變成女鬼既我，剩返30日要出POOL！: （四）心動

屋內掛滿一道道金黃色既長符，旁邊更有大劍、木棍、佛珠，似乎唔係一般人屋企。
 
我緊握胸口上既黑雞，才能站穩腳步。
 
「呢舊黑雞係？」
 
「你係咪想灰飛煙滅？」楊燦炫反問。
 
我心中嘆了口氣，面上仍保持笑容。
 




「你屋企點解咁多呢啲符咒？」我打算拎嚟睇既時候，楊燦炫一手拍落我手背。
 
「喂呀！痛㗎！」我下意識收手。
 
「痛？」楊燦炫恥笑著講。
 
「好似唔痛⋯⋯哈哈⋯⋯點解唔掂得？」
 
「On 9！啲符係驅鬼用，你嚟到陌生人屋企，都唔應該亂摸人地屋企啲⋯⋯喂！」
 




我立刻衝去房間，恰巧見到小學楊燦炫既相，佢笑容滿面，係村屋前抱住一隻橘黃色既小貓咪，物似主人形，連隻貓都肥嘟嘟，好得意！
 
「哇！你細個原來係肥仔！」仔細一望，原來佢細個冇戴眼罩。
 
「劉淽澄！邊個比你入我房！信唔信依家我趕你出去！」
 
「你趕唔到既，鬼係神出鬼沒，你捉我唔到，嘻嘻！」我露出牙齒笑住講。
 
楊燦炫愣一愣，之後充滿自信講：「我捉唔到你，楊燦炫3個字倒轉寫！」
 




「好呀！嚟捉我！」我立即係屋企瘋狂閃避。
 
一時出現係廚房，一時出現係飯廳，甚至廁所，楊燦炫都冇嚟捉我。
 
哈哈，睇嚟佢個名準備倒轉寫！
 
之後我出現係客廳，攤係沙發上。
 
下一秒，楊燦炫出現在我頭頂上，站在沙發旁邊。
 
「哇！你又知我下個地方會出現係到？」我驚嚇地說。
 
「我感應到你去過邊到，你都係束手就擒啦！」楊燦炫拉住我既雙手，用高高在上既眼神講。
 
「楊燦炫，你到底咩人？」我努力爭扎，無奈佢力度太大，根本擺脫唔到佢。




 
我立即踢楊燦炫一腳，令佢失平衡跪坐在地上，但其雙手立即按著沙發邊緣。
 
「由太太公開始，我地一代就係驅魔師，自細有意識開始，我就睇到鬼。」佢勾起單邊嘴角微笑著說。
 
所以佢先見到我，同埋摸到我？
 
我依家先發現，我同佢既距離咁近。楊燦炫雖然係男仔，但眼睫毛異常地長，眼睛更係細長。
 
明明我已經死左，心臟都唔會再跳動──點解依家我覺得心亂如麻？
 
「望夠未？」楊燦炫冷酷地講。
 
「邊個……邊個望你！我望緊你眼罩咋！仲有呀⋯⋯明明⋯⋯明明你望我先！」我立即起身講。
 




「你唔望我又點知我望緊你？」楊燦炫低頭一笑講。
 
「你好煩！」我不耐煩地說。
 
「哈哈哈，真係好搞笑！」楊燦炫更係大聲放笑，下一秒笑聲立即停止，佢又變返撲克臉。
 
「黑人憎！」我踢楊燦炫一腳，立即瞬間移動，離開佢屋企。
 
中學時候，我同楊燦炫雖然係社幹事，但我主要接觸阿樂居多。
 
楊燦炫比我既感覺，多數沉默寡言，不苟言笑，所以身邊既朋友都唔多，我都唔明點解佢會做社幹事，完全唔似佢會做既事。
 
當佢頭先大笑，我估唔到原來佢都會有呢一面。
 
佢既笑點真係奇怪！同佢個人一樣奇怪！




 
「淽澄！」聲音來自身後，我回頭一望，竟然係鄰居梅嬸。
 
我細個個陣，成日去梅嬸屋企玩，而佢個女鎧桐同我差唔多年紀，我地成日一齊玩同做功課，梅嬸成日都會整美味既甜品款待我，特別係士多啤梨蛋糕，真係啪得住出面鋪頭質素！
 
