萬金油與孺子牛（第三季）此中有真意: 9

「啤酒…」
侍應放下了啤酒、和兩隻冰涼的雞公碗。這個年代，已經很少大排檔使用雞公碗喝啤酒。

「梁德言，你記唔記得果陣我入咗恆榮MT過咗probation果陣，請你去食嗰間大排檔，都係用呢個款嘅雞公碗啊？…」她拿起碗，全方位檢視著。
「記得…」我微笑了。
望著她、這款品牌啤酒、雞公碗，思緒進入了記憶迴廊…………

「德言哥哥！呢邊！」
穿著貼身短袖上衣、熱褲的Kerry已經佔好位置，揮手叫我過去。
「呢間大排檔個沙拉骨同椒鹽鮮魷好好食㗎！呢個……你會唔會有咩唔食啊？……」Kerry －直都很喜歡吃。幾乎每一次來我辦公室找我，她都總會帶着粟米片、或者朱古力，問我吃不吃。





Kerry除了外表和身形是男人喜歡的類型。對於她的率真、智慧、超凡的能力，我是特別欣賞。在她身上，一直以來，我彷彿看到大學畢業時的自己。雖然我們相差26年，但她和我，永遠也有說不完的話題。她很了解我，商業趨勢、工作、還是感情，我和她，也很夾……

「我過咗Probation啦。所以…多謝你！」她吃了一口骨，望向我。
「我都冇做過啲咩。你本身能力就好強，過probation本來就係一定事。你應該多謝你自己。」我和她相望，我認真地微笑。
「我多謝咗我自己㗎啦～我買咗部新相機…」她高興地掏出相機遞給我：「佢話喺呢個品牌所有系列最輕㗎！可以方便旅遊拍攝……」
我看著相機，按開了開關，隨手拍了一張她的樣子，然後看看。

「喂呀！你俾我睇吓你影咗啲咩先…」她想拉住，我笑著不讓她看。她還是看到，之後緊張地拭了拭嘴角：「快啲刪咗佢啦！」
我搖搖頭，滿意地望着這張相片，又望向她：「我覺得好好睇、好自然喎…」




她耳朵紅了：「咩意思啊？」
「就係好睇…」我不想把相機還給她。她皺起眉頭：「我都未用過…」
「曬咗張相之後俾返你。」我微笑，吃了一口飯。
她趁這段時間奪走了相機，拍了我一張正在吃飯的相片。

「拿～一人一張！打和！」她得戚地笑著。她的笑容，－直都很好看。「最多一陣食完飯，我哋去晒相？」她與我對望，氣氛有點不一樣。

「啤酒到！」
啤酒、雞公碗到了。
「靚仔，唔該！呢個碗唔凍…」「我幫你換過佢…」




「德言哥哥，呢度最出名就係用呢個方法飲啤酒！」
「我大過你架傻瓜！」我邊吃邊望向她。
「我知啊…」她似乎不太喜歡我說這個話題，她再說：「大過我又點啊？咪又係要食飯！」
我被她逗笑了。這個林泳昕，真的……

碗來了，她斟了一杯給我和自己。我主動舉杯向她：「好啦，就預祝你喺恆榮一帆風順，步步高陞。」
「多謝～」她和我碰杯，又對我說：「咁我祝你公司嚟緊收購嘅事順順利利～」
「承你貴言。」

不算喝了很多碗，她臉頰和耳朵已經有點紅。不知什麼時候，我們坐的距離也拉近了。
「你啲酒量咁弱，第時點同人傾生意啊？林經理？…」我溫柔地望向這個和我距離近了的她。
「經理？」她的聲線、眼神比清醒時柔和，拓著頭望向我：「係咪要做8年先上到㗎？…」
「以你嘅能力，MT program完咗，要做副經理都冇難度。仲有Donald呢個哥哥睇住你，唔使八年咁耐…」我喝了大半碗酒。
「真嘅？」她笑容很甜美，半瞇起眼望著我。氣氛再次曖昧起來。





「不過呢…Donald唔係哥哥，係叔叔…」她忽然補充。
我有點失落感。她又烘近了我一點：「但係…你係哥哥～」
我有點暗自高興，但不明白，反問：「但係佢大我三年咋喎？」
「因為…」她用手指示意我烘近她耳邊。我烘近她，她在我臉頰旁邊說：「你靚仔過佢……好多……」

我剛剛心中高興，動了一下，不小心令她唇瓣碰到我左邊面頰。我呆了，和她只有一個拳頭的距離，曖昧地對望著。
她已經有點醉意，醉眼望向我。