生於現代嘅靚女武俠對我有興趣？: 第一章。四

「係啊，係我哋閻家嘅功夫。」

「你哋練功嘅方法都幾特別。。。」我望住二樓嘅環境不停係到回想曉晴練功嘅場境有幾震撼。

「你話我哋閻家。。。係咪你屋企有其他人？」

「我哋閻家目前得返我同我阿哥。」

「阿哥？」





「阿哥功夫比我更厲害，不過佢好少返嚟。」曉晴作狀擺出練功架勢並有啲自豪咁講，著住睡衣嘅佢嬌小玲瓏，此刻有種可愛嘅反差感。

「仲可以勁過你。。。？」對我嚟講打到嚿鐵變形，一跳成層樓咁高已經好誇張，仲有得勁。

「同埋係阿哥幫你醫返好個頭。」曉晴伸出纖細嘅手指指住我個頭尋日俾佢打腫嘅地方。

「係喎，點解可以一晚就好返。。。」我摸住自己個頭問。

「本來我尋日唔小心用氣打傷咗你。。。」曉晴講到呢度都不禁吐舌掩飾尷尬。





我只好攞出冇所謂嘅表情點咗兩下頭示意佢繼續講落去，況且吐舌嘅曉晴睇落都幾得意。

「我已經即刻用濡寒冰晶同你敷住佢㗎啦，但係我唔識用所以只能綁住係你個頭到頂住。。。同埋我都真係太重手。。。」曉晴越講越細聲。

「唔。。。唔緊要啦。我都冇事囉，哈哈。」原來唔係普通冰袋，我只能苦笑作結。

「好彩尋晚阿哥返咗嚟，佢用真氣配合你就即刻好返啦。」曉晴急忙搭話。

「哦。。。真氣啊。。。」我又一次比曉晴所講嘅用詞搞到我無言以對。





「我功夫始終都唔夠火候。。。尋日練功失敗仲要搞到你咁。」曉晴一路講一路摸住烏金棖另一對更深嘅掌印，睇嚟應該係佢阿哥練功留低嘅痕跡，再望向已破損嘅窗戶，神情有小小唔開心。

「冇問題嘅，有志者事竟成啊嗎。。你一掌都打到我暈咗成日囉，下次你咪打甩我個頭囉。哈。哈。。」我見曉晴講到心情低落，希望用笑話嚟氹吓佢。

「。。。。。」曉晴努力擠出微笑，但睇落對於佢功夫唔夠好一事好在意。

「話說你尋日練咩練到爆晒窗咁啊？」我嘗試改變話題走向用木板封住嘅窗戶。

「哦。。我尋日練嘅係破雲掌。」曉晴徐徐走過嚟。

「破雲掌？」

「係我哋閻拳嘅高階功夫。。。但係我一直都練唔好。。。。」曉晴講到呢到心情好似更加低落，我真係講嗰句錯嗰句。

「係呢仲有。。。」我再





『叮。。。』突然我手機響起鈴聲。

「唔好意思。。。我聽個電話。」

曉晴點咗下頭然後轉頭望向封住窗戶嘅木板。

『喂你死咗去邊啊，差唔多死兩日冇出現，又唔應機，公司嗰邊又話你見工放飛機，發生咩事。』電話裏頭傳嚟老文嘅聲音。

『ehhhh…發生咗啲事，我再同你解釋。。。。』原來我不知不覺都已經係曉晴屋企渡過咗一日半，而且我都俾曉晴係現代武俠呢件事不停勾起我嘅好奇心。

『有咩咁大件事工都唔去見？又話老虎蟹都要搵工。』老文嘅聲音再次傳出，雖然冇責備嘅意思，但係感覺上對我有啲失望。

『唉唔講住啦，今晚食飯再慢慢同你哋講啦。』因為我都知道喺電話入邊係講唔完，所以只能敷衍應對。





『唉，你話點就點，記住今晚要到，食飯唔好放飛機。』

『知道啦，拜拜。』

『拜拜。』

收線之後我睇一睇時間，原來已經下午2點幾。

「曉晴，我要走先啦，今晚仲約咗人。」我打斷望住窗戶沉思嘅曉晴。

「係喎。原來你都留咗喺度好耐，浪費晒你啲時間唔好意思。」曉晴都攞出手機睇一睇時間，驚覺原來都過咗咁耐。

「唔使唔好意思，我都問咗好多問題打攪住你。」

「冇事冇事。」





我借曉晴嘅廁所輕輕梳洗一番，收拾好自己嘅物件準備離開。

「如果你個頭仲有咩唔舒服，記住返嚟，我會幫你醫好佢。」臨走前曉晴喺門口有啲焦急咁樣同我講。

「其實都已經冇事啦，唔使太擔心。」為咗令到曉晴放心我係輕用手拍咗自己個頭兩下證明。

「係就好啦。」曉晴露出寬慰嘅笑容，此刻嘅佢格外動人。

同曉晴道別之後，我就搭車返屋企，途中不停回想起呢兩日發生嘅事，轉下眼就已經返到屋企，沖咗個涼就迫不及待打開電腦，想查找一下關於曉晴所講閻拳同武俠嘅嘢，奇怪嘅係咩都搵唔到，好似佢哋根本唔存在存，而我只係拍咗場夢。

當我將搜尋結果滑到最底，見到一篇文章上令我震撼到瞪大雙眼嘅標題。

『閻家拳館·殺人拳館』