之前聽鄰居講，梅嬸因為突發心臟病而去世，我都有出席佢既喪禮，冇諗過咁快輪到自己。
 
「梅嬸，點解你會係到？」我捂著嘴巴問。
 
「淽澄，呢句說話我問你先啱！點解你咁後生就？」梅嬸欲言又止。
 
「食啫喱噎死左！」我無奈擺擺手講。
 
「陰公囉～」梅嬸摸摸我個頭講。
 




「梅嬸，你係咪有未完既心願？」我仔細一望佢手上既紅繩，黑中只帶一點紅。
 
「鎧桐佢就嚟生日，我準備左份禮物比佢。」
 
「你剩返幾多日？」
 
「3日左右？」
 
「但鎧桐係5日後生日⋯⋯」
 
「我淨係想送份禮物比佢，只可惜冇活人見到我。」
 
「係咩禮物？係梅生都唔知既禮物？」
 
「佢日日返工，點會知！鎧桐同你一樣，好鍾意食士多啤梨蛋糕。我特登去元朗種左士多啤梨，夠新鮮！原本仲想用自家製既士多啤梨整蛋糕比佢食，可惜我依家做唔到。」
 
「你淨返日子唔多，唔驚變成惡鬼咩？」
 
「所以我仲諗緊方法完成心願。」
 
「你知唔知惡鬼咩樣？」
 
「我聽過，但冇見過，一般嚟講佢地行蹤通常都好隱蔽，不過淽澄你見到佢地，最好即刻走！」梅嬸盯住我講。
 
「點解？我地都係鬼，佢又唔係人！」我攤手，一臉唔在乎講。
 
「淽澄，你咁講就大錯特錯！惡鬼一旦見到普通鬼，就會攻擊我地，輕則邪氣掂到紅繩會變黑，你會少左係人間既時間，重則搶走紅繩，你會瞬間冇晒人間既記憶。」
 
「點解惡鬼要攻擊我地先？」
 
「因為紅繩對佢地嚟講，係重新投胎既關鍵。」
 
「重新投胎？」
 
「紅繩代表鬼既記憶同停留時間。短暫掂到紅繩，可以暫時掩蓋惡鬼既氣味，因為陰間使者主要靠紅繩既氣息去分辨鬼魂，呢個得高級惡鬼先做到。好多惡鬼就係因為紅繩變全黑，產生邪氣，好快被陰間使者消滅。
至於搶紅繩就奪走你停留人間既時間，偽裝成為你本人，不過都要睇本身個靈魂自我意識強唔強，如果自我意識強既靈魂，有機會可以搶返主導權，只係呢個情況比較微，大部分惡鬼同靈魂都融為一體，由惡鬼主導意識，因為惡鬼自我意識強。惡鬼會利用紅繩去呃陰間使者，獲得投胎機會。」
 
「哇，原來惡鬼都分級數！咁陰間使者唔會check鬼魂咩？一check就知佢地係人間超過一個月啦！」
 
「陰間使者只會確認紅繩，除非有異常情況，佢地唔會逐個查記憶，自然當鬼魂係紅繩本人，唔會深究咁多。」
 
「哇，咁都得？梅嬸你點知咁多？你講既野仲多過個陰間使者，佢真係好無品！乜都唔講，佢想留返下世講咩！咁我地普通鬼咪要好小心惡鬼！」我嚷著道。
 
「無錯，你講得啱！我都係識到啲鬼朋友，佢地話我知。」
 
「唉！如果同到鎧桐講你種左士多啤梨比佢，佢一定會好開心，你都走得安落。」我嘆左口氣講。
 
「我都係唔捨得個女！總係覺得鎧桐仲係細個⋯⋯明明生佢已經15年前既事，今年都16歲！」梅嬸慨歎咁講。
 
如果我未死，今年應該都過18歲生日⋯⋯
 
「淽澄，我唔講啦！鎧桐呢個時候補完習，返到屋企！」梅嬸講聲，瞬間消失。
 
如果我幫到梅嬸咁就好⋯⋯鬼唔得啫，睇到鬼既人咪得！
 
我集中精神，返去楊燦炫屋企。
 
「哇！」眼前景象卻嚇我一跳。