上個世紀末的一些人和事: 第三十五章 | 借人把口

自從嗰晚開始，肥仔輝每晚收工，都會坐喺麵包舖門口。
 
等阿欣。
 
最初，兩個人只係傾幾句。
 
「今日忙唔忙呀？」
「都係咁啦。」
「今晚又剩咁多？」
「少咗啲喇。」




 
慢慢，由十分鐘，變二十分鐘，再變成一個鐘。
 
「喂，你哋兩個，唔好傾到咁夜啦。」保安員都要行過嚟。
 
肥仔輝笑住揮手。
 
「知喇權叔。」
 
阿欣每日都好忙，朝早去社區中心做義工，夜晚就返夜校。佢唔夠分入Ｕ，但係佢從來冇埋怨，冇投訴，只係不斷向前，搵嘢學，搵出路。




 
「你今晚又返學？」一個完全多餘嘅問題，但係阿欣永遠都係笑住口答。
 
「係呀，我學緊電腦。」阿欣雙眼望住肥仔輝，眨一下就攝走佢嘅靈魂。
 
「電腦？」肥仔輝眼定定，身體有啲不能動彈。
 
「嗯，依家好多公司都想整網站。我同學話，做呢行一畢業都可以成有兩萬蚊人工。」
 
肥仔輝吹一吹口哨。「兩萬？」




 
「係呀。」阿欣眼望遠方。
 
「咁你第時咪發達！」肥仔輝都充滿憧憬。
 
阿欣笑到瞇埋眼。「邊有咁易。嗰啲係大學生，我唔會係，不過我都想試吓跟人追下浪。」
 
「你一定得。」肥仔輝由衷咁講。
 
阿欣再望住佢。「咁你呢？」
 
「我？」
 
「你將來想點？」
 




肥仔輝哈哈笑。「我呀？或者學下𢿫包囉！朝早焗麵包，晏晝焗蛋糕，焗到個人都燶就夠鐘退休。」
 
阿欣忍唔住笑。「講正經㗎。」
 
肥仔輝縮縮膊。「我冇咩大志，唔醒目，又唔叻，唔大隻，又唔靚仔。成功？都唔關我事啦！」
 
阿欣冇即刻反駁，只係靜靜望住佢。過咗一陣，伸手輕輕捏一捏佢塊面。
 
「邊個話成功即係搵大錢？你個人咁好，已經好過好多人。」
 
肥仔輝塊面，即刻紅到好似入咗焗爐。「妖……咪搞啦。」
 
阿欣笑得好開心。「哈哈，仲會怕醜添。」之後又伸手，再捏肥仔輝塊面。
 
有時，肥仔輝會偷偷收埋兩件賣剩嘅蛋糕。到收工，兩個人就坐喺門口分住食。




 
「今日係芝士蛋糕。」
「嘩！」
「噚日你唔係話想食？」
「你記得？」
「梗係。」
 
阿欣笑得好甜。
 
「多謝。」
 
佢對麵包好熟，有時仲熟過肥仔輝。
 
「下次如果有丹麥提子，留件俾我。」
「好呀。」




「仲有拿破崙千層。」
「得。」
「朱古力泡芙。」
「得。」
「杏仁條。」
「得得得。」
 
兩個人，晚晚都有嘢食，有謁傾。
 
不過，傾還傾，肥仔輝都一直冇問過阿欣關於佢屋企嘅問題，亦冇問佢住喺邊。
 
每晚，阿欣都着得乾乾淨淨，整整齊齊，唔似屋邨仔女放工放學之後就求求其其街坊裝。
 
肥仔輝有時會偷偷諗……
「會唔會，佢根本就唔係住喺邨？」




「可能屋企有錢，所以得閒去中心做義工，順便拎啲隔夜麵包去派？」
 
每次諗到呢度，佢就唔敢再諗。自己只係麵包舖打雜，入爐都未識，又係屋邨仔一個。憑咩？
 
不過，佢知道阿欣從來冇睇低過佢。呢樣，佢好清楚，亦已經夠。
 
今日，啲雨由朝落到晚。舖頭生意麻麻，唔使九點，老闆娘已經叫收舖。
 
