變成女鬼既我，剩返30日要出POOL！: （十七）歸位

我同阿樂對視數秒，然後講：「無錯，你估中。」
 
阿樂急步上前，用力按著我既雙肩，講：「真正阿炫去左邊？點解你要奪舍？」
 
「劉淽澄，你出聲啦！」
 
「鍾健樂，你揸到我膊頭好痛！放手呀！」
 
「你一日唔講阿炫去左邊，我一日都唔會放手！」
 




眼前既阿樂一反常態，同平時溫文爾雅既佢，彷彿兩個人。
 
「阿炫係身體入面，依家你既一舉一動佢都睇到晒！」
 
阿樂立即放手，講：「阿炫，我無心整痛你……咁佢咪……咩都知道晒……」
 
佢瞪大雙眼，掩著嘴巴。
 
「成件事我真係可以同你解釋，件事唔係諗咁樣。」
 




於是我將成件事既來龍去脈，全部講晒比阿樂知。
 
「即係阿炫等多3日，就可以出返嚟，仲有你係父母身上完成心願，自然可以離開人間。」
 
「你既理解完全正確。」
 
「唯一一點唔太明，點解你可以上到阿炫身？」
 
「我都唔知……就係身體……普通身體接觸囉！」
 




「不過我地仲係朋友既話，我想知一樣野。」到死我都諗唔通，同時阿炫都唔知既事。
 
「嗯？」
 
「情人節個日，點解你要Po同其他人食飯？明明你都冇拍拖。」
 
「因為我知好多女仔暗戀我，咁啱家姐個日同男朋友嘈架，就叫左我食飯，高級餐廳取消預約要賠錢。」
 
即係阿樂一早就知，我暗戀佢？
 
「哈哈哈⋯⋯」我紅著眼眶。
 
「阿澄，係咪煙花太掁眼？」阿樂擔憂地問。
 
你真係唔知？




 
「係呀！阿樂你又知既！」我抹去淚水，擋著阿樂視線。
 
「我地唔好睇煙花啦，返去同阿傲佢地會合啦！」阿樂拉住我既手袖。
 
我地同阿傲會合之後，就一齊搭車返屋企，過程中，我同大家有講有笑。
 
「下一站，九龍灣。Next station: Kowloon Bay.」其餘人前幾個站落車，剩返我同阿樂。
 
「咁快返到屋企啦！」我講。
 
「阿澄，我真心希望你享受埋最後一段時間，可以完成心願離開人間。」
 
「咁當然啦！」
 




「我唔似阿炫精通鬼魂，又唔似阿傲咁聰明，但如果你有咩困難，記得揾我！」阿樂苦笑。
 
「唔洗咁樣喎！我實可以離開人間㗎喎！你對我冇信心？」
 
「梗係唔係⋯⋯我知⋯⋯」
 
「鍾健樂，你記住呀！CU等緊你！考好DSE呀！我係天都會睇住你㗎！我行呢邊！」我展開笑容，向阿樂揮手。
 
阿樂用力點點頭，並同我揮手。
 
我轉身，睇住阿樂背影逐漸變細。
 
「澄？」阿炫講。
 
「咩呀？無啦啦⋯⋯叫人又唔出聲。」喉嚨好似有野塞住左，令我好難發聲。




 
「想喊咪喊。」
 
「邊個話⋯⋯我想喊？」
 
「依家阿樂都睇唔到你。我知你唔想阻住阿傲同凌卓琳，頭先成程車係咁捉住駱均堯問操肌既野，你真係對操肌有興趣咩？」
 
「幫你問唔得呀？仲有你唔好叫卓琳全名，佢好憎人咁叫，你嗌返佢做卓琳啦！」
 
「點解？我同佢又唔熟。」
 
「你試下當面咁叫，你實比佢啤！」
 
「你沖涼都啤實我啲腹肌，唔好以為我唔知。」
 




聽到呢句，我面紅耳赤講：「楊燦炫，你講咩？我似啲⋯⋯似啲咁咸濕既女仔咩！」
 
