變成女鬼既我，剩返30日要出POOL！: （十四）真正心願

「下次我地再嚟過！迪士尼真係好多野玩，你今晚就可以睇到煙花！」
 
雅璃微微張開嘴巴，然後臉上泛起一抹微笑，講：「我仲以為⋯⋯唔係⋯⋯睇唔出男仔都咁鍾意迪士尼。」
 
唔知阿炫係咪都鍾意迪士尼？
 
我猛然搖搖頭，佢一定唔鍾意迪士尼，睇佢平時佢人木木獨獨，房間冇咩擺設就知。
 
雅璃尷尬笑一笑，講：「唔好意思，睇嚟我誤會左。」
 




「劉淽澄，你終於冇亂講野。」聽落阿炫幾開心。
 
突然小妹妹停下腳步，並扁住嘴巴。
 
「小妹妹，你口渴定肚餓？」雅璃問。
 
「我行唔郁。幾時可以見到媽咪？」
 
「等多十步，好快見到媽咪。」雅璃摸小妹妹髮頂。
 




趁住雅璃安慰緊小妹妹，我咧開嘴巴，轉過身，細聲講：「阿炫，你夠唔夠力咩起佢？」
 
「冇力平時點殺鬼？」
 
我轉身，並單手抱起小妹妹，將佢放係我肩膞上，講：「小妹妹，坐穩啦！」
 
雅璃瞪大雙眼數秒，然後同小妹妹講：「小妹妹，唔好亂郁！如果唔係，你同哥哥就會受傷。你要乖乖地坐係上面。」
 
「知道。」
 




「楊燦炫，小心呀！」雅璃皺一皺眉，同時我嘴角向單邊揚起。
 
有驚無險下，我地終於行到City Hall。
 
我放低小妹妹，同雅璃拖住佢既手。
 
「媽咪呀！」小妹妹瘋狂搖動佢既雙手，原本冇生氣既雙眼變得有靈魂。
 
小妹妹媽媽迎面而來，緊抱住佢。
 
「真係唔該晒你地帶晶晶返嚟！晶晶，快啲唔該哥哥同姐姐！」晶晶媽媽講。
 
「唔該哥哥同姐姐。」晶晶點點頭。
 
「好小事啫！」我講。




 
睇住母女重聚，令我懷念母親懷中既温暖。
 
如果⋯⋯如果我真正既心願並唔係想出Pool，而係同父母有關？
 
「我揾到啦！」我大喊。
 
「你揾到咩？」雅璃一臉驚訝望住我。
 
「冇野！我地返去同阿傲佢地會合！」
 
「唔好意思，我聽一聽電話。」雅璃行開一旁接電話。我都趁住呢個空檔，Wts成柏傲，問佢地係邊。
 
「嗡——嗡——」來電人係阿樂。
 




「喂～阿炫～你地依家係邊？」
 
「我地行到明日世界。」
 
「太好啦！即係好快可以見到你！啱啱你唔係到，駱均堯同我講左好多操肌心得，我個腦淨係諗住你幾時返。」
 
「哦⋯⋯係呀⋯⋯」
 
「阿炫？」
 
「嗯？」
 
「冇野啦，我地陣間見面再講。」
 
「好。」我馬上收線。




 
既然我既心願係家人，而阿樂係Gay，佢根本冇可能鍾意我。
 
咁我係咪要⋯⋯
 
「Sorry⋯⋯我有啲⋯⋯有啲急事要走先，麻煩你⋯⋯幫我同佢地講！」雅璃紅著眼眶，神色慌張。
 
「你冇事呀嘛？」
 
「下次我地再約！」雅璃強顏歡笑，就急忙跑掉。
 
雅璃到底咩事呢？
 
「劉淽澄，你都係唔好擔心人！」阿炫講。






「雅璃睇落好奇怪，但係⋯⋯」
 
「但係你又幫唔到佢？」
 
「你又知我想講咩？」
 
「你頭先係咪揾到你真正既心願？」
 
「我諗我既心願應該同屋企人有關，見到啱啱小妹妹重遇返佢阿媽，就諗起自己生前好多野都冇同阿媽講，同埋好多野都冇同佢做，而覺得可惜。」
 
「你⋯⋯唔係鍾意阿樂咩？」
 
阿炫點解咁既語氣？
 
「但佢鍾意既人係你，而唔係被劉淽澄上身後既你。佢望我既眼神，總係令我覺得愧疚，彷彿我好似拎左唔屬於我既野，同時我回報既愛，都唔係佢想要。」
 
「你唔係話要用我既身體得到阿樂既愛咩？以你自我中心而又任性既人，你大可以咁做，反正呢3日我都出唔到嚟。」
 
「我都唔知⋯⋯或者成柏傲講得啱？」我行到明日世界，見到門口掛上「因緊急維而暫停開放」既告示。
 
「呢度有惡鬼既氣息。」阿炫突然嚴肅講。
 
「惡鬼？」
 
「我地依家要潛入去Space mountain。」
 
「我未見過惡鬼，完全冇經驗，更何況入面一定有員工，我點入去？」
 
「我教你。」
 
「我唔得呢！我都唔識！」
 
「你知唔知如果唔清除惡鬼，呢個世界會變成點？」阿炫見我冇回應，接住講：「呢個世界會充滿好多唔合理而恐怖事件，包括冇兇手既罪案、失蹤。」
 
「咁嚴重？」
 
「咁你明點解我一定要清除惡鬼？」
 
「我一個人真係搞得掂？」
 
「你唔識計數？我唔係人？」
 
我彎起嘴角，十指緊扣下拉左右手既筋，講：「你講，第一步要點做？」