洗完嘢，肥仔輝拉低半度鐵閘，拎住袋麵包，一行出去，濕氣即刻黐埋身。
 
佢望一望佢放喺舖裏面嗰件T恤。
 
着？
定唔着？
 
最後，佢笑一笑，冇入去攞，反正佢哋第一次見面，阿欣都冇嫌棄過。
 
肥仔輝坐低喺門口出面嗰級石級，踢甩拖鞋，打赤腳踩落涼浸浸嘅階磚地，舒服到呼咗一口氣。
 
今日晏晝，佢揀咗兩個焗得最靚嘅葡撻，放喺紙袋入面，因為阿欣噚晚話想食。
 
「咁大雨，阿欣今日會唔會唔嚟呢……」
 
突然，
 
左手有人一拉，嚇咗肥仔輝一跳！
 
阿欣一手捉住佢，未等佢反應，已經拉住佢跑。
 
「喂喂喂！做咩呀？發生咩事？」
 
阿欣冇答，淨係一路跑。肥仔輝幾乎連拖鞋都甩埋。
 
不過，俾人咁拖住隻手，就算而家阿欣話要上刀山落油鑊，佢都會跟。
 
兩分鐘後，阿欣停低，肥仔輝終於可以抬返起個頭，睇下自己去咗邊。
 
「做咩嚟呢度？」
 
阿欣冇出聲，淨係指一指籃球場中央。
 
雨中，有個人，趴咗喺地下，而另一個嘅男仔，就坐喺佢身邊。
 
肥仔輝皺起眉。
 
「嗰個係……」
 
佢即刻跑過去。
 
阿豪終於有救。
 
——
 
星期日朝早，幾個女仔又嚟到泳池。
 
太陽幾好，池水喺陽光下面一閃一閃。換轉平時，阿詩一落水就會潑人，阿敏又會同瑩瑩鬥游，
阿玲就坐喺池邊浸住對腳，同大家吹水。
 
今日，當然唔同。
 
「瑩瑩！」阿玲細細聲叫。「過嚟啦。」
 
瑩瑩點點頭，慢慢行落水。
 
阿玲噚晚打電話俾佢，其實都冇諗過佢會應承。
 
幾個女仔，浸喺水入面，有一句冇一句咁傾。
 
「今日啲水幾暖。」
「因為個太陽勁晒囉。」
「星期日多人咗。」
「係呢可。」
 
講完，又靜返。
 
阿詩偷偷望咗瑩瑩一眼。佢一直望住池水，冇笑，亦冇乜表情。
 
早兩日，第二次驗孕，結果都係一劃。醫生話，再等一個星期，如果姨媽仲未到，就要去醫院做詳細檢查。
 
明明應該鬆一口氣，但係，瑩瑩一啲都冇開心過。因為，宏仔同佢講咗，阿豪已經咩都知道晒。知道人物地點，知道瑩瑩瞞住佢關於阿文嘅事。
 
「點解你要咁對我？」一句阿豪冇對佢講過嘅說話，係瑩瑩心裏面不停咁重播。
 
「不如……你搵阿豪傾下啦。」阿玲終於開口。
 
瑩瑩冇反應。
 
阿詩接。「始終幾個禮拜冇見，開心見誠咁攤晒出嚟講，就算係鬧交，之後大家都會舒服啲。」
 
「你愈唔講，」阿敏游近少少。「佢愈更加唔知你諗咩。」
 
「或者……」阿玲再試探。
「寫封信？」
「約佢出嚟？」
「我哋陪你都得。」
 
瑩瑩一直低住頭。
 
「對唔住。我……真係唔知點面對佢。」佢企起身，水珠一路由頭髮滴落嚟。
 
「我走先。」披返毛巾，一步一步，向出口行。
 
其實，自己都唔知自己想去邊。
 
返屋企？都係瓹返上自己張床。
行商場？阿媽會叫佢返去睇檔。
去球場？更加唔敢。
 
佢只係想，身邊一個人都冇。
 
「等陣！」後面傳嚟阿敏把聲。「我有個提議！」
 
「下個禮拜！我哋去長洲宿營啦！」
 
「吓？」阿詩第一個反應。「長洲？」
 
「係呀！」阿敏愈講愈興奮。
 
「去兩日一夜！」
「去沙灘！」
「燒嘢食！」
「睇日落！」
