生於現代嘅靚女武俠對我有興趣？: 第一章。五

殺人拳館？！

我帶住錯愕嘅心情click入去。

文章係由一間報館所推出，而且年代都有啲遠，差唔多都有十年。

“閻家拳館·殺人拳館”
“一所古怪的拳館竟然傳出殺人駭聞？”
“據調查，位於XX巷的閻家拳館是擁有近50年歷史的老拳館，這些年亦一直有不少有興趣市民到訪拜師學藝，但閻家拳館離奇地拒收任何門生，直至近一年前打破常規收授一名男子，同時亦是本案件的死者，黃旭明”





“據警方所說，黃生前是個功夫狂熱者，家中放滿功夫電影海報，功夫有關的物品，武俠小說等等。並自小學習不同種類的武術，例如跆拳道，空手道，各種中國武術等等。而於半年前機緣巧合之下黃找到閻家拳館並成功打破其不招生的傳統成為其閉門弟子。”

“可惜的是，黃於上星期四晚上八時許於XX巷對外的XX街被一名剛下班的路過市民發現倒斃於路邊。警方到場時黃已無生命體徵，並確認當場成亡。黃身上充滿各種傷痕，並初步了解是由人手以拳腳毆打而成，離奇的是，死者面部損毁嚴重，警方以調查其身上身份證明才能確認身份。而為此案件添上一分神秘色彩的是，於死者倒臥的地上寫着閻拳及死人四個字，貌似直指於數米XX巷內的閻家拳館。本報記者亦曾嘗試從閻家拳館負責人詢問相關事件，唯除警方外拳館負責人一概不見。”

報道到呢度就結束咗，而當我想搵其他相關嘅報道都已經搵唔到，就好似冇任何後續咁。

我帶住疑惑嘅心情不停咁喺網上搜尋相關字，但全部都係唔關事嘅搜尋結果。

『叮。。。』





喺呢個時候嘅手機響起，我拎起一睇，係老文佢傳嚟嘅信息。

『我哋差唔多到，你到邊？』

我睇一睇手機上顯示嘅時間，原來已經不知不覺過咗幾個鐘，就到約定食飯嘅時間。

『差唔多出門口。』我快速覆咗一句之後換衫就衝咗出門口。

「有冇搞錯，又遲到。」老文帶住嘲諷嘅語氣對住遲到嘅我講。





儘管我已經用最快速度趕去約定地點，但無奈我出門時間實在太遲都係遲咗到。

冇幾耐，我就講到我哋約好嘅大排檔。

「唉請食飯啦。」另一位朋友阿基附和老文。

「好啊好啊，搵日啦。」我帶住假笑回應住佢哋。

當然呢啲都係我哋嘅相處模式。

冇幾耐，枱面就上滿食物，我哋幾個都即刻大快朵頤。

食飯途中老文就問起我見工失敗一事，而我都一五一十咁樣講出發生嘅所有事。

「大哥，你係咪發夢，唔想見工唔使咁樣作故仔喎。」老文聽完第一個反應同我想像嘅差唔多。





「所以我先話電話同你講冇乜用，但係你信唔信都好我所講嘅都係真事。」

「唔係啩，真係有人識武俠小說入邊啲武功？」阿基都忍唔住問咗句。

「我初頭都唔信，但係我睇到嘅真係好似電影入邊咁，冇誇張到。」

「咁聽你咁講，佢冇一掌打死你都幾好彩喎，哈哈。」

「係嘅我諗。。。」我頓時諗返起啱啱喺屋企睇嘅嗰篇新聞報道。

同埋曉晴嘅面容。

「先生，你係咪話閻家拳館？」突然我感覺到都一隻手搭咗喺我膊頭上問我。





而我嘅身體都一下子僵起咗。