生於現代嘅靚女武俠對我有興趣？: 第一章。二

第一章。二

「你話武俠。。。好似武俠小說同武俠電影入面嗰啲武俠？」

「係，就好似嗰啲咁，不過啲電影同書都係美化過我哋嘅存在。」曉晴就好似敘述緊常識咁同我講。

「所以你識。。。功夫，唔係。。。。武功？」我仲係唔相信曉晴所講嘅說話。

「差唔多，你哋大眾文化叫武功，但其實我哋都係叫開功夫。」





「功夫。。。但係。。。。。」我有好多問題想問但係又唔知問邊樣先。

「一係，我俾你睇？」曉晴見我面帶疑惑。

佢企起身，緩緩伸咗個懶腰。

我微微咁點咗下頭，眼神充滿住期待但同時又覺得冇可能。

「跟我上嚟，小心啲。」曉晴徑自行上咗客廳同我啱啱所見類似歷史展覽廳中間嘅樓梯，老實講佢唔行我都唔知有條樓梯。





我慢慢咁企起身，嘗試活動下身體，頭部依然仲係傳嚟陣陣痛楚，但係好奇心令到我即使疼痛都跟隨曉晴走上樓梯。

二樓對比起樓下反而正常好多，冇中古交錯客廳同歷史展覽廳，都冇陳舊嘅擺設配搭摩登嘅傢俬，而且樓底嘅高度同環境俾人感覺唔似係室內，驟眼睇似有兩層樓咁高。

但係正常係指比起住嘅地方佢更似一個武館，一間啱啱經歷完大戰嘅武館，而正常都只係佢冇任何突兀感而已。

地上出奇地係全木板鋪成，上面有啲地方凹凸不平，有啲就好完整好似新嘅一樣。而牆卻係由水泥砌成，靠牆有幾條鐵嘅長條鑲嵌係牆上，鐵條上面有住大大小小唔同嘅手印同腳印。

我望向二樓嘅另一邊，見到原本應該係窗戶嘅地方用木板封住咗，應該就係我暈之前見到爆開嘅窗。





「行嗰陣小心啲，塊地唔平。」曉情嘅說話打破咗我對二樓嘅觀察。

「哦。。。」

「呢邊。」曉晴一邊講一邊行去一個幾個好似攀石架圍住嘅位置到，途中熟練咁避開木地板每個凹陷嘅位置。

而我都攝手攝腳咁避過凹陷嘅位置慢慢行去曉晴嗰邊。

正常嘅攀石牆應該係一幅牆，上面有大小唔同嘅石供人攀附係上面再爬上頂。但係眼前嘅唔似普通嘅攀石牆，而係類似攀成牆嘅物體，因為上面嘅依附點唔足以俾任何人嘅手捉住，而且表面仲要係凹凸不平，就好似一舊俾人不停用鎚仔鎚打過嘅鐵咁，而且係幾塊圍起咗一個範圍。

行到埋去，攀石牆嘅位置，每一個塊都好似一塊鐵做既圓柱延伸到地上，而望上頭頂，更加見到圍住嘅中間上面有一塊碩大嘅石頭，上面出奇咁圓滑，只能夠隱約見到有零星嘅手印同腳印。

奇怪嘅係，呢度起碼有兩層樓高。

「你企出去小小。」曉晴將我從好奇之中拉出嚟。





我聽從曉晴嘅指示，心入面無比嘅緊張同期待。

「聚。」曉晴微微打開雙腳扎起奇怪嘅馬步，雙手一上一下舉至身前，打開雙掌以微曲嘅姿勢係空中畫出一個8字，動作好似耍太極，但係速度極快而且乾淨俐落。

我隱約聽到曉晴嘅呼吸聲。。。。唔係係風聲？

突然曉晴雙掌由放鬆嘅姿態繃緊，一掌打落圓柱體上發巨大聲響，然後再接數掌，再度發出聲響，而圓柱上面亦應聲多出幾個掌印。

未等我驚訝完嘅時候，曉晴一躍而起，一腳輕輕踏喺剛剛打出嘅其中一凸處，而雙腳好似裝咗彈弓咁由眼前嘅鐵塊彈去對面嘅另一塊，姿態輕盈，扎起嘅高辮應都順住佢嘅動作飛舞起嚟。

接近之際，曉晴扭轉姿勢以作落點再度踩住另一鐵塊嘅突出處，借力躍上天花板向頂上嘅石頭再一掌打落去，然後順勢踏住圍繞嘅圓柱體數步落返地面，成套動作好違反常理，但又好自然。

曉晴落地後慢慢咁長呼一口氣，而佢係啱啱一連串神奇嘅動作之後亦都臉不紅氣不喘咁行過嚟我到。





「而家你信未？」曉晴頭微歪，語氣好似一個自豪嘅小朋友展示成果比唔相信佢嘅大人睇咁樣。

「武功。。。」我目瞪口呆咁望住曉晴，嘴入面只能吐出兩個字。

因為眼前嘅景象對我如幻似真，頭上嘅劇痛早已拋諸腦後。

眼前嘅係一個真正嘅武俠。

少女輕輕一笑作我啞口無言嘅回答。