上個世紀末的一些人和事: 第五章 | 大家都係

十二月，日間氣溫二十度樓上，
夜晚，都有十九。
 
大家照舊聚集，維持夏天嘅裝束。
籃球場啲燈閃咗兩下，個場一半光一半暗，
佢哋繼續打波，拖鞋一早踢埋一邊，
笑聲滿場。

「嘩！睇下嗰邊？」
阿豪面向對手，但眼望左邊，




對方本能地左望，
但阿豪右手已經將波彈地交俾係佢右邊跑過嘅細強。
 
「有鬼！」對方隊友大嗌，
但已經太遲。
 
阿強接過，立即反手捹個波去籃底。
阿俊彈跳離地，凌空接住，再起手一射。
 
籃框無網，雖然無聲無息，但勝負已分。




 
阿玲喺場邊跳起，
「好嘢！」

有人企喺場邊拍手。

「喂——仲有冇位加一個呀？」

大家停低，轉頭一望，愣咗一愣。





「陳sir？！」

企喺鐵網外面嘅，竟然係佢哋學校嘅老師。
 
平日見佢着普通裇衫西褲返學，冇乜架子，
大家都幾鍾意佢。
不過今晚嘅陳sir係着住唔同色嘅運動衫褲，腳踢拖鞋，
好明顯就係落樓買嘢路過。

「原來你都住呢度㗎？」
細強忍唔住問。

陳Sir笑笑，指指對面嗰座樓：
「由細住到大。」





氣氛突然冇咁拘謹。
老師企喺度，
但個造型又同大家冇乜分別。

「嚟啦，唔好客氣。」
阿俊將個波拋過去。

陳sir接得好順，一落場就帶波、走位，
雖然冇佢哋咁快，但動作好實在。
佢射入第一球嗰陣，女仔們都忍唔住拍手。

「阿 sir好得喎！」
阿敏嗌到好大聲。

打完一場，大家一齊坐喺場邊喘氣。




陳sir拎住件底衫抹汗，望住籃框，
忽然講：
「其實我以前，都同你哋差唔多。」

大家變得好留心。

「我中學嗰陣，都喺呢個場打波。
屋企細，阿爸阿媽又成日嗌交，
覺得落樓先有位呼吸。」
 
佢停一停，
「嗰陣我都以為，
自己一世都走唔出呢個屋邨。」

瑩瑩細聲問：




「咁你點解又返嚟教㗎？」

陳Sir笑得好平淡：
「我其實冇乜計劃。
成績唔係叻過人，事事要一步一步嚟。
兩年師範，兩年文憑，
發現自己真心鍾意教書。
唔想去教啲已經乜都識嘅人，
反而係想幫一啲唔知自己想點嘅學生。」

佢望住佢哋幾個，語氣認真咗少少。

「我知你哋有時會覺得，出身已經輸咗。
但我想你哋記住——
你哋而家有朋友、有衝勁、有地方可以跌同再企返起身，




呢啲唔係個個有。」

肥仔輝聽到，點咗下頭：
「原來阿sir以前都係屋邨仔。」

「而家都係。」陳sir笑住補一句，
「只係身份唔同咗啫。」

停咗一停，陳sir望住大家。
「我問咗校長，佢都支持攪籃球隊，
我教。」
 
 一眾男仔立即起哄，個個爭住舉手。
 
「要日日練波，仲要打比賽㗎。」
陳sir笑住講。
 
「已經做緊！」
眾男齊答。

陳sir再笑笑，起身返屋企，
上樓前轉身揮揮手：
「下次再打，記得預我。」

「Yes, sir！」阿豪大叫。
 
老師嘅背影消失喺樓梯口，
籃球場又只剩返佢哋。
 
阿俊望住籃框，突然覺得，
未來唔再只係想像。
原來有人真係由呢度行出去，
之後又因為呢度嘅一切行返嚟。