儲物室的餘溫: 第二十七章　闖入

第二十七章　闖入

Chan Sir喺之前嘅跟蹤，已經知道Miss Yung住喺邊層。佢拎住張房咭，喺樓層每一間都試吓開門。

見到個門鎖轉咗綠燈嘅時候，佢嘴角向上揚：「哼！仲唔畀我搵到你？」

順利入咗Miss Yung間房，佢閂埋咗度門，落埋防盜扣，走去床邊，望住瞓緊覺嘅Miss Yung同小欣。

佢見到兩母女，完全冇考慮過一家人嘅情。而家呢一刻，佢只係覺得Miss Yung唔再忠於自己，佢心裡面嘅怒火又再次撚起。





「賤人！你同我起身！」佢揭開張被，大聲呼喝。

兩母女同時嚇醒，Miss Yung見到兇神惡殺嘅Chan Sir，佢嚇到心臟好似停咗咁，因為佢知道：今次死梗。

Miss Yung戰戰競競喺另一邊落床，吞咗啖口水，口震震咁同小欣講，輕輕拉住佢手：「小欣，你⋯⋯你入廁所⋯⋯唔好出嚟⋯⋯」

小欣都好驚，即刻落床匿埋喺Miss Yung後面，攬住佢對腳：「媽mi，我⋯⋯」

「小欣，乖，快啲入去⋯⋯」Miss Yung故作鎮定推一推。





小欣望望Chan Sir，再望望Miss Yung，唔知點算好。因為佢知道如果佢入咗廁所，Miss Yung就會被打。

「小欣！你望住我！」Chan Sir審犯咁問，走過去想捉住小欣：「有冇男人嚟過呢度？佢係咪同你媽mi搞埋一齊？」

「咩男人？」Miss Yung擋喺小欣面前，同Chan Sir正面交峰。

「扮得幾好吖！嗰個男人有冇搞埋小欣？」

「你唔好亂咁講嘢！」Miss Yung再推一推小欣：「快啲入廁所。」





小欣知道將會發生咩事，佢拉實Miss Yung，搖搖頭。

Miss Yung唔想喺小欣面前畀Chan Sir打罵，佢強硬起嚟：「小欣。快啲去。」

小欣好唔想離開Miss Yung，佢邊回頭望Miss Yung，邊忍住眼淚走入廁所。

「你條賤精竟然夠膽勾佬？」Chan Sir冇諗過要㩒唔住啲火，小欣未閂完門，已經摑咗Miss Yung一巴：「即係小欣係個野種啦！」

「你知唔知你講緊咩？」Miss Yung激動到連呼吸都唔順，撫住臉大聲回應：「佢係你個女！」

Chan Sir再一巴𢫏過去，再上前叉住Miss Yung條頸，鼻息都噴到Miss Yung嘅面上：「淫婦！佢碌鳩有幾大呀？吓！答我呀！」

「你講嘢可唔可以唔好咁難聽！」呢個痛感，Chan Sir嘅臭口氣，令Miss Yung諗起上次被強姦嘅情境，佢開始怕，口都震埋：「小欣會聽到⋯⋯」

「聽到咪聽到！咪比佢知佢有個咁嘅呀媽囉！」Chan Sir要懲罰Miss Yung，一手推佢埋牆，除咗皮帶，快速繞住手掌一圈，就一下一下咁打落去Miss Yung對腳度：「真係羞家！羞家！羞家！」Chan Sir愈打愈用力，愈打愈嬲，愈打愈享受，最後變成瘋狂鞭打。





Miss Yung好痛，佢想反抗，但係佢腳軟走唔郁，亦都嗌唔出聲，只能被Chan Sir虐打。被強姦嘅情境開始侵蝕佢嘅思路，喺佢腦海裡面，佢只係見到有個強姦犯喺佢身上抽插嘅景象。

被撕碎嘅心，再次散落一地：「唔好⋯⋯唔好⋯⋯」

//