變成女鬼既我，剩返30日要出POOL！: （六）了解
「叮噹——叮噹——」我個心怦怦咁跳動。
「你記住，去到淨係講温書內容，其餘野我會提你，冇我提示你唔好輕舉妄動。」楊燦炫用嚴肅既語氣講。
「得啦得啦！」我求其點點頭。
明明先係同阿樂隔左幾日冇見，就好似好耐無見咁！
估下阿樂著咩衫！白色？淺藍色？深綠色？
「喀嚓！」迎面而來係淺啡色毛衣再加白色寬褲既阿樂，清爽頭髮帶有淡淡橘子香氣。
「阿炫！」阿樂咧開笑容，露出整齊而亮白既牙齒。
「阿樂⋯⋯」我緊張咁講，並小心翼翼咁行入去。
「你頸上黑色個舊野係乜野嚟？仲有手上條繩係？」阿樂仔細打量黑雞。
「黑……」
「墨翠，你話當裝飾。」楊燦炫提醒，避免我講「黑雞」二字。
「墨翠，靚唔靚呀？仲有條紅繩係保佑我DSE順利，比師傳開左光，你要唔要返條？」我露出尷尬而不失禮貌既笑容。
「嗯……你鍾意咪得～」阿樂微微牽起嘴角。
「你要紅繩，我下次拎條比你囉！」
「唔洗啦！」
「喵～喵～」白雪雪又毛茸茸既小貓咪係屋企奔跑。
「喂～豆腐～」我叫喊著，但豆腐只顧玩毛球。
我將豆腐抱在懷裏，撫摸佢既毛髮。
我好鍾意貓，但父母唔允許養貓，好多時候我只可以去梅嬸屋企玩貓。記得中四個陣，回收場個邊有堆被遺棄既貓，有人同我輪流照顧佢地，只可惜啲貓後來被人舉報，被漁護署捉走左，我總係覺得可惜，保護唔到啲貓。
「豆腐仲係好痴你！你都唔係第一次上嚟，野飲自己拎！」阿樂講完，我就拎左罐橙汁。
「可樂呀！」楊燦炫焦急地說。
「咔嚓！」恰好我已經打開橙汁罐蓋，並細聲講：「我好耐冇飲過野，用你身體飲住先！」
「你竟然飲橙汁？我仲特登落街買左可樂比你！屋企淨返一罐。」阿樂驚訝地問。
「今日轉下口味！」我大啖大啖飲住橙汁講。
「你話最近要Keep fit，唔飲肥仔水。」楊燦炫提醒我。
「我最近想Keep fit 呀！唔飲肥仔水呀！飲橙汁，橙汁夠健康！」我舉高橙汁空樽講。
「係咪溝女呀⋯⋯連兄弟都唔講係邊個？」阿樂搭住我既膞頭講。
「唔話你知，等你心思思！」我同楊燦炫同步講出。
「識到女朋友，記得同兄弟單聲！」阿樂恰好背著我，入廚房講。
「你之前情人節都同女朋友出街啦！我都係想快啲出Pool啫！」我講。
阿樂拎左啲薯片出嚟，並講：「連你都誤會？我家姐喎！我冇同你講過咩？家姐情人節前分手，但佢Book左枱，仲要係情侶套餐，所以就拉埋我去。」
「你依家即刻講：『你家姐唔係成日嘈到男朋友分手，但轉頭又同返佢復合咩？』」楊燦炫緊張地講，於是我一字不漏跟住阿炫講。
「我家姐每次一分手就揾我嚟搞。」
「你唔覺得咁樣好攰咩？」
「或者呢個都係佢地相處方式呢？」
「認真呢？」
「起碼未來我拍拖，唔會好似我家姐咁。」
我吞吞口水，問「咁你依家有冇鍾意既人？」
我都已經死左，如果依家都冇勇氣去問，不但會後悔，更重要呢個係關鍵問題，關乎我係咪可以離開人間既重點。
「有，但我知道佢唔會鍾意我。」阿樂直盯著我，臉上掛住猜不透既笑容。
「你係到講咩？阿樂，你咁靚仔，知唔知學校好多女仔暗戀你，我咪就係其中一個囉！」我激動咁講。
「你認真㗎，阿炫？」阿樂靠近我講。
聽到「阿炫」二字，沉重既大石壓在我心上。
「喂，劉淽澄，你癲左呀？」楊燦炫憤怒地喊。
我略看手腕上既紅繩，一小段已經發黑。
如果我可以用「劉淽澄」既身份去表白，唔知你會咩反應？
「你話朋友既鍾意啦！」楊燦炫見我未有回應，催促地說。
我呆愣數秒，講：「其實我真係⋯⋯」
「就算我地幾好朋友都好，唔好拎呢啲野講笑～豆腐，過嚟主人身邊！」阿樂從我手中接過豆腐，我感覺佢手心正在冒汗。
其實我真係鍾意你⋯⋯
只係阿樂同楊燦炫咁好朋友，點解阿樂睇落咁緊張？
唔通頭先阿樂係認真？佢講鍾意既人係……唔會既！
眼前既阿樂摸緊豆腐背部，睇落好開心。
為左驗證我既諗法，我靠近阿樂，睇落似抱貓，實際上刻意碰到佢既胸口。
「怦怦怦怦怦⋯⋯」
痴線！阿樂個心跳得好快！
我同阿樂對視，佢正在吞口水。
「阿樂，係時候温書！陣間再同豆腐玩！」我將豆腐放係房間內。
「好呀！」阿樂應完，就去廚房，拎左好多零食出嚟。
「咁多薯片？」我問。
「你鍾意食呀嘛～有燒烤、蕃茄、芝士⋯⋯放心啦，我冇買辣！」阿樂興奮咁講。
「你咁有我心呀！」我打開薯片食住講。
「等等！」阿樂急忙揾紙巾墊係我既書本上，並講：「咁食啲薯片碎咪唔會跌落書上面！」
「哇！阿樂，你咁細心！你係咪驚我食得太衰，蟑螂夜晚會揾上門！」我開玩笑怕阿樂肩膞講。
阿樂肩膞震一震，講：「我邊度驚蟑螂？」
以前係學校開會，成班社幹事去小賣部買左堆零食，係班房食完之後，冇執啲垃圾就落左去打波。當我地上返去班房，就見到阿樂企係班房門口，完全唔敢行入去，後來先知原來佢怕蟑螂。
阿樂點解要同我⋯⋯係同楊燦炫講大話？