上個世紀末的一些人和事: 第二十四章 | 老公老婆
今日，瞓喺陳sir間房張床上面，
感覺有啲唔同。
婉兒以前都喺呢張床瞓過無數次。
通宵傾計，隊完酒，或者改卷改到癲之後——
攰到唔知自己喺邊，就自然咁攤埋一齊。
通常第二朝起身，陳sir阿媽已經整好兩個人嘅早餐，放喺飯枱。
「你哋醒嗱？快啲食咗先返工。」
陳sir屋企人對佢好好，
好到好似照顧隔離屋個細路女咁，
有時甚至真係當佢係自己個女。
婉兒一直都覺得，
喺呢度，佢可以做返嗰個私底下嘅自己——
唔使長大、唔使成熟、
自由、任性、唔使負責。
喺Band 1學校入面，佢係老師。
講嘢要穩重，表情要冷靜，
對學生要有威嚴。
但一除低嗰套「返學衫」，
佢就變返嗰個仲未想長大嘅少女。
——直到今日。
今日，
佢係陳太。
呢個稱呼，改變咗好多嘢。
阿媽之前同佢講過：「做人新抱甚艱難。」
嗰陣佢笑笑口，冇放喺心。
而家，
瞓喺陳sir張床——唔係，應該叫「佢哋張床」，
同埋間房外面嗰個唔再係auntie，而係奶奶……
突然明白咗阿媽嗰句至理名言，
當中嘅重量。
——
陳sir坐喺廁所，做緊每朝嘅例行公事。
唔係第一次當婉兒喺房瞓覺時，佢出嚟辦事。
但係今日，佢覺得有啲唔自在。
佢覺得，而家將婉兒一個人留低喺房，好似係喺佢最需要保護嘅時候，
離開咗佢。
明明佢唔係第一晚喺佢張床到瞓，明明屋企人都清楚知道婉兒係邊個，
但係今朝，
佢覺得，好似大家要再互相介紹多一次咁……
回想噚日。
玩新郎被折磨到成身汗。
差啲因為塞車趕唔切去註冊。
冬菇亭嘅酒席超級好味。
仲有，佢哋兩個著住紅色套裝睡衣同拖鞋送客，
街坊一個個影相，祝福佢哋。
一切都好warm、好真。
到夜晚，攰到散晒，
但係佢知道——嗰日係佢一生入面最開心嘅一日。
佢亦睇得出，對婉兒—唔係，係老婆—嚟講都一樣。
至於尋晚……
佢心入面有啲歉意。
太攰，冇乜精神。
佢應承咗佢會補返。
但奇怪嘅唔係呢樣，
而係——
以前覺得自己專一，
為咗婉兒，樂意放棄一整個森林，
就代表自己係好男人。
但而家，佢第一次諗——
「就咁，其實夠唔夠？」
夠唔夠去做人老公，成家立室。
二十幾歲，好多時諗嘢仲似個高中生。
佢鍾意同啲學生混埋一齊，
多過同學校啲同事食飯傾計。
同埋班細路一齊，令佢有安全感。
甚至係一個避風港。
但係而家，佢已經係人夫，
揚帆出海，要由自己掌舵。
——
房門打開。
婉兒拉高張被，只露出一雙眼睛。
只係著住條波褲嘅陳sir，
行返入嚟。
婉兒望住佢，
笑。
陳sir知道佢諗緊乜。
佢瞓低喺婉兒身邊，輕輕𡃶咗佢臉頰一下。
「仲攰唔攰？」
「少少。」
「我尋晚真係太廢。」
「你玩新郎被人玩到差啲斷氣，唔怪你。」
「差啲畀你班學生整死。」
「你啲學生都有份。」
「今日開始，我唔敢再鬧佢哋體能唔好。」
「點解？」
「原來我自己都唔掂。」
兩個人一齊笑。
「不如話，差啲趕唔切準時到註冊處，嚇死我阿爸阿媽。」婉兒講。
「我以為你阿爸會即刻反悔。」
「佢可能仲諗緊。」
「喂。」
婉兒伸手戳佢。
「我哋要多謝阿誠就真，噚晚圍酒真係好好味，可惜冇乜時間食。」
「係，要多謝祥哥同文哥一味鬥一味，一味好食過一味。」
「送客嗰時，我真喺差啲喊。」
「你都冇嗯。」
「我死忍咋。」
笑慢慢停落嚟。
陳sir望住婉兒，見到佢眼入面嘅不安。
於是靠近啲，手指撥開佢額前啲頭髮。
「老婆，多謝您嫁比我。」
「你以後要提醒我，點樣做個好老公。」
婉兒望住佢，再笑。
恐懼未完全散，責任未完全消化。
但佢知道——呢個男人，願意為佢改變任何事。
呢樣，唔係是但求其一個人都會為佢咁做。
婉兒推低陳sir，騎上佢身，輕輕錫佢。
陽光透過窗簾縫，落喺床上。
被單拉起，
世界暫時消失。
——
同一時間，
樓下冬菇亭。
噚晚熱鬧散去之後，只剩下一地垃圾同餸汁漬。
阿俊阿哥間公司嘅人一早嚟拆走個舞台、背景板、燈架，留低一大堆雜物。
阿詩同阿誠喺兩邊檔口執手尾，瑩瑩叫埋阿豪落嚟幫手。
仲有兩個大廚要求加碼嘅火爐要搬走。
個爐前面放咗桶用嚟炸嘢嘅油，阿誠要先將佢搬走。
心諗應該搞得掂，但就係冇留意地下有塊地磚突起咗。
佢手一拖，桶底一撞，油就飛濺而出。
成地滑油，連隻腳同人字拖都賴晒嘢。
「仆你個街——」聲音響徹廚房。
阿詩同瑩瑩即刻衝過嚟，用報紙吸油。
阿豪一手抱起阿誠，拖佢去水喉嗰邊沖腳。
「你成日都咁遴迍！」阿詩一邊抹一邊鬧。
「我以為得㗎嘛……」
「下次搵我一齊呀！」
遠處，
祥哥同文哥一齊行落嚟開檔。
阿誠心一沉。
「阿詩，你帶瑩瑩走先。」
「做咩？」
阿誠嘴藐一藐祥哥方向。「等我自己搞掂。」
佢望住地下攤油，同埋啲報紙。
今次，可能好大鑊。