變成女鬼既我，剩返30日要出POOL！: （十三）失敗

我臉上既笑容瞬間凝結。
 
阿樂鍾意阿炫？阿樂係Gay？
 
等等先，點解我仲未見到道白光？陰間使者仲未嚟接我走？唔通係因為阿樂表明，自己係鍾意阿炫，唔係我，所以我先走唔到？
 
「劉淽澄，你搞乜野？」阿炫大喊。
 
阿樂冇鍾意過我？阿樂冇鍾意過我？阿樂冇鍾意過我？
 




「阿樂，你一直以嚟都鍾意我？」我強顏歡笑。
 
「當然啦，只係我一直以為你係直，所以先收埋自己心意，冇諗過你會主動同我表白。」
 
仆街，依家人都走唔到，點收科？
 
「點解你仲未走？你唔係完成左心願咩？」阿炫問。
 
我已經表明自己心意，定係阿樂一定要鍾意我，先係完成心願？有冇辦法將佢由曲變直？
 




「阿樂！」
 
「阿炫，咩事？」阿樂用寵溺既眼神望住我⋯⋯係望住阿炫。
 
心中抽痛數下，胃液正在翻騰。
 
「阿樂，我想去廁所！」話畢，我立即跑向洗手間。
 
「嘔——」酸味從喉嚨中湧上食道。
 




點解？點解！
 
「喂，你冇事呀嘛？」阿炫問。
 
「阿炫，我係咪要做惡鬼？」我從馬桶水倒影中，睇到自己疲憊不堪既樣子。
 
「你快啲同阿樂講清楚，頭先你講笑，我當阿樂係朋友，永遠都係。」
 
「楊燦炫你答我呀！你係咪一早知，阿樂鍾意你，你想我表白，想睇我出醜，當係報復以前我唔聽你話！」
 
「劉淽澄，你真係咁諗我？」
 
「唔係咩？我就知你冇咁好死會幫我，你連普通鬼魂揾你幫手，你都無視佢地！」
 
「你唔好將表白失敗全部歸咎係我身上，仲有選擇幫，定唔幫，完全係我個人選擇，你冇資格出聲！」




 
「既然你咁講，我就用你呢副身體，令阿樂鍾意全新既『你』！」我氣沖沖離開廁所。
 
「劉淽澄，你唔好唔記得，呢副身體真正主人係我，你剩返既日子唔多，過多3日，你就要係我身體出嚟。」
 
「即係我仲有時間。」話畢，我奔向阿樂身旁，佢展開燦爛既笑容。
 
只要可以接觸阿樂，我就心滿意足。
 
「阿炫，你冇事呀嘛？頭先你面色好差，定係我送你返去？」
 
「我冇事，純粹搭完過山車，嘔完好好多，可以繼續玩。」
 
「你唔好逞強，有咩事可以同我講，你唔講我會好擔心你！」
 




「聽講頭暈食糖會好啲，可以補充血糖。」阿樂將果汁糖塞在我既手心。
 
我輕輕握著阿樂既手微笑。
 
比起食糖，只要見你緊張我⋯⋯就足夠。
 
成柏傲同駱均堯從店鋪出嚟。
 
「劉淽澄！放開阿樂！」阿炫喊著。
 
我立即鬆手，苦笑望住阿樂，阿樂無奈地點點頭。
 
二人分別走到我同阿樂旁邊，我同成柏傲行係前面。
 
「你係阿炫定Aria？」成柏傲盯著我講。




 
「有分別咩？」
 
「好大分別喎，Aria～我個鼻好靈敏～睇你同阿樂進展幾好。」
 
「如果我話你知，我表白完，但走唔到，而阿樂鍾意既人係阿炫，你覺得我可唔可以令阿樂愛上我？」
 
「Aria，如果阿樂身體換係阿炫靈魂，你會唔會愛上呢個『阿樂』？仲有你走唔到，可能係其他Reasons。」
 
阿樂面孔換上毒舌既阿炫？咪玩！
 
我個腦突然浮現同阿炫交換身體嗰一幕，仲有之前一齊打鬧既場景。
 
