變成女鬼既我，剩返30日要出POOL！: （十二）勝利

「阿炫，阿樂到底鍾意啲咩？」我一邊托腮，一邊轉筆。
 
「與其了解阿樂鍾意啲咩，最重要避開佢唔鍾意既野。」
 
「快啲講啦！再唔講，我就唔比你温範文！」
 
「我冇話唔講，同阿樂去迪士尼，佢一定唔會玩機動遊戲，因為佢好驚離心力。」
 
「搞錯呀！上網啲人都話玩機動遊戲，最容易產生曖昧。」
 




「除非你話去玩。」
 
「我話去玩？阿炫，你對阿樂既影響力咁大？」
 
「因為成班男仔去玩，以阿樂驚孤單既性格，佢就會5050。」
 
「點先令佢100%去馬？」
 
「你知唔知男人最重視係咩？」
 




「錢？」
 
「錯。」
 
「女人？」
 
「都錯。」
 
「開估啦！」我唔耐煩，用力蓋過筆記。
 




「面子。」
 
「認真呢？」
 
「你唔信？到時咪知我講既野啱唔啱，仲有打開筆記，我要溫書。」我只好死死氣打開筆記。
 
「激將法？」
 
「無錯，Highlight 第五個語釋。」
 
「Highlight左，快啲講！」
 
「只要以『男人』、『膽量』呢啲字眼，包保阿樂會玩機動遊戲。」
 
「楊燦炫， 18年嚟都冇玩過機動遊戲，你係咪男人嚟㗎，仲冇膽過我！」




 
「劉淽澄，你！」阿炫激動地喊。
 
「睇嚟呢招真係幾Work！」我捂著嘴笑，講：「到時我表明阿澄身份，同阿樂成功表白就走，咪提前還返身體比你！」
 
空氣突然靜止，我嚷著：「喂！你係咪太開心，一時之間諗唔到講咩！」
 
「聽日就可以拎返身體之餘，耳邊仲少個人，安靜好多。」聽落阿炫充滿活力，睇嚟佢真係好憎我霸住佢身體。
 
回想起琴日同阿炫既對話後，我回應：「正正因為我畏高，身為男人，就係要嘗試克服佢！阿樂，你唔係冇膽呀嘛？」
 
阿樂望向眾人，眼光最後停留係我身上，用堅定眼神，講：「我平時陪你咋！嚟呀！」
 
果然男人了解男人，阿炫係有啲料到！
 




「阿樂，唔好比我見到你臨時縮山。」成柏傲講。
 
成柏傲，做得好！
 
我用感激既眼神望住佢，成柏傲只係向卓琳方側頭，示意陣間要幫佢手。
 
等左廿分鐘，終於可以上過山車。
 
「阿樂，作為真男人，我地要揀最後。」
 
坐最後離心力係最強同刺激！
 
「你話事。」阿樂露出自信既笑容。
 
「我地玩唔嗌遊戲，邊個坐到最後唔嗌，就當贏對方，輸家要實現對方一個願望，點樣？」




 
「咁如果我地兩個嗌左，咁邊個贏？」
 
「早嗌既輸先。」
 
「到時準備實現我既願望。」
 
「睇下點？」我單邊挑眉，輕佻地笑。
 
我係連海洋公園小丑過山車，都可以笑住玩既人，區區space mountain，又點會難到我？
 
我同阿樂一同坐到最後排，旁邊阿樂多次檢查安全帶後，便緊握前方既安全杆。
 
阿樂額頭冒汗，真係得意！
 




我忍唔住伸手幫阿樂抹汗，阿樂呆愣望住我，問：「你⋯⋯做緊咩？」
 
「我啱啱見你頭頂有蚊，哎呀！」
 
「啪——啪——」我假裝打蚊。阿樂，我對你唔住！呢個時候唔適合表白，我要留返實現願望先得。
 
「隻蚊走左未呀？阿炫你咁重手！」
 
「走左啦走左啦！」
 
好快過山車就開始，鑑於Space Mountain 漆黑一片，只有丁點熒光，對於第一次坐過山車，仲要玩機動遊戲既人嚟講，所有未知係會產生恐懼。
 
隨住過山車逐漸加速，高低不斷起伏，我感到越嚟越興奮，但唔可以大喊，真係可惜。
 
「呢度好黑，好似有⋯⋯」阿炫講。
 
「有咩？」我轉頭用氣音講。
 
「冇野。」
 
我不禁翻了白眼，阿炫真係氣氛破壞者！
 
我感覺過山車上到高峰，準備衝落嚟。
 
「哇——哇——哇——哇——哇——哇！」旁邊既阿樂終於忍唔住大喊。
 
我藉此捉緊阿樂手臂，大喊：「HUUUUUUUUUU!!!!!! YEAH!!!!!!」
 
經過多次高低起伏，過山車終於完結。
 
阿樂玩到滿頭大汗，似乎虛脫，而我則是精神奕奕。
 
「今次遊戲我贏。」我展現勝利者既笑容。
 
「我願賭服輸，你係咪想我今日買單？」
 
「今日自然會同你講，你等下啦！」
 
「搞咩，平時神秘我都理解，我唔似阿傲可以接受靈異事物，但今日咁神秘，連我都唔講？」
 
阿炫同我講過，成柏傲之所以知道墨翠及驅鬼一事，係因為佢可以感應到鬼魂氣息，相反阿樂係普通人，同埋好驚鬼，阿炫好自然就冇同阿樂講。
 
「點呀～邊個贏左？」成柏傲笑住講。
 
「梗係我啦！」我得戚笑住講。
 
我地離開過山車後，經過star wars store，成柏傲同駱均堯停低睇佢地鍾意既角色。
 
點解啲男仔咁鍾意star wars? 打嚟打去好睇咩？
 
我不禁打左個呵欠，恰巧轉頭，便與阿樂對上視線。
 
「阿炫，你竟然唔睇Obi-Wan Kenobi？」阿樂問。
 
「啱啱坐完過山車有啲頭暈，下次先啦！」我求其揾個藉口蒙混過去。
 
「不如我地出去坐低先？佢地一定有排睇！」阿樂搭住我肩膊。
 
「好。」我微笑回道。
 
估唔到扮病可以獲得同阿樂單獨相處時間，yesssssssss!!!!!
 
我摸住額頭，同阿樂一同坐下外面既長椅。
 
微風吹拂，吹過阿樂既髮絲，側顏仍然好靚仔。
 
我趁機靠近阿樂既肩膊閉目休息。
 
可能阿炫比阿樂矮，挨落去阿樂唔會好吊頸，角度啱啱好，加上阿樂肩膀夠寬同有肉，就好似枕頭一樣舒服。
 
我微微打開眼縫，阿樂正在凝視我既臉孔。
 
我睜大雙眼，令阿樂措手不及，呆愣望住我。
 
「阿樂⋯⋯我想講⋯⋯」
 
我應該由邊到講起，直接講我鍾意佢？
 
定係要講清楚我身份，會唔會嚇親佢？
 
依家唔講，今日就要再搵機會。
 
點算好？？？？
 
「阿炫，你想講咩？」阿樂保持微笑問。
 
「我鍾意你！」
 
阿樂隨即把我緊擁喺佢既懷中，興奮咁講：「阿炫，其實我鍾意左你好耐。」