儲物室的餘溫: 第二十三章　酒店

第二十三章　酒店

返到酒店，Miss Yung一直抑壓住驚恐嘅情緒。但係阿凱喺側邊睇得好清楚，見到佢嘅神情實在好唔妥：「靜雯，你⋯⋯」

Miss Yung冇應佢，一直對住部電腦，搜尋緊學校資料，想同小欣轉校。佢眼神好急亂，手寫低嘅note字體都歪歪斜斜。

「靜雯。」阿凱阿凱拉一拉櫈，坐近Miss Yung一啲，握住佢揸滑鼠嘅手。

Miss Yung即刻嚇咗一跳，甩開咗阿凱隻手，低呼一聲：「呀。sorry。」佢連忙道歉，盡力保持冷靜。





阿凱唔介意，反而好擔心：「靜雯，你停一停先。」

Miss Yung冇停手，捉住滑鼠，切換緊唔同嘅視窗，鍵盤上嘅手隱藏唔到佢嘅不安：「不如⋯⋯你返屋企先？我有啲忙。」

阿凱忍唔住，捉住佢兩隻手，同Miss Yung面對面。Miss Yung雖然擰歪臉，不過阿凱都望得好清楚，Miss Yung嘅頸部有瘀痕，臉上面都有輕微印痕，佢知道呢個係被叉頸而留落嚟嘅痕跡。

呢一刻嘅保護慾完全爆發晒出嚟，佢怒心中燒，放開咗Miss Yung雙手，拎起電話。

Miss Yung見到阿凱撳緊個「9」字，即刻煞停佢，手快快撳熄電話個mon。





阿凱企起身，行咗去大門口嗰邊。

Miss Yung見阿凱開返個電話，佢好驚，衝過去攬住咗阿凱，用好微弱、帶啲鼻酸嘅聲音講：「唔好⋯⋯我求吓你⋯⋯唔好⋯⋯」

乞求嘅聲線，令阿凱停咗手，用力咁將Miss Yung攬實。呢個擁抱，令到阿凱軟化落嚟，佢長長咁歎咗一口氣，好心痛Miss Yung。

小欣喺床上面玩緊電話遊戲，而佢哋喺走廊嘅位置，咁啱喺小欣視線嘅死角位。

Miss Yung用力攬住阿凱條腰，埋頭喺阿凱嘅胸前，聽住由阿凱胸口傳出嚟關懷嘅聲線，同呼吸嘅起伏。





「點解要放過佢啫？明顯唔只一次，佢點可以咁對你？」阿凱又心痛又嬲。

Miss Yung強逞住搖頭：「我冇事，我唔想⋯⋯搞到佢冇咗份工⋯⋯」

「條仆街咁樣，你仲維護佢？」阿凱唔能夠理解Miss Yung嘅諗法。

「佢係小欣嘅爸爸。」Miss Yung聲線微弱，仲有啲震。

「個老豆咁L樣，我真係想屌柒佢！仲衰L過我老豆！」阿凱真係好嬲，但係都壓低把聲，唔畀小欣聽到：「D佢老母！」

Miss Yung低頭：「我想小欣⋯⋯有個完整家庭⋯⋯」

阿凱吞咗啖氣，忍住怒火：「咁你呢？你唔使理自己㗎嗱？」

「我⋯⋯」Miss Yung答唔到佢，因為佢真係冇諗過自己。





「我真係好擔心你。」阿凱鬆一鬆開懷抱，撫摸住Miss Yung頸上嘅瘀痕，眼神流露緊嘅係心痛同無奈：「痛唔痛？」

Miss Yung感受到阿凱嘅手，係極度憐惜咁撫摸自己，同Chan Sir嘅粗暴完全係兩回事。佢眼淚開始滴落嚟，阿凱用手抺走：「我喺度，我會一直喺度。」Miss Yung聽到後，一股熱流，不斷由心臟湧上鼻腔，情緒瞬間爆發。

阿凱都估唔到Miss Yung會突然間崩潰大喊，嚇咗一跳，連忙攬實佢道歉。

原本投入遊戲嘅小欣反應都好快，佢聽到Miss Yung嘅喊聲，即刻放低電話走過去。見到阿凱攬住Miss Yung，佢即刻大力推開阿凱：「唔好打媽mi呀！」小欣用小小嘅身體擋喺Miss Yung同阿凱之間，好惡咁望住阿凱，眼神裡充滿恐懼同憤怒。

阿凱鬆開手，估唔到小欣嘅反應會咁，可想而知，小欣其實咩都知。

Miss Yung踎低抱住小欣，盡晒全力咁喊出嚟，喊到成個人震晒。作為一個媽媽，佢覺得自己畀唔到一個完整嘅屋企小欣，佢覺得好內疚：「對唔住⋯⋯小欣⋯⋯係媽mi冇用⋯⋯」

小欣攬住Miss Yung喊埋一份：「媽mi媽mi⋯⋯」





阿凱由佢哋屋企嘅後梯，直至而家見到此情此景，真係好心酸，完全想像唔到呢兩母女經歷咗啲咩，喺一個咩地獄入面生活。

佢握實拳頭，將忿怒收喺心入面。

//