變成女鬼既我，剩返30日要出POOL！: （五）對調
眼前楊燦炫脫去上衣，露出結實既肌肉線條！
「估唔到你都有腹肌喎！」我捂著嘴笑。
「劉淽澄，你同我返出去！」楊燦炫立即係床上拎住衫擋住上半身。
「哇！我生前都未摸過腹肌，依家人都死，你咪比我摸下囉！」講完之後，我搶走楊燦炫件衫。
「喂！非禮呀！」楊燦炫大喊。
「哇，真係好結實！摸下又唔會少忽肉！」我伸手戳左戳佢既腹肌。
「咁我摸返你得唔得！」楊燦炫伸手摸我個肚。
「男女授受不親⋯⋯哈哈哈⋯⋯唔好呀！」楊燦炫整到我個肚好癢，令我忍唔住發笑。
「咁你明我依家咩感受啦！好唔舒服呀⋯⋯哈哈哈⋯⋯」佢雖然啤住我，但我整返佢個肚，令佢哭笑不得。
「喂呀！唔好再⋯⋯整⋯⋯」楊燦炫突然反擊，令我頓時失平衡。
為了取得平衡，我捉住楊燦炫既手腕，然後雙雙墜落床上。
嘴上有軟綿綿既感覺，回過神，楊燦炫正望住我。
我同佢⋯⋯Kiss左？
下一秒，白光一閃，感覺一股龐大既力量，拉我入去唔知咩地方。
當我再次張開眼睛，楊燦炫已經唔喺到。
「無理由㗎，明明頭先我仲同佢喺到⋯⋯」我摸摸自己嘴唇。
「屌，初吻竟然比左楊燦炫！」我激動跺跺地講。
「劉淽澄！」我突然聽到楊燦炫既聲音。
我眼望四周，仍然揾唔到佢既蹤影。
「喂，你喺邊⋯⋯」我恰好照到鏡子，鏡中自己令我大吃一驚！
點解⋯⋯點解我會變成楊燦炫？仲要戴住左黑雞同紅繩！
當我伸手除下黑雞之際，楊燦炫聲音再次出現。
「你唔好除個墨翠！呢間屋全部符都係驅鬼！你一除會比啲符殺死！」
「你又唔早講！」我立即停手，繼續問：「到底依家發生咩事？」
「就係因為你Kiss左我，所以你先會上左我身！」
「我邊有Kiss你，明明就係你抽水！你依家到底喺邊？有冇方法即刻出嚟？」
「我困左係心入面！要7日先出返嚟！你千其唔好除墨翠，除左佢，我地都一拍兩散！」
「點樣一拍兩散？」
「你會消失，我都會命危。」
「Kiss就會上身？咁我同阿樂Kiss，咪可以上佢身？」
「⋯⋯」
「做咩啫！你咪都想我快啲離開人間咩？」
「佢睇你唔到，Kiss落去都冇用。」
「咁點解我同你Kiss就得？」
「⋯⋯」
「算，睇你唔應我，都知唔想答！」
我望住鏡中陌生又熟悉臉孔，緊握手中黑雞，腦海瞬間萌生一計，臉上不禁露出狡猾既笑容。
「喂，劉淽澄，我警告你唔好亂嚟。」楊燦炫放軟聲線講。
「手機密碼。」我臉上掛住得戚既笑容，摸住身上既胸肌。
「0901。」楊燦炫不情願講。
「你9月1號生日咁慘？年年一開學就要返學！」我捂著嘴笑住講。
「我唔係9月1號生日。」
「唔係生日但SET 9月1號做密碼⋯⋯唔通係初戀生日？」
「你快啲打比我老豆！」
「點解要打比你老豆？」
「只有佢先可以解除呢個局面，我就唔洗被困7日。」
「咁你等佢返嚟咪得！」
「佢同阿媽返左上大陸，接左單驅鬼生意，未到下星期三都唔會返嚟，依家先星期四！」
我係通訊錄中飛過名為「老豆」既聯絡人。
「喂！你碌過龍！你唔係想⋯⋯」楊燦炫激動地講。
我碌到阿樂既電話，並撥打過去。
「喂～阿炫！揾我咩事？」阿樂把聲聽落好有磁性。
「喂，阿樂，我想約你出嚟温書呀！」
「好呀！你想自修室定Starbusk？」
「你好同我快啲收線！即刻打比我老豆！」楊燦炫憤怒地說。
「收皮，你吹得我脹咩？」我用著楊燦炫既樣子，向鏡子吐舌頭。
「阿炫？你同緊邊個講野？」對話中既阿樂用疑惑既聲線問我。
「無野⋯⋯Err 我隻貓！佢叫『收皮』，哈哈哈⋯⋯」
「咁搞笑，幫佢改做『收皮』⋯⋯新養㗎？」阿樂興奮地問。
「哦，係呀！」
「咁我可唔可以上嚟睇貓？」
「佢有啲怕陌生人，下次呀！」
「我仲諗住帶『豆腐』過嚟，等佢地做朋友添！」
「喂⋯⋯乜阿樂有養貓㗎咩？」我遠離電話，細聲問。
「係呀，你連佢有養貓都唔知？係佢朋友就會知㗎喎！」楊燦炫不屑地回答。
「咁不如我上嚟你屋企温書？探下豆腐！」我特意係豆腐二字停頓耐啲。
「都得，咁你陣間上嚟！」阿樂收線。
「楊燦炫，阿樂屋企係邊？」我雙手合實，鏡中既楊燦炫一臉可憐樣子。
「你唔好用我個樣做呢啲表情。劉淽澄，你到底想點？」
「我只係想見下阿樂，想見鍾意既人無錯㗎喎！」
楊燦炫沉默數秒，才說：「你嚟緊做咩事，都同我講聲，經過我同意先做。」
「喂～你係咪有鍾意既人啫！呢度得我同你！」我用佻皮樣子問。
「冇！快啲著返衫去阿樂屋企！」
「係咁否認，即係有啦！我識㗎？學校邊個女仔呀？明晶？Cloud？Candy？」我望住鏡中既楊燦炫，滿身腹肌真係好養眼。
「你瞇埋眼換衫，唔好摸同睇我既身體！」楊燦炫大喊。
「我瞇埋眼點換呀？反正沖涼連你下面都會睇到，男人老狗，冇所謂啦！唔通你下面係⋯⋯」
「信唔信我之後一出嚟，拎走舊墨翠，你即刻灰飛煙滅！」
「唔睇囉⋯⋯哎呀！」我瞇埋眼換褲，結果失平衡仆親。
「哈哈哈，抵死！」楊燦炫笑住講。
「我換衫上阿樂屋企，哼！」我打開衣櫃，只見全部都係黑衫。
「搞錯呀，我點見阿樂喎！」我大喊。