生於現代嘅靚女武俠對我有興趣？: 第一章。三

第一章。三

「真係。。武功？」我望實幾條嘅圓柱體，思緒仲因為啱啱見到嘅事難以置信而自言自語。

「你係到吱吱唚做咩啊。」曉晴收起微笑換上疑惑嘅表情靠過嚟問我，佢靠過嚟嗰陣仲聞到一絲微微嘅香氣。

「嘩。。。！」我喺度運轉緊發生咩事嘅時候俾曉晴突如其來嘅靠近嚇親，頭上嘅冰袋都跌咗落地。

「。。咩。。。事？」唔知點解冰袋一跌落嚟我就頭暈目眩。





「小心，袋。。。冰晶。。跌。」未聽到曉晴講晒成句我就突然頭一重暈低咗。

一覺醒來已經第二朝早，我起身又係喺返尋晚樓下張床到。

「哈囉？曉晴？」我環顧四週都唔見曉晴嘅蹤影。

我攞起床頭嘅手機，睇嚟係曉晴放係到，仲叉緊電。

我打開手機一睇，已經係早上10點，我又昏迷咗成晚，我不禁感興趣曉晴打我嗰掌有幾重手。





手機上面彈出幾條我朋友老文嘅訊息，而就係佢介紹我去見工。問我去咗邊做咩成日唔覆機。而我只能夠回覆佢見工失敗作應對。

因為我仲喺度思考緊尋晚發生過嘅事。

諗到呢到，我下意識摸下尋日腫痛嘅頭。

「咦？」

尋日原本仲劇痛難忍嘅位置已經冇事，好似冇發生過咁。





我急忙檢查自己嘅身體。的而且確仲係着住尋日朝早出門口嘅衣着，即係話我成晚都留咗喺度，但係點解我咁快會好返？

「醒咗啦阿勇？」突然嘅聲音打破咗我嘅沉思。

「有冇好啲咁啊你？」曉晴喺廚房度探出頭，然後用響亮嘅聲音問我。

「好好多啦已經。」我都大聲回應。

「咁你等等啦，我整埋早餐就出嚟㗎啦。」話畢曉晴就縮返個頭入廚房。

「冇事就起身過嚟食早餐啦。」冇幾耐，佢就捧咗兩個碗出嚟放喺客廳嘅枱面。

我都好快起咗身就埋咗去餐枱。

對比起尋晚，曉晴似返個普通嘅女仔，冇紮起高辮，換上咗一身居家睡衣，嘴邊隱約見到仲有少少牙膏嘅痕跡，冇咗幹練嘅感覺，反而令人覺得越加可愛，令到我都不禁望多咗兩眼。





「算係我少少補償，唔知啱唔啱你食。」

「係炒麵？」我望住曉晴啱啱放低嘅兩碗麵。

「唔係普通嘅炒麵，係我嘅獨門秘方炒麵，唔係個個有得食㗎。」曉晴嘅語氣中透露住對自己作品嘅自豪感。

我點咗一下頭，然後拉出餐凳坐低。

「哇。又真係幾好食喎。」我比第一啖麵驚訝到，估唔到一個咁奇怪嘅地方，一個咁奇怪嘅人，可以炒咗咁好食嘅麵。

曉晴都露出自豪嘅微笑，然後低頭食麵。

「尋晚。。。我冇發夢。」我率先打破沉默。





「你有冇發夢？我點會知？」

「我意思係你喺樓上做嘅嘢，武功。。。」我有啲唔好意思咁樣問出口，因為到而家我都係難以置信。

「你仲係唔信？」曉晴拗咗下頭，可能佢都覺得做到咁樣我仲係唔信係好出奇。

「唔係唔信，只係。。。我一陣可唔可以上去睇吓？」我強烈嘅好奇心再度燃起。

「可以啊。」

作為一個有正常物理常識嘅人見到一個人一跳有成層樓高，有邊個會相信係真？

食完飯收拾好我就迫不及待咁樣同曉晴走咗上2樓，然後走去尋晚嗰幾條圓柱體到。

仔細一體鐵黑嘅外表透露住微微金光。





「我。。。可唔可以摸下。。啲柱？」

「柱？哦，哈哈，隨便。」曉晴可能都俾我叫佢哋做柱有啲奇怪，我相信佢哋應該有特別嘅名。

「呢啲係。。。。咩嚟，鐵？」我伸手撫摸着尋晚曉晴打落嘅掌印同埋佢造成嘅凹凸位，再下意識諗起自己個頭，俾人打腫可能已經係最好嘅後果。

「佢叫做烏金棖，係我哋練功用嘅。」曉晴喺我身後同我解釋。

「烏金棖。。。係點做到。。。」我摸住曉晴用掌打落嘅位置感受其掌印，以及其他密密麻麻嘅唔同印記。

烏金帳嘅觸感同一般嘅鐵冇分別，就好似小朋友公園入面嘅馬騮架咁，只要撞到就痛到不得了嗰種。

而曉晴竟然可以係呢啲烏金棖身上留低咁深嘅掌印，甚至乎改變佢嘅形狀。





「我咪同你講咗我係武俠，我識功夫㗎。」曉晴用一種好似再正常不過嘅語氣同我講。

我印象中嘅功夫，絕對冇可能做到咁，踢木板，打瓦片等等已經係我認知中功夫嘅極限，絕對冇可能將咁堅硬嘅金屬打到改變形狀。

我抬頭望向比幾條烏金棖圍住嘅一塊布滿各種痕跡嘅圓形石頭。

「仲有你尋晚係咪。。。飛。。。咗上去。」我對於形容一個人用飛呢個用詞感到錯愕。

「唔係飛，我係用凌跳上去，簡單啲講即係你哋喺電影入邊所講嘅輕功。」

「輕功。。。？」我比曉晴嘅回答再度打碎我對現實嘅認知。

「仲有上面嘅掌印，拳印同埋 ，腳印？係咩嚟」我仔細咁樣觀察圓形石頭。

「嗰塊係大理石，就係最常見嗰啲，都係俾我哋練功用嘅。」

「係點樣踢到上去。。。呢度起碼有兩層樓咁高。」

「我尋晚唔係示範咗俾你睇咩？」曉晴歪過頭，感覺就好似講明明都俾晒你睇，點解仲咁多嘢問。

「究竟係咩功夫？可以做到咁嘅效果。。。」

「我練嘅係閻拳囉。」

「閻。。拳？」