上個世紀末的一些人和事: 第二十七章 | 回頭已是

閂門，鎖門，行去㩒𨋢。
 
佢望住𨋢門，銅色鏡面反映住背後嘅大理石牆。
 
㩒𨋢，等𨋢，佢一日可能做幾次，本身唔應該係一件事。
 
不過，
今日唔同。
 
今日，佢舉步維艱，四周嘅空氣，好似被壓縮咗，重重咁喺佢個頭上面笮落嚟。





手袋裏面，電話響起。
 
「喂，娟姐。」
「係，我出咗門口，唔該晒你提我，一陣見。」

此刻手上，本來以輕取勝嘅Nokia 3210，變得好似成塊磚頭咁重。
 
𨋢門靜靜打開，一身素服嘅佢，行入去。
 




佢諗緊，到晏啲返屋企，再見返𨋢門嗰陣，
銅色鏡面上嘅佢，會係點嘅樣。
 
——
 
噚晚係阿詩第一次同一個男仔瞓埋一齊。
 
不過，
咩事都冇發生。
 




阿誠喺佢旁邊，滿面淚痕，
但係至少，佢有瞓著。
 
阿詩打側身，望住佢。𠵱一刻，阿誠個樣，好似佢讀緊初中嘅細佬，
表情安祥，嘴角彷彿有啲笑容。
 
佢喺度諗，點解佢會鍾意咗𠵱個細路仔。
 
感情嘅嘢，一向佢都冇諗。佢會考科科合格，Band 1中學出嚟，媽子老竇都叫佢應該繼續讀落去，但係佢唔想。
 
佢由細到大，都喺冬菇亭過，唔係被迫，係自己鍾意。佢鍾意啲師奶阿伯讚佢乖，讚佢叻女，幫手打理檔口。
 
喺學校，佢成績唔算標青，得過且過，當然唔會四處招搖，話自己係冬菇亭看檔。但係，喺檔口，佢事無大小，都有份參與，兼且係老闆嗰女，算有啲地位，令佢滿有自信，唔覺得自己，比起身家豐厚嘅同學差。
 
