變成女鬼既我，剩返30日要出POOL！: （十一） 迪士尼
「但係我依家係阿炫喎！」 阿炫唔會同意我同阿樂表白，更何況我下定決心，唔可以再無視阿炫既意見。
「阿炫咪啱囉，阿炫係阿樂好朋友，加上阿樂好驚鬼，你用阿炫身份講佢會冇咁驚，最多just for fun!」
「Just for fun? 阿炫唔同意，我係唔可以去，阿炫唔想比阿樂誤會佢係Gay！」
「Aria，其實我地係唇亡齒寒，我地都需要大家既情報去追鍾意既人。你依家徵求阿炫同意，呢個交易對我地3個人都有好處。」成柏傲望住我，勾起不知意思既微笑。
「阿澄，你去。」阿炫回答。
「你認真㗎？」我語調不禁提高。
「呢個係你離開人間既關鍵。」阿炫講。
「阿炫同意左！咁我地去邊先？」我手舞足蹈。
「Disneyland，我相信冇女仔係唔鍾意Disneyland。」
「Err……卓琳真係唔鍾意迪士尼，佢好憎啲公主，話迪士尼成日矮化女性，唔明點解公主永遠等王子拯救。」
「其實我已經買好晒迪士尼飛。」
「下？」
「之前Daddy話同事臨時唔得閒，送左4張飛比佢，佢就比左我，原本我今日上嚟係想約阿炫去迪士尼，發現你上左阿炫身係意外驚喜。」
我、成柏傲、阿樂、卓琳……采欣上次去食飯，都係因為成柏傲請客，以佢鍾意二人世界既性格，今次應該唔會嚟。
「除左我地4個，不如叫埋雅璃？」
「我得4張飛，仲叫Ellie？況且Ellie個人好靜。」
「卓琳除左我同采欣，佢同雅璃都好fd。雅璃係靜左啲，比較慢熱，熟左就會多野講。最重要係你覺得卓琳見到3個男仔，佢會肯去迪士尼咩？」
「但我得4張飛！」
「你想唔想成功追到卓琳？」
「剩低張飛我會諗辦法搞掂，星期六10點Disneyland 門口等。」
「你諗到點約卓琳同雅璃？」
「放心，到時你只要人到就得。Oh Yes!」成柏傲將花生由上空拋到口中。
「你叫成柏傲記得掃地先好走。」阿炫用平淡既語氣講。
「阿炫叫你掃晒地下啲花生就好走。」
「Sure!」成柏傲已經自動自覺去廚房拎掃把，掃完地就走左。
「阿炫，我仲以為你唔會同意我用你身體去迪士尼。你唔驚比阿樂誤會做Gay咩？」我望向鏡中阿炫講。
「只要你走左，我先可以拎返自己身體，呢啲誤會之後我同阿傲會解釋。呢兩日唔該你留係屋企温書，我係DSE考生，呢排因為你，温少左好多野！」
「點解我死左都仲要温書！」我大喊。
距離星期六，剩返2日，我同阿炫就要告別。
好快嚟到星期六，當我以為自己最早嚟迪士尼，點知雅璃已經一早等緊我地。
「Hi!」我主動揮手。
「Hi.」雅璃細聲回道。
「今日好熱，雖然係2月，但都成25度！」
「係呀。」
「你唔熱咩？」
「還好。」
「你幾點鐘嚟到？」講緊我早左10分鐘到。
「早你5分鐘。」
以前係劉淽澄既時候，同雅璃講野都唔會咁dead air，睇嚟同性異性係有分別。
「Yo bro!」一把輕快既聲音劃破靜止既空氣。
成柏傲旁邊仲多左個人，係駱鈞堯，其肌肉在陽光下更係澎湃，果然係級中肌肉最發達既男生。
「喂！成柏傲，點解駱均堯會嚟，今日唔係得5個人咩？」我拉成柏傲到旁邊講。
「Aria, 叫埋阿堯過嚟咪幾好，熱鬧啲。」
「你係想雅璃同駱均堯一齊，想製造你同卓琳既獨處機會？佢地完全冇講過野，唔熟㗎！你特登買多張飛？」
「我買多張飛冇所謂啦！佢地相處一日咪熟，好多人都係由唔熟變熟，佢地一齊玩，你同阿樂先可以有多啲相處時間。Aria，I just help you～唔同你講，Renee行緊過嚟，係咁先～」成柏傲行先幾步，拎住風扇，吹向卓琳。
「好凍。」卓琳板著臉，成柏傲立即熄風扇。
眼前卓琳戴左黑色鴨舌帽，帽下眼睛無神，臉色憔悴，其上身黑色樽頸棉衫，下身深藍喇叭褲，再加常著既converse黑鞋。
「Renee, are you ok?」成柏傲問。
「如果今日留係屋企咪ok。」
「Why？」
「最近阿澄死左，係你先有心情出嚟玩，你同我阿媽夾埋要我出嚟，咁我都冇辦法。」卓琳冷笑。
「我同auntie 想你happy啲，你當今日嚟散下心。」成柏傲向前行近一步，卓琳卻退後。
「Sorry，我遲左10分鐘，要你地等我。」眼前阿樂戴上咖啡色貝雷帽，上身白色裇衫，加奶茶色冷衫，下身係黑色寬褲。
「阿炫？阿炫！」阿樂係我面前揮手，我才回魂。
「阿炫，你發燒呀？塊臉咁紅既！」阿樂靠近我，用手為我探熱。
怦怦怦怦怦……
以前只可以同阿樂一直保持異性既距離，係因為我依家係阿炫，所以先咁近距離接觸嗎？
「媽咪，我想要氣球！」旁邊小妹妹嚷著。
我望向氣球方向，諗起以前我都會叫阿媽買氣球比我，相簿仲有我拎住Belle個氣球既相。
小妹妹一邊牽住媽媽既手，一邊緊握手中氣球。
雖然我已經諗好點同阿樂表明自己既心意，一諗到呢點，心臟就加速跳動。
「咁我地玩space mountain？」成柏傲問。
「我唔玩機動遊戲，你地玩啦！」雅璃講。
「我最鍾意玩space mountain！」駱均堯興奮歡呼。
「我冇興趣。」卓琳冷冷咁講。
「我同阿炫都唔玩」阿樂講。
事前嚟迪士尼已經做左功課，令人心動莫過於係機動遊戲，所產生既吊橋效應，要製造心動既感覺，阿樂就一定要玩過山車。
「不如我地想試下玩過山車？」我用輕快語氣講。
空氣突然靜左半秒。
阿樂望住我，神色古怪，講：「阿炫，你唔係畏高咩？」