儲物室的餘溫: 第二十四章　短訊

第二十四章　短訊

Miss Yung喊到攰，喺床上瞓咗。

阿凱坐喺床側邊嘅櫈，同小欣你眼望我眼，空氣入面忽然有一啲尷尬。

「小欣，我⋯⋯」

「程老師你同媽mi係唔係好熟㗎？」小欣坐喺Miss Yung嘅旁邊，眼仔碌碌咁望住阿凱，內心充滿疑惑。





「係呀。我同你解釋返先，頭先我冇打你媽mi。」阿凱笑咗一笑，首先要得到小欣嘅信任，溫柔地解釋：「同埋晏晝嗰陣，係我帶你哋離開屋企，所以我唔係壞人。如果我係嘅話，你媽mi都唔會畀我入嚟呢度啦，係咪？」

小欣唔熟阿凱，所以仲有少警剔，唔知阿凱信唔信得過：「你有冇講大話？」

「我冇呀。」阿凱舉起雙手，想扮投降。點知小欣嘅反應係即刻攬住Miss Yung，護住佢。阿凱心諗，呢件事真係唔係咁簡單。佢慢慢放低雙手：「你放鬆啲先，我係幫你哋嘅。我知道，Chan Sir，即係你爸爸成日都打你。係咪？」

小欣搖搖頭，仍然攬住Miss Yung：「爸爸冇打我，但係⋯⋯」

阿凱心裡面痛咗一下，佢估到小欣欲言又止入面嘅內容。原來小欣一早就知道Miss Yung被打，不過好事係，小欣係無事嘅。





「尋晚係唔係發生咗咩事？」

「尋晚媽mi叫得好大聲⋯⋯」小欣開始流眼淚：「我想出去搵佢，但係媽mi話過，夜晚聽到咩聲都好，都唔可以離開自己間房。所以我唔可以⋯⋯但係我好驚⋯⋯」

小欣嘅情緒都係需要保護，不過佢收咗掣冇喊出嚟，好似喊就係唔乖咁。

「由今日開始，我會保護你同埋你媽mi。」阿凱未敢去抱住小欣，但係佢嘗試坐近一啲。

可惜小欣拉返遠個距離，痴住Miss Yung嗰邊。喺佢眼前，係一個唔熟悉嘅學校老師，呢一刻，仲未可以完全相信阿凱。





呢個時候，Miss Yung嘅電話不斷狂震動。阿凱行去枱面拎起電話，螢幕不斷彈出Chan Sir嘅恐嚇短訊，仲有好多個來自佢嘅未接來電。

「你走唔甩㗎。」「死八婆！」「你再唔返嚟，我唔會幫你屋企還錢！」「你避得一時避唔到一世。」「你冇爸爸啫，係咪想小欣都冇爸爸？」「賤人！聽電話呀！」

佢仲喺preview度，睇晒呢幾個鐘嘅短訊。有一啲來電同短訊，係Miss Yung嘅媽媽。

「你做乜激嬲佢呀？」「咁邊個幫我還錢呀？」「你快啲返去！」「同佢道歉當咩事都冇發生過。」「你同我醒醒定定，唔好得罪我女婿！」

阿凱愈睇愈嬲，不過佢開始明白Miss Yung同Chan Sir之間係咩關係。

佢記得Miss Yung講過，爸爸喺佢好細個嗰陣走咗佬，淨返一個爛賭嘅媽媽。有好幾次，媽媽爭啲要賣咗佢去換錢。而Chan Sir嘅電話署名，到而家結咗婚咁多年，都仲係寫住「陳生」。呢個名已經證明咗，佢哋之間只係一場交易。

阿凱好憤怒，佢恨不得而家就衝去Chan Sir屋企，打佢一身！但係Miss Yung一定唔會想佢咁做。佢緊握拳頭，搥住自己嘅額頭，諗緊自己點先可以帶走Miss Yung逃離一切。

電話喺阿凱手上震咗一下，彈出嘅短訊內容令佢有啲不安。





「唔使匿埋喇，我知你喺XX酒店。」

//