變成女鬼既我，剩返30日要出POOL！: （十八）大人的世界
「屋企仲有間雜物房，頭先好急執好左，你有咩不便就同我講啦！」楊媽打開執物房門。
我立即擺擺手講：「Auntie，唔洗特登執房比我，更何況我都費事打擾你地啦！阿炫就話好人，唔想見到昔日同學落難。」
楊媽嫣然一笑，講：「自從魔靈一事，阿炫對身邊人同事都漠不關心，我最清楚呢個仔脾氣，如果佢肯幫你，相信你地生前交情一定好好，你就放心係到住啦！」
我同阿炫唔同班，唯一交流就係社幹事。
「楊燦炫，今日Board要人，放學過嚟4樓！」
「楊燦炫，接力賽我填左你名！阿樂話你跑步跑得快！」
問得最多當然係：「阿炫，你知唔知阿樂係邊？我有野要揾佢。」
對比起其他幹事，我都好少揾阿炫講野。
「平時阿炫都好少講野，又少笑，真係唔知佢當我係佢朋友，頭先仲趕我出房門。」
「阿炫就係似足佢爸爸，咩都唔講，到依家有時我都唔知我老公諗咩。」
「問親咩都唔肯講，我又唔係佢肚入面條蟲，仲有叫佢笑多啲，仲係木口木面！」
楊媽輕笑並講：「係咩？我覺得佢表情多左喎！感覺你係到，我可以見下呢個仔另一面。」
「另一面？」
「夜啦，鬼同人都要休息，淽澄早抖啦！」
「我會盡快完成心願，唔會阻到你地。」
楊媽摸摸我個頭講：「傻豬嚟既，係到住唔洗有壓力喎！總知有咩事你揾阿炫幫手，佢唔幫手，你即管揾姨姨就得，我會幫你教訓佢！」
「嗯！真係好多謝你！」我瞇埋眼點點頭。
阿炫媽咪同阿炫性格簡直截然不同。如果話阿炫生得似惡魔，咁佢媽咪一定係天使！
只不過啱啱同阿炫媽咪傾偈，諗唔明點解佢會話我地關係好好，畢竟我地係死後先熟。
點解當時阿炫會選擇幫我？
我在床上輾轉反側，意外地見到地上既逗貓棒。阿炫屋企肯定冇養貓。
「哇，即刻精神晒！你當時隻貓真係好好味，我食得好開心！」腦海立即浮現魔靈舔住唇邊既瘋癲模樣。
如果阿炫屋企以前有養貓，而隻貓係比魔靈食左？
魔靈條八婆一定唔可以放過佢！下次一定要同阿炫一齊殺左佢！阿炫個陣一定好唔開心！
我將枕頭當作魔靈，佢副囂張既嘴臉，令我恨不得一拳又一拳打落去，打完舒服晒！
猛烈既陽光從窗簾中照射到房間中，我睜開雙眼，然後瞬間轉移揾阿炫，只見佢好專心温緊書。
咁又係⋯⋯係我唔洗考DSE啫⋯⋯
「喂！嚟到又唔出聲！」阿炫突然轉過身。
「你又知我係到？我都冇出聲？」我驚訝問。
阿炫一臉無奈講：「我Feel到，想點？」
「純粹睇下你醒左未啫～仲以為你瞓緊。」
「作為DSE考生，當然有時間表，唔似你瞓到2點。」阿炫指向牆上既紙張。
8點半起身，9點温中文，12點温數學，1點半食飯，3點再温Chem，5點温Bio，7點食飯，9點温英文，12點瞓覺，每1個鐘休息10分鐘。
「原來你既一日時間咁緊密。」
「呢幾日要趕進度，你係咪有野想講？」阿炫轉住筆講。
「睇下你琴日趕左我出去，係咪瞓得好好啫！唔阻你！」
我瞬間轉移到父母家中。
呢排慣左同阿炫一齊，醒唔起佢仲要考DSE。有關父母心願既事，就無謂麻煩佢。
劉淽澄，你一定可以揾到心願！
今日係星期一，阿爸同阿媽都去左返工。
「琴日聖約翰中學中四男學生，懷疑因學習壓力過大，從高處墮下，現場冇檢獲遺書，死因初步冇可疑⋯⋯」工人Maria，佢係到睇電視。
間屋同以往一樣，客廳、廚房、飯廳擺設基本上冇變，仍然保留4個人位置。
我瞬間轉移到自己房間，熟悉既粉紅色裝橫，床上Duffy & Friends 既公仔整齊放著，仲有書枱既翠絲同巴斯光年既立牌，仔細端詳立牌表面上並冇半點塵埃。
間房仲乾淨過以前我用個陣，一定係Maria定期打掃。
我瞬間轉移到阿爸工作地點，佢係貿易公司既Sales Team，我係Office行左個圈都唔見佢。
電梯門一開，阿爸同一班同事返緊嚟，帶住一股微微既煙草味。
臨出門前，佢會噴古龍水，走廊總係佢既氣味，我以前成日投訴佢古龍水味好濃，叫佢換過款，佢都唔理我，話呢隻好聞，仲同我講氣味會聞聞下就習慣，甚至會慢慢喜歡。
或者，煙草味都係一樣？
我瞬間轉移到阿媽工作地點，屏幕一堆試算表，只見阿媽滴完眼藥水後，立即埋首工作。
阿媽雙眼充滿紅筋，明顯休息不足。
「Christine，你過一過嚟。」Manager講。
入房後，上司將文件大力扔到桌面上，講：「Christine，你出錯糧比兩個同事，好彩佢地主動同我講返，如果佢地唔講，下個月會繼續錯。」
「好對唔住，我依家即刻跟返！」
「我頭先已經搞掂。」Manager冷靜數秒，講：「Christine，我知你個女最近離世，但你係Assistant Manager，仲要帶住班細做野！你再做錯野，我真係係好難係老細面前幫你。」
「如果你唔舒服，不如抖下？你啲野我會揾⋯⋯」
「我唔需要拎假，自己啲野我可以跟返，我保證下次唔會有甩漏。」
阿媽一直係我眼中，係好能幹既大人，因為阿媽上年先係Annual Dinner拎左最佳員工奬，冇諗過死後見到阿媽會比上司鬧。
雖然我仲未返過工，但我知道HR出錯糧，係好嚴重既工作錯誤。
阿媽返到自己座位繼續工作，枱頭上既全家福係上年去富士山影，即使背景富士山矇矇矓矓，相中既三人仍笑容滿面。
明明話富士山能見度高既時候，會再影多次相，睇嚟都係等唔到⋯⋯
我淚眶逐漸充滿淚水，立即用瞬間轉移，沿途風景我都走馬看花，漫無目的咁向前行。
阿媽做野咁辛苦，我以前仲成日嫌佢煮飯難食⋯⋯
我根本唔知阿爸阿媽工作到底有幾辛苦！
「澄！你咩事？」熟悉既聲音從耳邊出現。
眼前阿炫係Starbucks門口拎住咖啡，一臉擔憂望住我。
明明我只係求其去一個地方，點解都會撞到阿炫？