變成女鬼既我，剩返30日要出POOL！: （十五）魔靈

「依家門口暫時冇人，直接行入去。」
 
「入面一定有Staff，咁我點做？」
 
「背囊第二格有電擊棒。」
 
我摸黑前進，電暈一個職員後，阿炫講：「快啲換佢套員工衫，我地要扮做Staff先冇人懷疑。」
 
「點解你隨身帶埋電擊棒？」背包入面仲有木劍、佛珠、符咒等，怪唔知背包咁重。
 




「未雨綢繆，邊似你咁？」
 
我一邊換衫，一邊講：「死啦！CCTV點搞呀？咁咪睇到我⋯⋯你係到換衫？」
 
「惡鬼可以整壞Space Mountain，區區一個CCTV，佢點會唔破壞？」
 
「既然冇CCTV，都唔洗換衫啦！」
 
「以防萬一，做Staff可以轉移視線。阿澄，你今次一定要聽我講野，千奇唔好擅自行動，好危險。」
 




「我依家咪聽緊你講野！為左世界和平，唔可以比唔合理罪案發生既！」我講完之後，阿炫輕笑一聲。啱啱好我換完衫，比職員目睹一切。
 
「喂，你係到做咩？你唔係我地呢度既職員！」職員大喊，並向走向我。
 
當我想跑既時候，阿炫講：「佢後面有惡鬼，你要電暈呢個職員先。」
 
「你咪再自言自語⋯⋯呀！！！」職員上前之際，突然失控尖叫。
 
職員倒地，身後卻係面目扭曲既惡鬼。
 




「我唔識⋯⋯我都係第一次見⋯⋯惡鬼⋯⋯」惡鬼逐步上前，但我既雙腿彷如灌鉛無力，呆站原地。
 
「阿澄，你冷靜聽我講！我地任務係要令Space Mountain重新運作，你頭先咪話要阻止世界唔合理既事發生，之前唔聽我勸告都要幫梅嬸，拎返呢份勇氣出嚟，只要成功，以後就少啲人受害。」
 
「真係得咩？我好驚呀，阿炫⋯⋯我驚⋯⋯我驚萬一冇經驗，搞到你比惡鬼殺左⋯⋯咁點算？」惡鬼同我距離唔夠三步。
 
「阿澄，睇嚟你唔記得我家族背景，我阿爸、阿爺，太公，都係驅魔師，只係一隻普通惡鬼點會難到我？」
 
明明聽落唔似安慰，但我心中卻鬆了一口氣。
 
「阿澄，你扔符咒，令佢無力，再用木劍刺中佢既心臟，或者頸部同頭部，總之人受重大傷害既位置，就適用於惡鬼。」
 
我退後數步，先扔符咒，然後再取出木劍。
 
儘管手心抖震，但我用最大力氣將劍刺在惡鬼心臟。




 
上前既惡鬼一臉哀呼，然後化為灰消失。
 
「安息啦！」我打開眼睛，用堅定眼神講。
 
「左手拎埋伸縮鐵棒，我感覺到仲有12隻惡鬼。」
 
「到底你點知？」
 
我向前走，沿路上惡鬼左右夾擊，我將符咒高拋，然後逐一擊破。
 
一位身穿維修制服職員半吊在上空，臉正發紅，身旁圍繞著一股黑霧。
 
「阿澄，將符咒扔去黑霧入面！」
 




職員跌坐地上，然後暈倒。
 
黑霧中既惡鬼轉頭，樣貌竟然同一般人類無異。
 
佢身穿紅色連身裙，露出其豐滿身材，加上一把柔順烏黑及腰曲髮，生前應該係美人。
 
「哈哈哈！！！！！！！！！！係人類？！！！！！」惡鬼面目猙獰咁大笑。
 
我將符咒扔向佢身上，符咒卻被其身上黑霧燒掉。
 
「係魔靈。」感覺到阿炫咬牙切齒。
 
「魔靈？」
 
「終於等到你嚟！！！呢十年我真係好無聊！！」魔靈笑道：「解除封印後，我地終於見面，比起十年前你長大左好多。你隻右眼係好靚既綠色，全靠佢我先揾到嚟呢度，只可惜我係時候要拎返！」魔靈奸笑。




 
下一秒玻璃碎片飛過，並𠝹破眼罩。
 
地上玻璃碎片倒影映射出，阿炫左眼係啡色，右眼卻係⋯⋯綠色？
 
點會咁樣㗎？阿炫隻眼唔係因為交通意外受傷？
 
「魔靈係特登設局引我地嚟！阿澄，退後，千奇唔好比佢掂到！」
 
我轉頭向後奔跑。
 
「哈哈哈！！！！唔好意思，快你一步，你隻眼係屬於我！」魔靈想伸手到眼睛，我立即抬頭伸向後方，劃破一陣強風。
 
我手上緊握鐵棒，圍圈踱步。
 




「冇見咁耐，幾好身手！」
 
「澄，後面！」我立即揮棒到身後。
 
「哇，即刻精神晒！你當時隻貓真係好好味，我食得好開心！」
 
「咩話，你食貓！屌你老母有冇人性！」我忍唔住向前揮動鐵棒。
 
「不如同你玩個遊戲？贏左，我放過其他人。」魔靈指住旁邊，一個個職員暈倒，攤晒係過山車車廂上，接住用氣音，對住我耳邊講：「輸左⋯⋯嘻嘻⋯⋯」
 
「千奇唔好聽魔靈既提議。」阿炫講。
 
「死八婆！收皮啦！」我按下身後過山車總掣，啟動過山車後再按暫停，魔靈就冇人質係手。
 
「嘻嘻⋯⋯你得意左咁多！」魔靈從我身後出現，並緊握著我既脖子。
 
「你就咁樣比我慢慢吸入靈氣，今次你冇咁好彩⋯⋯係墨翠！」魔靈尖叫。
 
「澄，戴上佛珠，我讀一句，你讀一句。」
 
我急忙係背囊中拎出佛珠。
 
「南無楞嚴會上佛菩薩！妙湛總持不動尊，首楞嚴王世稀有⋯⋯」
 
儘管魔靈喘著氣，但佢突然衝上前，令我措手不及。
 
「嘻嘻！！！！哈哈哈！！！又想封印我？」魔靈扯起我既衫抽，露出左紅繩，快要抽斷紅繩。
 
唔通我同阿炫就死係到？