儲物室的餘溫: 第二十五章　外賣

第二十五章　外賣

阿凱揸住電話，望住嚟自「陳生」嘅呢條短訊，突然心都涼一下。

佢望向床嗰邊，見到Miss Yung喺床上面瞓得唔太好，小欣就一直攬住Miss Yung陪住。佢行咗去窗簾，輕輕力咁拉開一條小罅，好似要偷窺出面嘅情況咁。

天就嚟黑齊，街燈啱啱開咗冇幾耐。佢細心咁睇住每一個角落，等緊過馬路嘅人，一邊行一邊玩嘅學生，喺對面冷巷食煙嘅阿伯，每一個見到嘅位置都唔放過，確認吓Chan Sir喺唔喺度。

「程老師⋯⋯」小欣細聲叫佢，小朋友嘅第六感好強：「係唔係爸爸嚟咗？」





阿凱拉返埋窗簾，確保冇罅喺中間，佢行埋去小欣旁邊：「我一定會保護你哋，唔使怕，知道嗎？」

小欣對阿凱好似多咗啲信任，因為見到阿凱冇惡意，亦冇對媽媽做出唔好嘅行為：「我有啲肚餓。」

「想食咩？你識唔識睇app？」阿凱開咗外賣app，睇緊有咩食。

「我未試過。」小欣搖搖頭，阿凱就拉櫈坐喺隔離，同小欣一齊睇app揀嘢食，教佢睇間餐廳有幾遠，要幾耐送到等資料。小欣好似發現新大陸咁，拎住個電話撳撳撳，好易上手。

不過阿凱就好苦惱，一陣要離開呢間房，落大堂拎外賣，呢個真空期好似有啲危險，唔放心得返兩母女喺度。而且，Chan Sir會唔會真係殺到嚟？佢真係好擔心。





大約一個鐘後，外賣差唔多到。阿凱打咗電話去前台，想要求酒店職員幫忙帶外賣上嚟，但係職員拒絕咗。佢唯有硬住頭皮走落lobby。

佢著咗件外套，笠住個頭，帶住匙咭。同咗小欣交帶咗，無論邊個敲門撳鐘都唔可以開門。

落到lobby，企咗喺一個角落度，掃視成個lobby，見唔到Chan Sir嘅蹤影。佢冇因為咁而放鬆心情，再望望外賣app，送遞員應該到咗。佢見到一個拎住外賣嘅後生仔行入嚟，正當佢想走過去接外賣嘅時候，Chan Sir就喺送遞員後面出現。

好彩反應快，佢即刻退後幾步，然後接咗送遞員嘅電話。佢見住Chan Sir走咗去前台，於是就引導送遞員經過前台，行去𨋢口位置。佢已經撳定𨋢，衝過去接完外賣就可以入𨋢。
交收嘅時候，Chan Sir喺前台完鬧人，咁啱望咗過嚟，同阿凱對視咗一下。Chan Sir皺住眉就叫住佢，好似喺學校喝啲學生嘅語氣：「程俊凱？你仲我企喺度。」

阿凱驚咗一驚，扮晒鎮定咁應：「咦？Chan Sir？乜⋯⋯咁啱呀？」





Chan Sir向阿凱行過去，審犯咁問：「講，你點解喺度？」

讀書嗰時，阿凱成日都喺學校搞事，所以已經被Chan Sir鬧慣。再因為Miss Yung嘅緣故，佢特別鍾意反駁Chan Sir，激到佢死死吓。所以就算Chan Sir唔係訓導組，佢兩個嘅血海深仇，已經唔係一朝一夕嘅事。

「呃，我屋企有親戚嚟咗，咁我過嚟同佢食餐飯囉。」阿凱轉數都算快，拎一拎起手上嘅外賣，不過佢手心冒汗，差啲攞唔穩個袋。

「唔好話我知你嚟爆房呀！」Chan Sir一直都睇佢唔順眼：「你而家假假地都係學校老師，唔好做埋晒啲唔見得光嘅嘢。」

阿凱聽到呢句，忍唔住想窒佢，不過佢今日冇出聲，只想快啲離開現場。

「有冇見過Miss Yung？」Chan Sir又再send message。

「Miss Yung？冇呀。」阿凱笑笑口：「Miss Yung點會喺度呀？佢唔係病假咩？」





「你又知佢病假？」Chan Sir眼神有一點在意：「佢搵過你？」

「今日我代咗Miss Yung兩堂吖嘛。」阿凱知道而家實講多錯多，於是走為上著：「我返上去先啦，食完飯拿拿臨返屋企。有𨋢，走先喇，byebye。」

Chan Sir見住阿凱快步走入𨋢，仲同佢揮手講byebye，心裡面有好多念頭閃過。佢沉思咗一陣，碎碎念講：「唔通⋯⋯佢哋有嘢？」

佢眼神閃過一絲殺意，心裡面暗暗記住呢件事。

//