變成女鬼既我，剩返30日要出POOL！: （九）自我中心
「呢個時間邊會有人，你聽錯啦！快啲收工Happy Hour啦！」另一個員工講。
電筒關掉，重回黑暗，過左數分鐘，我才探出頭來。
確定冇人之後，我摘取數十顆士多啤梨，然後到超市購買材料，就返屋企製作蛋糕。
「阿仔，唔好係咁攪啲cream，蛋糕會好實！」
「士多啤梨蓉要落多啲糖，鎧桐鍾意食甜啲。」
「呢個唔係咁整，要咁樣整先啱！」
我以生平最快速度，加上梅嬸多次提醒下，終於整到個似模似樣既蛋糕，賣相都唔差，味道就唔知啦！
「阿澄，睇鐘！」阿炫久違地開口。
我抬頭一望，依家係11點半，距離梅嬸離開人間仲有半個鐘。
梅嬸身上既紅繩基乎全黑，再唔趕過去，恐怕⋯⋯
「冇時間！」我高呼後，立即衝出阿炫屋企，跑到以前屋企旁邊既單位。
我瞄向旁邊昔日既家。
唔知呢個時候，父母係咪瞓緊覺呢？
我捧著手上既蛋糕，諗緊可以用咩藉口，可以比鎧桐？
如果我直接㩒門鐘，然後比蛋糕比鎧桐，感覺會：
「你邊個呀！變態佬呀！」鎧桐一腳踢我出門外。
到時實比差佬拉返差館！腦海中浮現出一隻兔，望住一隻熊被捕既梗圖。
我絕對唔可以做嗰隻熊！
仲有咩方法？
㩒鐘？！㩒完鐘即刻走去身後既防煙門，裏面有後樓梯，比人追都可以即走！
「叮噹！叮噹！」
隨住腳步聲接近，我立即衝去防煙門，並從玻璃中觀看鎧桐既反應。
鎧桐望向防煙門一眼，原本想離開家中，卻踢到地上蛋糕。
佢小心翼翼拎起蛋糕盒，俯視下發現蛋糕上既字句。
「I will always have your back.」
「媽，我知你仲未走⋯⋯你係咪係我隔離？」鎧桐捂著嘴巴，緊抱著蛋糕盒，在地上飲泣。
而梅嬸走到鎧桐旁邊，緊抱著佢既身軀。
梅嬸對鎧桐耳邊講左一句說話，一道白光隨即出現，陰間使者就嚟到，下一秒，梅嬸同陰間使者亦都消失，剩下鎧桐一人。
如果我成功出pool，係咪都會同梅嬸一樣，可以順利升上天堂？
一陣刺鼻既煙味傳入我既鼻腔。
回頭一望，煙霧正圍繞著身穿西裝而有小肚腩既男人。
「阿爸？」我脫口而出。
阿爸唔係戒左好耐煙咩？
阿爸緊皺眉頭，沉住氣講：「變態佬？」
死啦，阿爸以為我變態佬！好彩佢頭先聽唔到我叫左佢阿爸。
我望向自己一身裝扮，頭戴著黑色Hoodie既帽，頭先仲跑入防煙門，鬼鬼祟祟咁望住鎧桐。
難怪比阿爸誤會係變態佬⋯⋯
「夜媽媽你咪走呀！」阿爸將手上煙頭扔落地上，用鞋頭踩熄火苖。
「先生，件事唔係你諗咁樣，我可以解釋！」我高舉雙手。
「你仲想狡辯？」阿爸指住我。
原本想解釋既我，一諗到講梅嬸變成鬼，我再整蛋糕幫佢完成心願，再拎上嚟比鎧桐，然後睇住梅嬸離開人間⋯⋯講出嚟都冇人信。
真係冇人信！係鬼先係信！
「你咪走！我個女都係到住，你呢個變態佬！」阿爸開始跑。
「件事真係唔係你諗咁樣！」我邊跑邊喊。
「就算我係變態佬，你個女都死左啦！搞都搞唔到佢！」我再大喊。
身後急促既腳步突然停下。
我繼續跑，樓梯間空隙見到阿爸臉上閃過一絲訝異，隨即望向樓下既我，並緊握手上拳頭。
今次阿爸真係憤怒！
阿爸狂奔樓梯，突然縮窄數層樓梯既距離，就嚟捉到我⋯⋯我望向樓梯上既欄杆，心橫一計。
死就死！反正又唔係未死過！
「劉淽澄，你咪呀！」阿炫呼喊。
我把欄杆當成滑梯，以幾何級速度到達地下，然後奔跑離開大廈。
幾經辛苦終於跑到返屋企。
我打開雪櫃，拎走橙汁，咕嚕咕嚕咁飲落肚。
「舒服晒！」我攤係沙發。
「你舒服，我依家好唔舒服。」阿炫用不滿既語氣講。
「頭先唔好意思囉！搞到你被阿爸誤會做變態佬！個眼罩除唔除得，出晒汗啦！」
「唔除得！唔好再問！」
「你洗唔洗咁惡呀，唔除咪唔除囉！理得你皮膚焗到爛肉呀！」
「爛肉？乜你都會為人著想？」
「你好啦喎！一返嚟就撩架嗌！」
「你用我身體亂咁嚟，打架都算，我叫你唔好幫梅嬸，你知唔知偷野、比你老豆捉到，我真係上差館，仲有你滑欄杆呢？萬一你失足，我高空跌落嚟，入醫院，癱左以後行唔到路，甚至死左，到時我點算？」
「對唔住囉！非常時期，要用非常手段，我都係逼不得已。」
「我頭先身體冒住生命危險，你一句對唔住就想抵消？仲有我講過，唔好幫梅嬸，所謂『非常時期』根本唔存在！」
「點解你個人咁冷血？你明知唔幫梅嬸，佢完成唔到心願，就會成為惡鬼，惡鬼係會遺害人間，你比我更清楚呢個規則。」
「如果我冷血，你一定係自我中心。」
「自我中心？如果我自我中心，我一早唔幫梅嬸，揾方法幫自己快啲走啦！」我繼續講：「點解你見到啲鬼魂同你求助，你都唔幫佢地？如果連你都唔幫佢地，咁邊個仲會幫佢地？佢地變成惡鬼，都係因為冇人幫佢地達成個小小願望，你都有責任！」
阿炫沉默數秒，講：「只要過左你上我身體既期限，到時你做咩我都唔會再理你，包括你既心願，仲有唔該你搞清楚，你依家用緊我身體，所做既野都代表『楊燦炫』。」
橙汁映射出阿炫垂低頭既樣子，依家我就連自己既樣都睇唔到。
我摸住胸口既黑雞，一直做鬼以嚟，阿炫都幫左我好多，甚至借左黑雞比我旁身。
「咁我之後唔再出去囉！」
或者阿炫講得啱，我真係自我中心，冇諗過佢既感受。
「叮噹叮噹～」
唔通係阿炫父母提早返嚟？咁我咪唔洗再麻煩阿炫，可以離開呢個尷尬既困局！