上個世紀末的一些人和事: 第二十章 | 冬菇亭內

「各位早晨，今朝嘅新閒內容……」
「電腦千年蟲事件告一段落，全球各大小公私營機構，並冇出現事故，有人質疑千年蟲係無中生有……」
 
祥哥喺廁所行返出嚟，
一邊縛褲頭，一邊下意識望向張床。
 
果然，阿誠仲瞓得好淰，
完全不受電視聲影響。
 
祥哥呢個動作，日日如是——




佢行過去，幫個仔拉好張被。
 
但今日，祥哥冇即刻轉身走。
佢企喺隔離，認真望住個仔。
 
短短幾個月，佢好似變咗另一個人。
 
以前
嗰個皮膚白、無肉地、成日縮起膊頭嘅細路，
而家




膊頭横，手臂粗，小腿硬似石，
黑黑實實、粗粗壯壯、腳底起繭。
 
每晚同阿爸返屋企，
阿誠都係拖住對腳，喺走廊度慢慢磨返嚟，
好似行屍走肉。
 
沖五分鐘涼，連衫都唔著，拉起波褲就撻落床，即刻訓著。
早幾個禮拜，寒流襲港，一切如是。
只要佢落場，就一定係咁。




 
即係話，日日都係咁。
 
祥哥心入面有刺。
佢本來想保護個仔，唔想佢過呢種生活。
 
但佢失敗咗。
 
不過，喺嗰份歉疚入面，佢又忍唔住有啲開心。
 
至少，佢搵返個仔。
至少，佢而家真係喺度做老竇，唔再係一個只識出手嘅影子。
 
如果佢一生人，做啱過一件事——
可能就係呢件。




 
---
 
喺冬菇亭做，要能人所不能。
 
天未光就要收貨，落街市、去糧油舖，買米，買油，買罐頭。
樣樣都係用手，又抬又捧咁攞返檔口。
 
洗、切、斬、醃。
溝汁、煲茶、洗米、煮糖水。
 
阿誠跟住祥哥同伙記，邊行邊學，邊做邊頂。
 
中午開市，祥哥企喺佢後面教路，佢前面個火爐就冇停過。
下午收檔，搬晒所有嘢去俾洗碗阿姐。




五點開始，就係另一場戰爭——
斟茶、遞餸、執枱、找錢、有時仲要落手洗下碗。
 
直到十一點，終於可以收爐、洗地、收返晒摺枱摺凳入舖頭。
做完，啲伙記通常會圍埋，一人一支煙。
 
以前，阿誠最憎煙味。
而家，佢開始明。
 
呢種攰，係會想要一個出口。
一口煙，好似真係可以，呼走一啲嘢。
 
今晚，有伙記遞咗一支俾佢。
 
佢拎起火機，準備幫阿誠點——




 
祥哥伸手，一下攞走。
 
「我話要為你戒煙嘅。」
佢笑住講，「你唔可以自己偷食。」
 
阿誠想頂嘴，但冇。
佢知道，
阿爸啱。
 
呢幾個月，佢學識咗點做生意，
但學得更多嘅，係點樣做人。
佢終於明白，點解祥哥以前會係咁。
佢甚至覺得——
如果係自己，可能都會一樣。




 
而家，佢唔再係個，只係被照顧嘅人。
佢企喺阿爸身邊，見到佢點樣撐住呢個擋口，點樣默默為屋企付出血汗。
 
原來，
阿爸一直喺度。
 
只係佢以前
冇去望佢。
 
---
 
祥哥輕輕搖醒阿誠，話佢知要落去開檔。
 
平時，阿誠要輾轉反側幾分鐘，先坐得起身。
但今日，佢一下就彈起身。
 
祥哥一愣。
「有咩事？」
 
阿誠於是講咗噚晚，冬菇亭後面開片，
講起嗰兩個女仔，點樣救咗啲細路。
 
講到最後，佢入正題。
 
「阿爸……」
「點解……
我哋同後面檔口，隔離鄰舍，但係冇乜交住？」
「……咁問係因為……
我想識下……喺後面檔做嘢嗰個女仔。」
 
祥哥深吸一口氣。
眉頭，
慢慢皺起。
 
阿誠一睇就知。
 
果然，
原來唔係唔識，
而係所謂，有歷史遺留落嚟嘅問題。
 
阿誠心一沉。
 
如果係咁——係咪即係話，
佢同女神，冇乜可能？