「夜晚喺海邊吹風！」
 
阿敏指住瑩瑩。「你呀……」
 
「屋企喺邨。」
「返工喺邨。」
「放工喺邨。」
 
「日日喺同一個地方，見住同一班人。」
「行開下，先至抖到氣。」
 
阿玲拍一拍水。「又係喎！去散下心都好。」
 
阿詩跟，「咁我叫阿誠搵人幫我頂兩日。」
 
阿玲再舉手。「我帶埋啲功課去，你哋幫我做！」
 
成班女仔終於笑出聲。
 
笑完，大家唔約而同望向瑩瑩。
 
瑩瑩慢慢抬起頭，深深吸咗一口氣。
 
空氣，潮濕但清新。
 
天空，藍得好乾淨。
 
白雲，喺頭頂飄過。
 
終於，露出呢兩個星期以嚟，第一個真心嘅笑容。
 
「都好呀。」佢點頭。
 
「Yes！」阿敏即刻高舉雙手。
 
「去長洲！去長洲！去長洲！」阿詩同阿玲high-five。
 
「不過……」瑩瑩望住大家。「我有個要求。」
 
大家即刻靜晒。「咩呀？」
 
「可唔可以……叫埋班仔一齊去？」瑩瑩轉望地下。
 
然後，輕輕補咗一句。
 
「尤其係……阿豪。」
 
——
 
宏仔一直都好鍾意剪頭髮。
 
由細細個踎櫈仔喺樓下俾啲伯伯剪開始，佢已經好留意啲飛髪師傅點樣剪自己同人哋個頭。大個啲，就開始拎住把鉸剪，開頭幫自己剪，跟住幫屋企人剪，幫街坊剪，幫班同學剪。
 
「搵宏仔剪啦。」個個都話。
「免費㗎。」
「仲靚過飛髮舖。」
 
阿豪都係其中一個。
 
自從同瑩瑩拍拖之後，阿豪就成日搵藉口去佢屋企。
 
「側邊長咗啲囉，可唔可以剪兩嘢。」
 
宏仔心知肚明。「剪頭髮定搵我家姐呀？」
 
阿豪每次都陰陰嘴笑。「順便啫。」
 
不過，後尾就算瑩瑩唔喺屋企，阿豪都照樣上去。
 
兩條麻甩仔一路剪，一路吹水——漫畫、機舖、籃球、學校啲女——乜都講。
 
不過今日，第一次調轉。宏仔拎住個鉸剪袋，上阿豪屋企。除咗剪頭髮，仲有一句說話，一定要帶到。
 
幾日前，宏仔放學，同班同學一齊返屋企，一班男仔喪跑喪笑，旁若無人。
 
「對唔住！對唔住！」跑過樓下商場，差啲撞到人。
 
一抬頭。
 
「敏姐？」
 
阿敏啱啱由診所行出嚟。
 
佢面無表情，不過一見到宏仔，就即刻拉咗佢埋去一邊。「喂！啱晒，我有嘢搵你。」
 
宏仔一路聽，一路皺眉。
 
因為阿敏話佢知，長洲單嘢，佢哋班仔，全部反對，因為佢哋覺得阿豪而家跟本唔想見瑩瑩。
 
所以，迫不得已，要搵宏仔出手。
 
不過，就算阿敏唔開口，宏仔都想搵阿豪。
 
嗰晚，球場，宏仔一直坐喺阿豪隔離。佢喊到啞，但係宏仔一句說話都冇識講。
 
佢一直好後悔。
 
後悔自己冇出過聲，後悔自己打咗阿豪。
 
講到底，阿豪對佢一直都幾好。
 
可能係因為阿豪屋企，佢係最細，佢阿哥家姐唔係搬咗出去，就唔多喺屋企。
 
所以，仲讀緊書嘅阿豪就當宏仔係自己細佬，好多時，阿豪都好照顧佢。
 
「喂，去唔去排太鼓之達人？」
「醒多兩粒魚蛋俾你？」
「你睇唔睇天下？我買咗。」
 
今次，輪到自己做返一次。
 
宏仔打電話俾阿豪。「喂，駛唔駛我嚟幫你剪下個頭呀？順便幫你執埋個樣。」
 
電話另一邊，靜咗幾秒。
 
「……好。」
 