「實信你，哈哈！」
 
「楊燦炫！」
 
「哇，隔離個男仔真係慘，咁後生就有精神病。」旁邊路過既中年男人講。
 
「咪講啦，佢望過嚟啦！」男人旁邊既女人講。
 
「噗⋯⋯哈哈哈⋯⋯」我同阿炫同時大笑。
 
「喂，你搞到我比人誤會係病，仲好意思係到笑？」
 
「你本人都笑啦！」我捂著嘴。
 
「冇，絕對冇！」
 
「你話想喊就喊，咁你想笑咪笑囉！」
 
「男人唔同女人。」
 
「男人又好，女人又好，大家都係人，成日屈係心唔好㗎，適當既時候要揾人講下㗎嘛！」我已經行到阿炫家門前。
 
「睇嚟你都係唔明兩性差異。」
 
「講極你都唔明！楊燦炫，呢排日日對住你，你個人就係有咩都唔講，就好似今日咁⋯⋯」
 
進入家門，映入眼簾唔係理所當然既漆黑房屋，而係柔和黃色燈光，夫婦坐在沙發上。
 
「爸媽？」阿炫驚訝咁講。
 
「阿炫？我地係大陸搞掂單凶宅案，就提早返嚟。」楊媽講。
 
楊媽束著短馬尾，眼尾帶點皺紋，睇落似40-50歲左右。
 
「阿炫——」楊爸突然向我扔向一道符咒。
 
我頭隱隱作痛，忍唔住跪坐在地上。
 
楊爸上前，用木劍架向我頸上，講：「你係邊個？點解係我個仔身上？」
 
「魔靈？」旁邊楊媽望向我講。
 
「我唔係⋯⋯個位死八婆！」我痛苦在地上掙扎。
 
楊媽指向我右手既紅繩，然後講：「老公，阿炫胸口掛住左墨翠。」
 
「依家比你用10秒講，到底發生咩事。」楊爸講。
 
「我唔小心上左阿炫身，我唔係惡鬼，你唔信問阿炫，佢係我體內！」
 
楊爸望住我，示意我講落去。
 
「你地結婚周年紀念日係11月11日，每逢呢日既前後，我都要去公公婆婆個邊瞓，因為你地要去峇里島旅行。」
 
楊爸放下木劍，急速唸左句唔知咩咒語後，再取出我身上既符咒，我即刻唔再痛。
 
「叔叔，阿炫話你返嚟，我就可以離開佢既身體，我地都冇諗過你咁早返到。」
 
「你係女鬼？」楊媽問。
 
「我叫劉淽澄，係阿炫同學。」
 
楊媽微笑並講：「淽澄，你等我同叔叔傾下。」
 
佢地望向我個邊，交頭接耳數句，就開始準備儀式。
 
楊爸在地上畫下大陣，楊媽則是準備道具。
 
「啊⋯⋯」楊爸望住我，欲言又止。
 
「淽澄，行過嚟個陣中間，戴上呢舊南紅瑪瑙。」楊媽講。
 
我企在圓圈位置，旁邊仲有好多唔同顏色既瑪瑙，楊爸拎住木劍，立刻唸經。
 
我再次感覺頭昏欲裂，然後暈倒，未能目睹整個過程。
 
當我甦醒之時，阿炫正坐在我既旁邊。
 
「澄，有冇唔舒服？」
 
「我地換返身體？」我發現原來自己瞓左係阿炫床上。
 
「你話呢？」阿炫仍然木無表情講。
 
我篤向阿炫左邊嘴角，講：「又真係交換返身體喎！笑下啦！」
 
「你醒返就啱，我要上床瞓覺。」
 
「楊燦炫，你係咪要趕一個女仔落床呀？你咁樣冇女朋友㗎！等我教定你啦！任何時候一定要讓女仔先，咁先係暖男！」
 
結果，我被趕出房門。
 
「砰——」房門係我面前關上。
 
「楊燦炫！我未講完呀！」
 
「你知唔知咩叫Gentleman呀！」
 
「開門呀！」
 
「你成身都比我睇晒㗎啦！」
 
「淽澄？」我回頭一望，正係楊媽。
 
我勉強微笑，啱啱既說話佢應該聽到晒。