇，封住Miss Yung雙唇。Miss Yung嚇咗嚇，用手掩住阿凱個嘴，望望後面，確認已經閂咗門。





阿凱捉住Miss Yung條手，錫咗一下：「個門自動上鎖㗎，有server喺度，要拍咭先入到嚟。」

Miss Yung仲係有啲怕：「邊個人會有咭？」

「原本係全部教職員同工友。」阿凱輕輕捽住Miss Yung嘅手掌。

「原本？」

「係呀。不過我已經reset咗，而家只有工友同埋電腦科任老師先入到嚟。」

Miss Yung疑惑咁望住阿凱：「點解要咁做？」

「減少被人開門嘅機會囉。」

Miss Yung甜笑起上嚟，眼前呢個男仔真係會為佢做一啲難以置信嘅事。





「平時我都打開門，都好少人嚟搵我。」阿凱露出壞壞嘅微笑，最容易令Miss Yung心軟：「除咗你。」

兩人隨即深情熱吻。阿凱嘅氣味又攻陷咗Miss Yung嘅情感，好似毒藥一樣，已經上咗癮，完全反抗唔到。

//