變成女鬼既我，剩返30日要出POOL！: （八）梅嬸

「梅嬸！」我上前呼喚著。
 
梅嬸呆呆滯滯望住我。
 
眼前鎧桐用住奇怪既目光打量著我，並觀望四周。
 
鎧桐疑惑望向後面，只見身後一個微胖少女，左手揸住甜筒，右手揸住炸雞。
 
「阿妹～炸脾睇落好好味喎！邊到買㗎！」我刻意係妹字停留耐幾秒，將妹當梅，兩個發音差唔多啫！
 




「後面星⋯⋯弘小食⋯⋯店⋯⋯」微胖少女咬住炸脾講。
 
「唉！」鎧桐垂下頭，抿著嘴講。
 
事實梅嬸的確係鎧桐後面，只係鎧桐睇唔到佢。
 
「你⋯⋯見到我？」梅嬸問。
 
我點點頭，示意佢跟我行。
 




當我地行到少人既公園，我講：「梅嬸，你仲記唔記得話種士多啤梨，想問你種左係邊？」
 
奇怪，自從我揾梅嬸之後，阿炫冇再講野。
 
不過非常時期，我唔可以顧咁多野！
 
「你係邊個，點知我種左士多啤梨？」梅嬸撓住雙臂，保持距離講。
 
「我係淽澄朋友，聽講你有心願未了，所以我過嚟係想幫你。」
 




梅嬸手上條紅繩幾乎全黑，只剩下一小截紅色。
 
「通常見到鬼都唔係普通人，到底你係咩人？」梅嬸退後一步講。
 
「我係驅魔師，專幫鬼魂完成心願。你啲士多啤梨種左係邊？」
 
「點解你會幫我，你真係澄澄既朋友？」
 
「澄澄，你覺得好唔好食？」腦海突然浮現熟悉既聲音。
 
「因為⋯⋯我諗起我阿媽。」
 
「我細個好憎返屋企食飯，成日話屋企啲餸係『垃圾餸』，好多時候係鄰居屋企玩到唔走，目的就係唔返去食飯。」我望住遠處燈火通明既大廈講。
 
「但係比人話整垃圾餸，甚至唔返去食飯，我諗你阿媽一定好難受。」




 
「阿媽係事業型女性，職場上呼風喚雨。明明屋企都有錢，有請工人⋯⋯」
 
講到一半，喉嚨好似有啲野卡住左，我吞左數次口水，繼續講:「但偏偏佢就係要返屋企煮飯。」
 
「澄澄，你覺得好唔好食？」阿媽用期待既目光望住我。
 
「哇！啲蛋好鹹呀！」我吐係碗中。
 
「明明呢個番茄炒蛋已經跟足食譜整⋯⋯唔通我將糖同鹽撈亂左？」阿媽喃喃自語。
 
「澄澄，下次我再整過比你食！食條菜呀！」阿媽努力牽起嘴角講。
 
「我都係鍾意食梅嬸整既蕃茄炒蛋，啲蛋炒得滑好多！又唔會咁鹹！不如你叫Maria煮飯算啦！」我一邊抱怨，一邊撩住白飯。
 




阿媽只係默默食住炒蛋，成餐飯再冇出聲。
 
「咁你阿媽都錫你，放工咁攰，都肯煮飯比你食，你真係身在福中不知福！阿仔，你仲在世，之後同阿媽講返都未遲。」梅嬸安慰我。
 
對於在世既阿炫嚟講，的確可以做。
 
而我只係借住阿炫既軀殼，去做人先可以做到既事。
 
「你都識講我仲在生，咁你既心願要完成，先可以離開人間。到時再教我整蛋糕，鎧桐聽日就可以收到蛋糕，當同佢提早慶祝生日。」
 
「阿仔，我啲士多啤梨就種左係元朗既大棠村，你只要用鎧桐個名，就可以搵到士多啤梨。」
 
「點解用鎧桐個名登記？」
 
「因為呢份係送比佢既生日禮物。」梅嬸微笑講。




 
「事不宜遲，依家去士多啤梨園！」
 
「依家咁夜閂左門，同你講左士多啤梨園係邊到，已經心滿意足。」
 
「我自然有方法入去！況且……你今晚12點就要走，冇時間啦！」
 
「你想？」梅嬸一面狐疑望住我。
 
「依家由南昌搭車，只要Call 車，28分鐘就到！」我睇住google map講，然後Call Uber，好快去到士多啤梨園。
 
門口落車後，我攀過側欄，靜悄悄進入士多啤梨園。
 
「喂，阿仔，小心呀！」已穿過圍欄園中既梅嬸扶住我雙腳。
 




「梅嬸，邊到係你啲士多啤梨？」我跳在地上，抹抹手上既灰塵講。
 
「有個木牌寫住鎧桐個名，應該係後面幾行。」
 
以往既我夜視能力較弱，黑暗中無法視物。依家用阿炫既身驅，儘管現在漆黑一片，我瞇著雙眼，好快就搵到名字，睇嚟阿炫夜視能力似乎幾好。
 
我攝手攝腳，摸黑前進。
 
「沙沙沙……」踏草聲音作響。
 
「係咪有人呀！」突然傳來員工既聲音，並用電筒照射四周。
 
我拎住手上既士多啤梨，迅速沿住田壟邊緣移動，壓低身體，跑到旁邊温室後面。
 
一旦被人發現，不但以阿炫既身份被告偷竊，令到阿炫好麻煩，而且上到差館，我冇時間整蛋糕，梅嬸亦無法離開人間！