我不禁勾起嘴角，我同阿炫係成日互Mean，但就好快和好。
 




我趕快拍一拍自己既臉蛋。
 
「睇下你個反應……有冇咁憎阿炫？你依家決定點做？」
 
「我想……」
 
「Renee, Ellie!」成柏傲大力揮手，接住講：「我地啱啱玩完space mountain，你地有冇咩想玩？」
 
「唔玩刺激既機動遊戲就得。」卓琳只係望風景。
 
「咁我地去小小世界？Renee，你地頭先做緊咩？」
 
卓琳用緊手機，冇再回應。
 
「我地冇所謂，頭先係café飲下野等你地。」雅璃久違回應。
 
「喂，阿樂阿炫。」駱均堯強行插入我同阿樂中間，並搭住我地肩膊，繼續講：「你地太瘦啦！」
 
「我每日放學都有打籃球。」阿樂講。
 
「每日打籃球都唔得，你地肌肉量嚴重不足，好似阿炫，一睇就知體型偏瘦，平時一定唔多做運動。」
 
阿炫點會冇做運動，明明個日就見到有腹肌。
 
「我覺得你地要有個健身計劃，最多咁，我抵諗啲，傳授我既私人備笈比你地。」
 
以前已經知駱均堯係健身狂魔，係唔知佢咁痴線，逢係男仔都叫做gym，怪唔知男仔見到佢會即走，仲以為佢地太誇張，真係唔明成柏傲咁多個男仔唔叫，偏偏叫佢過嚟。
 
「好呀～遲啲先～」阿樂講。
 
「依家比個備笈比你地！拿，首先朝早起身，就要深蹲20下⋯⋯」
 
「嗚哇──」前方係正門遇過既小妹妹，原地嚎哭。
 
雅璃上前問：「小妹妹，你父母呢？」
 
「媽咪……媽咪唔見左……」
 
「唔洗驚，話比姐姐知。」雅璃蹲在地上。
 
「頭先同媽咪……買野……我見到有公主……點知媽咪就唔見左……搵唔到…… 」小妹妹揉搓雙眼。
 
我摸摸口袋，係啱啱阿樂比我既果汁糖。
 
「呢粒糖糖請你食呀～食完粒糖糖就會搵到媽咪～」我走上前，並把果汁糖取出。
 
小妹妹接過糖果，然後放在口中品嚐，暫時冇再喊。
 
「喂，咁依家小妹妹點算？」成柏傲問。
 
「帶佢去city hall。」卓琳講。
 
「咁我同你一齊帶小妹妹去？」成柏傲興奮地講。
 
突然，我感覺有股暖流傳過我既掌心，低頭一看，小妹妹緊握我同雅璃既手。
 
「成柏傲，好明顯小妹妹痴住楊燦炫同雅璃。」卓琳翻白眼。
 
「咁我同雅璃帶小妹妹去city hall先，你地玩住game先！」我講。
 
「阿炫，有咩事就打比我地。」話畢，阿樂就比駱均堯捉住，駱均堯似乎繼續分享操肌心得。
 
小妹妹一臉擔憂，我又何嘗唔係？明明我頭先就應該離開人間。
 
我再次弄紅繩，仍然冇任何反應。
 
到底係咩原因呢？
 
3日內，無可能令阿樂鍾意我，時間太短，始終我唔係真正既阿炫。
 
「楊燦炫，我唔係好認到路，你認唔認到路？」雅璃既聲音把我拉回到現實。
 
「哦⋯⋯認到，呢到過左一個園區就返去大街，好快揾到City Hall。」
 
我地行左一段路，雅璃突然問：「其實City Hall有咩用途？」
 
「嗯？City Hall，你當係迪士尼既information centre，有咩疑難，去City Hall就得。」
 
「我問呢個問題係咪好白癡？」
 
「唔會，你係咪好少嚟迪士尼？」
 
「其實今日係我第一次嚟迪士尼。」雅璃細聲講。