「三十分鐘的一人之境」: 第二章

咔．咔。

像Walkman按下 Play 既聲音。

進入想像既另一個未活過既人生。

背後忽然有人拍一拍我膊頭。

原來係IVE同班同學 Josh。





Josh一下坐低響麥當勞卡位我對面。

「終於畢業喇，你有咩打算呀？」

我顯得一臉迷茫。

「無呀，求其搵份工先囉，騎牛搵馬啦。我哋咩經驗都無，都幾難搵工。你又點呀？」

Josh一副完全唔愁出路既樣。





「我老豆叫我返去佢鋪頭幫手做住先，之後慢慢再諗囉。總之有糧出，有錢玩，以後既事以後先算啦！」

我即刻雙手合十，不停捽手掌。

「Josh老闆，請唔請擦鞋仔呀？我乜都肯做架！Josh哥！Josh哥！」

Josh笑到不停搖頭。

「唉，唔係咁易架。我老豆好難頂架，我係佢個仔先奈我唔何咋！」





正講到興起，Josh電話忽然響起。

佢睇一睇個電話,

「我女朋友到咗喇，走先啦，再講!」

話口未完，人已經衝出麥當勞。

轉眼間就消失咗。

我望一望隻錶。

差唔多六點。

我都夠鐘走人。





今晚約咗Garcie去睇郭富城套《小親親》。

睇完戲之後，我哋響商場隨便食咗個晚飯。

之後再陪佢搭車返屋企。

送到樓下，明明都冇乜特別野講，但兩個人都唔捨得走。

講一句，停一陣。

互相欲言又止,

最後索性抱住對方。





一抱，就抱咗成十分鐘。

因為大家都知道。

八月一到，Garcie就要飛去澳洲讀書。

四年。

聽落好似好耐。

但當時既我真心覺得唔算咩。

我只要快啲搵到工，努力儲錢。

等佢放假既時候，我就買機票飛去澳洲探佢。





捱下捱下。

四年好快過。

等佢畢業返嚟。

我哋就結婚。

買層細細既樓。

買架七人車。

再生一兩個小朋友。





至少。我係係咁諗。