變成女鬼既我，剩返30日要出POOL！: （十）同盟［P平台滿20Likes加更］

「咔嚓──」迎面而來既人卻係成柏傲。
 
佢係級中出晒名既狗公，成日周街溝女，好多女仔都嫌佢煩同中二病，而無視佢。
 
「Hey bro！」成柏傲一手將阿炫擁在懷裏。
 
「你乜事呀！」我立即推開成柏傲。
 
「Broooo！！！你做咩咁sensitive！！」作為成柏傲既朋友，似乎唔應該推開佢。
 




「求其講幾句，就打發佢走。」阿炫講。
 
「Bro!!! 知你一定依家好唔開心！！」我拍住成柏傲膊頭。
 
「不愧係我兄弟，你又知我因咩事唔開心？」
 
男人唔係煩錢就煩女人，成柏傲係小康之家，一定唔會因為錢而煩惱，所以一定係煩女人，而成柏傲最新目標係卓琳。
 
卓琳對我講過，如果唔係佢地父母係好朋友，一早block左成柏傲。
 




「卓琳又唔理你？級中大把女仔，點解唔轉其他人？」
 
「阿炫，今次我係認真想同Renee發展！最近Aria死左，佢真係好傷心，成日都唔想見人。」
 
「乜⋯⋯阿澄既死，對卓琳影響咁大？」
 
「佢好幾日都冇聯絡唔到，於是我搵auntie，一去到佢間房，見到佢個人係溫緊書，但神不守舍。」
 
死後我最關心阿樂，但無論係父母，還是朋友，我都忽略身邊重要既人。
 




「點解你咁想追卓琳？」我都好奇狗公既成柏傲，點解會鍥而不捨追卓琳。
 
「我之前講過，你係咪咁冇兄弟心？」成柏傲瞬間到我既身後，勒緊我既頸，令我喘不過氣。
 
「喂……你放手……放手呀……」我大力拍打成柏傲既手。
 
呢種感覺好似死前，喉嚨被勒緊，我好用力甚至用口呼吸，但感覺氧氣越嚟越少，好辛苦……
 
唔通我要以楊燦炫身體再次窒息而死？
 
「Sorry…..bro，冇事？」成柏傲問。
 
「冇事……咳咳咳……」啱啱好似入左鬼門關一轉。
 
成柏傲係阿炫屋企自出自入，轉頭手上捧住薯片、可樂同花生。




 
「一齊打返鋪機！」成柏傲熟練咁操作電視機。
 
屌，平時好少打機，完全唔識打。
 
「喂！咪打機！」我收起遙控器。
 
「食完野，好快啲返屋企！」我搶掉成柏傲手中既汽水講。
 
「阿炫飲汽水唔配花生？」
 
「我對花生敏感。」我衝口而出。
 
劉淽澄係對花生過敏，但楊燦炫唔係！
 




「劉淽澄你搞咩呀！」楊燦炫大喊。
 
「我意思係……」當我諗緊藉口解釋時，成柏傲企圖想奪走我身上既墨翠。
 
「你做咩呀！」
 
「你唔係楊燦炫。」成柏傲收起放蕩既笑容，篤定盯住我講。
 
我故作冷靜，深呼吸後講：「成柏傲你個on9仔，係咪中二病上身？」
 
「呢下扮得幾似，你講，到底你係邊個，點解要上阿炫身？」成柏傲當場撕出符咒指向我。
 
「你憑咩話我唔係楊燦炫？仲有我點解要證明自己就係本人？」
 
「平時阿炫身手咁好，點會比我搞到就窒息，最重要一點，阿炫好鍾意食花生，又點會有花生過敏？」




 
「果然冇野瞞到成柏傲，阿澄你同佢坦白，當你講得花生過敏，我就知佢點都會發現。」阿炫嘆左口氣講。
 
「無錯，我唔係楊燦炫，真正身份係劉淽澄。」
 
「如果你係Aria，點解你仲係人間，同埋真正既阿炫去左邊？」
 
「呢一個月內我一定要完成心願，先可以離開人間，仲有阿炫冇走過，一直都係到。」
 
「如果完成唔到心願呢？阿炫唔可以返嚟？你偷左阿炫身體完成心願？」
 
我扯開衣角，展現紅繩，繼續講：「呢條係紅繩，每過一日，就會黑一格，當條繩全黑，代表1個月過去，只係無法完成心願就會成為惡鬼，遺害人間，我唔想傷害人。你最想知阿炫去左邊，佢就係我心入面，一直聽緊我地對話，我上佢身，只係一場意外。」
 
「只不過我點證明阿炫係你身體入面，我問3條問題，答到證明你冇講大話。」
 




「請講。」
 
「我最唔鍾意食咩？」
 
「你講過會食三色豆既人都係反社會人格。」
 
「第二題，我既初戀係邊個？」
 
「小學老師Miss Chan，因為佢成日著黑絲。」
 
「最後一題，我最鍾意既av女優係邊個？」
 
「河北彩花。」
 
「加多題，我一個星期打幾多次飛機？」
 
「每日一次。」我忍唔住望住小柏傲數眼，唔知今日起左機未呢？
 
「連打飛機次數都知，證實阿炫真係喺到。Aria，你點上佢身？」
 
我回想起同阿炫意外接吻一幕，耳根不禁發熱。
 
「Wow! 你對耳好紅！睇嚟你同阿炫發生左啲不可告人既Secret～」
 
「總知就唔關你事啦！」
 
「你心願係咩，睇下我幫唔幫到你？」
 
「我既心願係出Pool。」
 
「你鍾意既人我識唔識？」
 
「你都識，佢就係阿樂。」
 
「Great! 你幫我追Renee，我幫你追阿樂！」成柏傲臉上勾起狡猾既笑容。