𠵱種感覺，對阿詩好重要，所以佢成日扮到自己好成熟，好獨立，好有主見，但係佢知道，




嗰啲，喺扮出嚟嘅外表。
 
內心嘅佢，仲係一個好想有人嗲，有人錫嘅細路女。
 
而眼前嘅阿誠，就喺一個，一啲都唔介意佢獨立、自主、男人婆，
而同時又好錫佢，好氹佢嘅人。
 
阿誠嘅「每日一星」，粒粒星星裏面，都寫咗一句詩，由開始到而家，阿詩已經儲埋成樽。
 
都唔知點解佢會考中文會肥佬！
 
阿詩真心相信，𠵱個儍仔，真係會，死心塌地，為佢做任何事。
 
所以今日，阿詩要好好守護住佢，因為
過咗今日，佢真係，得返自己一個。




 
——

出殯日，一早天色陰沉。

禮堂兩邊擺滿花圈，花圈後面仲有一行花牌，淡淡花香之外，空氣亦帶住啱啱燒嘅香燭味道。

阿誠企喺家屬位，白色衫褲染上幾撻污漬，喺噚晚跪喺屋企門口嘅結果。
整個靈堂，佢係唯一戴孝嘅人，噚晚人多唔覺，今日堂前，頓時有啲冷清。
 
唔駛返工嘅街坊，一個一個入嚟，鞠躬，上香，上前同阿誠輕輕握手。

「節哀順變。」
「你老竇好好人。」
「希望你會繼續做落去。」





阿豪、阿玲、陳Sir、婉兒都要上堂同教書。阿俊、細強、阿敏都要開工。不過，肥仔輝、瑩瑩、阿詩，就坐喺附近，默默守住阿誠。

文哥、文嫂、娟姐、同埋幾個祥哥一直幫襯開嘅老闆，唔開檔都過嚟。家屬冇人，佢哋就自發，喺後面個爐燒金銀衣紙俾祥哥。
 
「有客到！」

靈堂門口出現一個女人，着住剪裁俐落嘅黑色套裝，腳踏高踭鞋。
 
阿誠轉頭，愣住。
 
旁邊嘅街坊，紛紛耳語。

「佢老婆？」
「係啦，走咗好多年嗰個。」




「而家先返嚟？」
「着到咁……家屬唔係着白色咩。」

阿誠聽到，心裏面唔係好自在，自己亦唔知點應對。
 
女人上前。
 
「一鞠躬。」
「再鞠躬。」
「三鞠躬。」

女人轉向阿誠，但冇直望佢。
 
「家屬謝禮。」

佢轉身行向祥哥遺照前面，對住，上香，之後望咗好耐。
再轉頭，望住阿誠，已經眼泛淚光。

阿誠睇到，除即低頭望地，好想前面有個大箱，收埋自己。
 
女人行埋嚟，伸出雙手。
 
阿誠繼續低頭，冇回。
 
女人緊咬下唇，雙手，慢慢縮返身邊。佢垂低頭，步向訪客區。

阿誠望住，心慢慢沉落去。
原來就算喺呢一刻，
佢哋仍然係被劃開嘅。

出殯儀式開始之前，阿誠終於行過去。

佢企喺自己阿媽面前，好耐都冇開口。

「你嚟咗。」
最後只講得出呢一句。

阿媽抬頭望佢，眼神溫暖。
「我哋好耐冇見。」

阿誠想喊，但係佢叫自己要克制，忍住。
佢搖搖頭：「阿妹冇嚟？」

「我未話佢知。」阿媽知道，阿誠有責備之意，但事實歸事實。
「阿誠，事情過咗，不如我哋約埋見下。」𠵱句，佢真心真意。

「睇下。檔口好多嘢做。」阿誠聲線平淡。
 
「你不如……頂咗嗰檔口比人，可以搬過嚟同我哋一齊住。」阿媽依然，真心真意。

阿誠抬頭，望向另一邊，發現阿詩、文哥、文嫂，同埋娟姐，一早就留意住佢同阿媽嘅對話。
 
「我諗，我哋唔需要咁熟。」阿誠禮貌地笑咗一笑。

講完，佢行出大堂中央，準備出殯。

——
 
㩒掣嗰刻，阿誠腦海，一片空白。
 
佢望住祥哥嘅「車頭相」，突然發現，祥哥嘅遺容，一直都只有自己見過。
 
一塊焦黑嘅面，化妝師都話無能為力。所以，早前，靈堂上並冇瞻仰遺容，驚會嚇親一眾親友。
 
不過，對於阿誠，阿爸焦黑嘅面容，代表住慈祥同寬恕。佢清楚記得，阿爸係最後一刻，係對住佢笑。
 
棺木隨運輸帶，經過通道口嘅遮光膠，緩緩移到火化場禮堂後面。
 
本來已經燒過嘅屍體，即將真真正正被焚化。
 
阿詩走過嚟。
阿誠緊緊握住佢隻手，錫咗佢手背一啖，佢哋嘅未來，亦真真正正咁開始。
 
——
 
高踭鞋聲喺電梯大堂再一次響起。
 
「周太你好。」管理員微微鞠躬。

誠媽點頭回應，佢已經笑唔出。
 
管理員叫佢周太，喺因為佢自己係咁自我介紹，雖然
佢已經冇做周太好耐。
 
佢做周太嗰陣，冇人會叫佢「周太」，嗰陣佢只係「祥嫂」。
佢亦都，好樂意做祥嫂。
 
祥嫂好錫啲細路，但係佢唔知道，點解佢老公已經唔再錫佢。
佢冇要求，只係唔想俾啲細路成日見到，自己阿爸，打自己阿媽。
佢一直都好後悔，點解當日，冇帶埋阿誠走。
當日，佢只係覺得，祥哥應該唔會傷害阿誠。
但係，佢冇諗過，其實傷害咗阿誠嗰個，係佢自己。
今日，佢睇得出，𠵱個真係佢一生人最錯誤嘅决定。
而報應，今日，就活生生，發生喺佢面前。
 
佢再次對住銅色鏡面𨋢門，佢除低墨鏡，望住反映嘅自己，
發現，鏡中人，一如所料，真係唔似個人。