變成女鬼既我，剩返30日要出POOL！: （七）打架

「喂！楊燦炫！平時阿樂都係咁樣同你相處？」離開阿樂屋企後，我問。
 
「我同阿樂FD，會影響到你鍾意阿樂？」楊燦炫無奈咁應。
 
「純粹我覺得佢對你有啲唔同。」
 
「咁你依家想點？頭先仲想用我身體表白，完成你出Pool既心願，跟住就走？等我比人誤會做GAY?」
 
「喂！我頭先就係諗住你先冇講！你有冇方法可以令佢見到我，然後我同佢表白？」
 




「你離開我身體先再講啦！」楊燦炫唔耐煩咁講。
 
「情人節點解阿樂突登PO同家姐食飯？佢唔驚比人，好似我咁樣誤會咩？」我無視楊燦炫既不滿，繼續追問。
 
「佢話有鍾意既人，有時我都唔明佢諗咩！有咩咪直接講，啲女仔情人節送比佢既朱古力，都塞晒比我食，同佢地講清楚咪得。」
 
「等等先，你有冇食到盒Godiva朱古力？」
 
「都話阿樂全部朱古力比我食晒！」
 




「屌你老母，一盒成200幾蚊，個日返嚟補課，我叫采欣塞盒野係阿樂櫃桶，你個衰人！」話畢，我撞到前面身穿校服既男生。
 
「對唔住呀，你冇事呀嘛？」我急忙地問。
 
眼前男生立即流左兩行鼻血，向我大喊：「喂！你撞到我呀！你知唔知我係邊個？」
 
然後佢轉身大喊：「屌！條氣唔撚順！死乸型！」
 
「死乸型」旁邊兩名男生，一個亂毛男扯住死乸型條領帶，帶到鼻血男面前。
 




鼻血男一拳打落死乸型肚上。
 
「呀！」死乸型大喊。
 
「屌你老母，下個到你！」鼻血男面目睜獰盯住我講。
 
當然唔知你邊個啦，仲要咁惡咁打人，見到就驚！
 
「Sorry！」我馬上90度鞠躬。
 
「貢丸哥！佢搞到你流左鼻血，點都要比返啲顏色佢睇！」後面長髮男講。
 
生菜、牛丸、番薯，依家連貢丸都出埋⋯⋯
 
「我頭先都同你Say左Sorry啦！你想我點先！」




 
「好簡單，比我打返，條數咪打和囉！」貢丸講。
 
「同佢講，呢度大街，郁手對佢不利。」楊燦炫講。
 
「呢度大街，咁多人望實會有人報警，一陣有差佬就唔好啦！郁手對你不利，更何況你著住校服，上埋報都唔好啦！」我講。
 
「貢丸哥，洗同佢講咁撚多嗲！打到佢甩牙就啱！」後面食住煙，亂毛男講。
 
「喂，劉淽澄！」楊燦炫呼喊。
 
「點搞呀？」我細聲講。
 
「先下手為強。劉淽澄，跟住你一定要聽足我講野。」
 




「下？」我驚訝地講。
 
「下咩？成日自言自語！等你領教下我貢丸哥既拳頭！」貢丸搖擺佢既頭，同時十指緊扣，玩弄指間關節。
 
「劉淽澄，你對眼要兇狠啲，堅握拳頭，跟住⋯⋯」
 
「踢佢下面！」楊燦炫大喊。
 
我立即提起腳，用力踢貢丸下陰。
 
「呀！」貢丸在原地跪下。
 
「長髮男扯佢頭髮！然後用力打胸口！」
 
我扯住長髮男既頭髮，並用全身既力氣打佢胸口。




 
「另一個扮插眼，實則踢佢膝頭。」
 
亂毛男擋眼，卻估唔到同大佬貢丸一樣，虔誠地「跪」向我。
 
「快啲走！」我拉住死乸型既手奔跑。
 
我地跑左唔知幾多條街，直到唔見佢地為止。
 
「咳咳咳⋯⋯唔該晒！」死乸型在原地喘住氣。
 
「唔洗客氣！」我揮手離開。
 
「喂！」死乸型大喊。
 




我回頭一望，佢繼續喊：「恩人你叫咩名？」
 
「劉⋯⋯楊燦炫！」
 
「我叫梁建昊呀！下次有機會再見！」
 
仔細一睇梁建昊，五官眉清目秀，好似公仔，如果打扮下絕對係靚仔，女仔會鍾意既類型。
 
「好！」我轉身揮手。
 
「喂，楊燦炫，有啲料到喎！」我細聲講。
 
「如果唔係你，我根本唔洗咁狼狽！」
 
「你平時做開運動？完全冇喘氣喎！」
 
「我係驅魔師，冇啲體力點得？」
 
「頭先真係Sorry⋯⋯」
 
「發生左既事就算，你都唔好再咁執著盒Godiva。」
 
「我可唔可以叫你阿炫？成日叫你全名，好似好唔熟，話晒我地都算出生入死既朋友呀～」
 
「好，阿澄。」阿炫輕鬆咁應我。
 
經過巴士站，恰巧見到鎧桐，同埋梅嬸。
 
梅嬸手上既紅繩已經唔可以稱為紅繩，係黑繩，因為過埋今晚，梅嬸應該剩返一日。
 
如果我可以利用阿炫身體，幫到梅嬸了結佢既心願，咁佢咪可以順利離開人間？
 
「阿炫，眼前個梅嬸剩返一日時間，如果我地可以幫佢了⋯⋯」
 
「唔得。」阿炫斬釘截鐵講。
 
「我都未講完。」我焦急咁講。
 
「唔得就唔得。」
 
「點解呀？」我追問。
 
「冇得解！」阿炫憤怒咁講。
 
梅嬸同我恰好對視，其空洞眼神令人無法漠視。
 
「淽澄，你覺得好唔好食？」腦海中兩把聲音重疊，二人同樣用期待既目光望住我。
 
「好味！」我望住梅嬸，大口大口咬著甜絲絲而綿密既蛋糕。
 
如果唔幫梅嬸，我覺得會後悔。
 
「對唔住，阿炫！今次我唔可以聽你講！」