「三十分鐘的一人之境」: 第三章

之後我自己再坐小巴返屋企,

往後兩個星期，

斷斷續續咁上網發下CV, 

有時又搭下朋友介紹, 

做下D 日薪搬運, 裝修什工炒散,





叫做自己搵下D生活費先.  

見步行步.

雖然都算見左三四份工, 

但每次都係音訊全無,

都預左我地剛畢業既新鮮人, 





係無咁易架喇,

一個無炒散開既中午, 

忽然收到個電話叫我去見工,

是但啦, 

好過連見工既機會都無,





於是約好兩日既上午十點, 

去佢地觀塘既office見工。



見工當日，

我朝早七點就起咗身。

因為前一晚緊張到訓得好差,

九點前去到見工果座大廈,

仲有成個鐘, 





就響附近茶記食個早餐, 

老豆教落, 

做大事前, 

飲杯齋啡定定驚先,

我果朝早飲左兩大杯, 

一齊準備就緒, 

一支箭咁直上去見工,





叮...

8樓出𨋢, 

一眼就見到：

啟昇工程有限公司

紅底白字招牌。

行到門前, 

深呼吸一下, 

㩒鐘叮噹叮噹,





幾秒後, 一位聲音雄壯, 

身型魁悟既中年大漢打開門問: 

哥仔, 有咩幫到你?!

此時我又緊張起來, 

吞舌吐吐, 

垂低個頭: 我..我..叫方晉堯, 

約左今日十點見工.





中年大漢回應道: 

哦...入嚟,入嚟,入嚟先講, 

順手閂門丫唔該.

四周堆滿工具同零件箱。

空氣仲帶住陣機油味。

最後入到一間細細既經理房。

中年大漢就先開口: 

細佬, 你叫咩名話?! 

啱啱讀完書呀?!

嗱, 我就叫大強, 

係哩間公司既老闆, 

D伙計都叫我做大強架喇.

我連忙遞上CV:

老闆你好! 我叫方晉堯, 

啱啱響IVE汽車工程畢業, 

哩份係我既CV, 

你要唔要睇下?

強哥連睇都冇睇，

直接推返俾我。

「得啦得啦。」

「唔使睇CV啦。」

「我哋又唔係請科學家。」

佢向後靠一靠。

點起支煙。

「我哋主要做商業大廈冷氣維修工程。」

「而家差個人留響公司。」

「管理工具、訂物料、聽電話。」

「簡單講，就係幫出面班師傅做後勤。」

「邊個要工具，邊個要材料。」

「你幫手準備好。」

「等佢哋返嚟攞。」

「朝八晚六。」

「人工八千。」

「年終雙糧。」

「試用期一個月。」

「你得既就下星期返工。」

「你要唔要返去同屋企人商量下?!」

其實我根本冇考慮太耐。

甚至可以話，

由聽到「八千蚊」開始，

我已經決定咗。

於是即刻點頭。

「我做。」

因為我好需要儲錢, 

盡怏儲夠錢響Garcie響澳洲第一個假期,

我有能力買張機票去陪佢幾日.