答得咁快，宏仔反而愣一愣，佢冇諗過，阿豪真係會答應。
 
宏仔去到，間屋冇人，阿豪已經舖好報紙嘅地下。
 
佢一路都好靜，成間屋只係得啲鉸剪聲，咔嚓咔嚓。
 
「喂！」宏仔忍唔住開口。「你不如得閒跟我去健身啦。」
 
放喺床上面塊鏡反映住宏仔個頭，阿豪望住。「點解？」
 
「等你下次真係可以將我打鑊甘。」宏仔笑住答。
 
阿豪笑咗一下。「你個撚樣，都知自己抵打。」
 
宏仔再笑。「係呀，我的確係正仆街冚家鏟！」
 
過咗陣，宏仔又扮輕鬆。
 
「仲有。」
「你放心，我家姐冇事。」
「冇大肚。」
 
阿豪定咗一定，點一點頭。「咁就好。」
 
宏仔笑。「如果唔係，要我咁快做舅父，好撚驚！」
 
阿豪忍唔住笑多一下。
 
「痴𨳊線！」
 
剪完，阿豪行入浴室沖涼。花灑聲，充滿成間屋。
 
宏仔拎掃把掃頭髮，掃到梳化角落。有樣嘢，反一反光。
 
「嗯？」佢用掃把勾出嚟。
 
係一張相。
 
不過，中間已經撕開兩半。
 
花灑聲停，浴室門打開。阿豪一邊抹頭，一邊行出嚟。
 
一眼，就見到宏仔手上張相。
 
宏仔吸咗一口氣，覺得喺時候。「阿豪，嗰晚……」
 
「我唔應該郁手。我……誤會咗你。」
 
「對唔住！」
 
阿豪望住佢，揈下頭，隔咗幾秒，都開口。「你個鼻……有冇斷到？」
 
宏仔摸摸自己個鼻，笑一笑。
 
「冇事啦。」
「醫生話冇斷。」
「流下血啫。」
 
阿豪點點頭。「咁就好。」
 
「對唔住。」
 
氣氛，好似冇咁僵。
 
宏仔都揈下頭。「以後有咩唔開心，就攬住我嚟砌囉，我而家頂得住。」
 
「其實……我今日嚟，仲有一件事。」
 
阿豪冇出聲，等佢講。
 
「下個禮拜，我哋去長洲。」
「你……去唔去？」
 
阿豪眼神即刻沉咗落去。「邊個問？」
 
宏仔再呼一口氣。
 
「敏姐叫我問。」
「但係……真正想你去嗰個……」
 
「係我家姐。」
 
阿豪再㧵低頭，坐係床邊，望住對腳。
 
宏仔繼續講。
 
「佢唔敢搵你。」
「唔係唔想。」
「只係唔敢。」
 
「我知道，佢覺得自己冇面見你。」
「覺得你一定唔會原諒佢。」
 
「佢晚晚都仲喊緊，我諗佢真係……好後悔。」
 
「阿豪。」
「俾多次機會佢。」
「得唔得？」
 
「機會？」阿豪爆發。
 
「我諗你誤會咗小小。」
「唔係我唔俾機會佢。」
「係你家姐冇俾過機會我！」
「佢從來未同我講過佢同我一齊唔開心，冇話過我有乜嘢做得唔啱佢心意。」
「我哋連交都冇嗌過……就攪成咁。」
 
「不如你問下你自己，如果你自己條女咁對你，你會唔會俾多次機會佢！」
 
兩滴男兒淚，無聲落下。
 
宏仔再一次，唔知應該俾咩反應，只係好細聲咁，誠實作答。
 
「我唔知。」
「我只係知，有啲嘢，要講清講楚。」
「如果唔係，會成世人都唔清唔楚。」
 
成間屋，好靜。
 
阿豪手抺眼淚，起身，慢慢行前，由宏仔手上，接過張相。
 
將兩半，慢慢拼返埋一齊。
 
相中，阿豪同瑩瑩，笑得好燦爛。
 
阿豪望住，深深吸咗一口氣，再望住宏仔。
 
冇講一句說話。
 
只係，
 
輕輕點咗一下頭。